អគារសម្ភព២កន្លែង ដែលជាអំណោយរបស់លោក សាលាអង់រីកូ និងសប្បុរសជនស្វ៊ីស ត្រូវបានសម្ពោធដាក់ឲ្យប្រើប្រាស់ជាផ្លូវការនៅព្រឹកថ្ងៃទី១២ ខែមីនា ឆ្នាំ២០១៩។ អគារសម្ភពទី១ មានទីតាំងស្ថិតនៅក្នុងមណ្ឌលសុខភាពអង្គរធំ ឃុំលាងដៃ ស្រុកអង្គរធំ និងអាគារសម្ភពទី២ មានទីតាំងស្ថិតនៅក្នុងមណ្ឌលសុខភាពរំចេក ឃុំរំចេក ស្រុកបន្ទាយស្រីខេត្តសៀមរាប ដែលមានការចូលរួមជាអធិបតីពី ឯកឧត្តម អ្នកឧកញ៉ា សៀង ណាំ តំណាងរាស្ដ្រមណ្ឌលសៀមរាប, លោក សាលាអង់រីកូ ម្ចាស់អំណោយ។
លោក សាលា អង់រីកូ ជាជនជាតិស្វីសម្ចាស់អំណោយបានឲ្យដឹងថា សមិទ្ធិផលថ្មីនេះ ជាអំណោយរបស់ជនរួមជាតិស្វីសរបស់លោក ដោយចំណាយថវិកាកសាងអស់ ៥ម៉ឺន ៦ពាន់ដុល្លារ អាមេរិច សម្រាប់សាងសង់អគារសម្ភព២កន្លែង មាន ៦បន្ទប់ នៅក្នុងមណ្ឌលសុខភាពអង្គរធំ ស្រុកអង្គរធំ និងមណ្ឌលសុខភាពរំចេក ស្រុកបន្ទាយស្រី ខេត្តសៀមរាប។ លោក សាលា អង់រីកូ ជាជនជាតិស្វីស និងសប្បុរសស្វីសតែងតែបានចូលរួមជួយឧបត្ថម្ភ សម្ភារ: ក៏ដូចជាថវិកាដល់វិស័យសុខាភិបាល ដើម្បីចូលរួមជួយកាត់បន្ថយនៅភាពក្រីក្ររបស់បងប្អូនប្រជាពលរដ្ឋ ដែលមានភាពលំបាកនឹងខ្វះខាតក្នុងការព្យាបាលជម្ងឺទូទៅ និងផ្នែកសម្រាល់កូនជាដើម។
ឯកឧត្តម អ្នកឧកញ៉ា សៀង ណាំ តំណាងរាស្ដ្រមណ្ឌលសៀមរាប បានមានប្រសាសន៍ថា នេះគឺជាសមិទ្ធផលថ្មីមួយមិនអាចកាត់ថ្លៃបាន ហើយមិនអាចវាយតម្លៃបានចំពោះទឹកចិត្ដ និងថវិកាដែលលោកសាលាអង់រីកូ បានជួយដើម្បីទ្រទ្រង់នូវវិស័យសុខាភិបាល ក្នុងការបម្រើសេវាសាធារណៈជូនប្រជាពលរដ្ឋនៅក្នុងខេត្តសៀមរាប។
លោកឧកញ៉ា សៀង ណាំ បានថ្លែងថា លោកសាលាអង់រីកូ គឺជាសប្បុរសជនជនជាតិស្វ៊ីសមួយរូប ដែលបានបរិច្ចាគធនធានផ្ទាល់ខ្លួនជាច្រើន ជាពិសេសលោកបានធ្វើការអំពាវនាវទៅសប្បុរសជនជនជាតិស្វ៊ីសដទៃទៀត ដើម្បីយកថវិកាជួយកសាងអគារសិក្សា ជាពិសេសមណ្ឌលសុខភាព, អគារមន្ទីរពេទ្យ ដើម្បីបម្រើឲ្យសេវាសាធារណៈជូនប្រជាពលរដ្ឋកម្ពុជា ជាពិសេស គឺប្រជាជនរស់នៅក្នុងខេត្តសៀមរាបតែម្តង។
សូមរំលឹកថា ក្នុងឆ្នាំ២០១៩នេះ លោកបានជួយកសាងអាគារសិក្សា១ខ្នង មាន៥បន្ទប់ នៅវិទ្យាល័យ ហ៊ុន សែន សៀមរាប សង្កាត់គោចក ក្រុងសៀមរាប អាគាររោងជាង១ខ្នង និងបណ្ណាល័យ១ខ្នង ក្នុងវិទ្យាល័យពួក ស្រុកពួក និងអាគារសម្ភព២ខ្នង ក្នុងនោះមណ្ឌលសុខភាពអង្គរធំ១ខ្នង និងមណ្ឌលសុខភាពរំចេក១ខ្នង។
អត្ថបទ និង រូបថត ៖ លោក អិុន សីហរិទ្ធ
កែសម្រួលអត្ថបទ ៖ លោក សេង ផល្លី
