បច្ចុប្បន្ន ប្រជាពលរដ្ឋក្នុងខេត្តសៀមរាប មានការយល់ដឹងច្រើន ក្នុងជ្រើសរើសចំណីអាហារសុវត្ថិភាព ដើម្បីទាក់ទាញការចាប់អារម្មណ៍ ពីអ្នកទទួលទាន ភោជនីយដ្ឋានក្នុងខេត្តមួយចំនួន បានសម្រិតសម្រាំងប្រភពចំណីអាហារ ដែលធានាបាននូវសុខភាពដល់អតិថិជនរបស់ខ្លួន ក្នុងនោះ ម្ចាស់ភោជនីយដ្ឋានដំណាក់រាជសីហ៍ ដែលមានទីតាំងនៅតាមបណ្តោយផ្លូវ៦០ម៉ែត្រ បានអះអាងថា ដើម្បីសុខភាពអតិថិជន លោកបានបញ្ជាទិញ បន្លែ ផ្លែឈើ ត្រីសាច់ និងស៊ុតដែលផលិតដោយកសិករខ្មែរ នៅជុំវិញខេត្តសៀមរាប។
ក្នុងពិធីចុះអនុស្សណៈយោគយល់គ្នា នៅល្ងាចថ្ងៃទី១១ ខែមីនា ឆ្នាំ២០១៩ រវាងភោជនីយដ្ឋានដំណាក់រាជសីហ៍ សហគមន៍កសិកម្ម-ហាងមាន់ទាស្រែ និងអង្គការហេហ្វឺអន្តរជាតិកម្ពុជា ស្ដីអំពី ការពង្រឹង និងបង្កើនកិច្ចសហប្រតិបត្តិការ ក្នុងការបង្កើនការលក់ និងលើកកម្ពស់កសិផលរបស់កសិករខ្មែរ លោក អេង សារី ម្ចាស់ហាងដំណាក់រាជសីហ៍ បាននិយាយថា ភោជនីយដ្ឋានរបស់លោក នឹងបញ្ជាទិញមាន់ស្រែ ទាស្រែ និងស៊ុតដែលផលិតដោយកសិករខ្មែរជុំវិញខេត្តសៀមរាបតាមរយៈសហគមន៍កសិកម្ម-ហាងមាន់ទាស្រែ ដែលគាំទ្រដោយអង្គការហេហ្វឺអន្តរជាតិកម្ពុជា និងបញ្ជាទិញ បន្លែ ផ្លែឈើសុវត្ថិភាពរបស់កសិករខ្មែរ តាមរយៈអង្គការអាគ្រីស៊ុតកម្ពុជានិងអង្គការផ្សេងៗទៀត។
លោកបន្តថា មូលហេតុដែលលោកប្រើប្រាស់បន្លែផ្លែឈើ ត្រីសាច់សុវត្តិភាពទាំងនេះ គឺដោយសាលោកចង់ជួយលើកកម្ពស់ផលិតផលក្នុងស្រុកដែលមានសុវត្តិភាពរបស់បងប្អូនកសិករខ្មែរ និងដើម្បីធានាសុខភាពអតិថិជន ដែលមកពិសារអាហារនៅភោជនីយដ្ឋាន ដំណាក់រាជសីហ៍។
ប្រធានប្រចាំប្រទេស នៃអង្គការហេហ្វឺកម្ពុជា លោកស្រី កែវ គៀង បានមានប្រសាសន៍ថា ការចុះហត្ថលេខាលើអនុស្សរណៈនេះ គឺបង្ហាញពីដំណើរវិវត្តន៍មួយជំហានទៀត ក្នុងការលើកស្ទួយកសិផលខ្មែរ និងការគិតគូរដល់ សុខភាពរបស់អ្នកបរិភោគ។ លោកស្រីបានបន្តថា ការសម្ភោធភោជនីយដ្ឋានដំណាក់រាជសីហ៍ ប្រៀបបានដូចជា ការបើកសម្ពោធទីផ្សាររបស់សហគមន៍កសិករមួយកន្លែងទៀតផងដែរ។ ប្រសិនបើមានភោជនីយដ្ឋានកាន់តែច្រើន ដែលនឹងជួយទទួលទិញកសិផលរបស់ខ្មែរ ផលិតស្របតាមស្តង់ដារការអនុវត្តកសិកម្មល្អ(GAP) និងសរីរាង្គកាន់តែច្រើន នោះមានន័យថា ជួយលើកកម្ពស់ផលិតផលនិងជីវភាពកសិករខ្មែរ និងជួយដល់សុខភាពអ្នកបរិភោគ នូវអាហារដែលគ្មានជាតិពុល។ សហគមន៍កសិកម្ម-ហាងមាន់ទាស្រែ ដែលឧបត្ថម្ភ និងគាំទ្រដោយអង្គការហេហ្វឺអន្តរជាតិកម្ពុជា ត្រូវបានបង្កើតឡើងដោយសហគមន៍កសិកម្ម ក្រោមការគាំទ្រដោយ អង្គការហេហ្វឺ អន្តរជាតិកម្ពុជា ក្នុងគោលបំណងធ្វើការជាមួយកសិករ ដើម្បីបង្កើនផលិតផលកសិកម្មដែលមានសុវត្ថិភាព និងភ្ជាប់ទំនាក់ទំនងពួកគាត់ទៅនឹងទីផ្សារ។
មកដល់បច្ចុប្បន្ន អង្គការហេហ្វឺអន្តរជាតិកម្ពុជា បានកំពុងធ្វើការគាំទ្រដល់ កសិករក្រីក្រចំនួនជាង៤០,០០០ គ្រួសារ និងសហគមន៍កសិកម្មចំនួន ៦៤ នៅក្នុងខេត្តចំនួន១២ នៃព្រះរាជាណាចក្រកម្ពុជា ដែលផ្តោតសំខាន់លើ ការលើកកម្ពស់ ការផលិត មាន់ ទា ជ្រូក និងបន្លែសរីរាង្គជាដើម និងភ្ជាប់ទំនាក់ទំនងទីផ្សារ ដើម្បីលើកកម្ពស់ជីវភាពរបស់ពួកគេ និងឈានទៅរកភាពម្ចាស់ការ និងមាននិរន្តរភាព៕
អត្ថបទ និងរូបភាព៖ លោក ជា ស្រស់ និងលោក ខេង ឧត្តម
