មន្ត្រីជាន់ខ្ពស់ក្រសួងពាណិជ្ជកម្មបានបង្ហាញថា នៅប៉ុន្មានឆ្នាំចុងក្រោយនេះសភាពាណិជ្ជកម្មកម្ពុជា បានជួយសម្របស្រួលដល់អ្នកវិនិយោគគិនបរទេសជាច្រើន ក្នុងការបណ្តាក់ទុនវិនិយោគនៅកម្ពុជា ដែលកត្តាទាំងនេះ បានកំពុងធ្វើឲ្យអ្នកវិយោគគិនបរទេស កាន់តែមានភាពជឿជាក់ និងមកធ្វើការវិយោគនៅកម្ពុជាកាន់តែច្រើនបន្ថែមទៀត។
ក្នុងកិច្ចប្រជុំផ្សព្វផ្សាយ បើកការិយាល័យបោះឆ្នោតសភាពាណិជ្ជកម្មមណ្ឌលខេត្តសៀមរាប-ឧត្តរមានជ័យ នៅព្រឹកថ្ងៃទី១១ខែមីនាឆ្នាំ២០១៩ ស្ថិតក្នុងមន្ទីរពាណិជ្ជកម្មខេត្តសៀមរាប ឯកឧត្តម ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម បានមានប្រសាសន៍នៅថា សភាពាណិជ្ជកម្មកម្ពុជា ក៏ដូចជាសភាពាណិជ្ជកម្មខេត្ត គឺមានតួនាទីយ៉ាងសំខាន់ក្នុងការប្រមូលផ្តុំវិស័យឯកជនមកជជែកពិភាក្សាគ្នា ធ្វើយ៉ាងណាឲ្យអាជីវកម្មរបស់ពួកគាត់ ដំណើរការទៅមុខកាន់តែល្អប្រសើរ ស្របគ្នាទៅយុទ្ធសាស្ត្ររបស់រដ្ឋាភិបាល។ ហើយក្រៅពីការប្រមូលផ្តុំវិស័យឯកជនក្នុងស្រុកមកជជែកពិភាក្សាគ្នា សភាពាណិជ្ជកម្ម ក៏មានតួនាទីជួយសម្រួលដល់ អ្នកវិយោគគិនបរទេស ឲ្យជួបជាមួយអ្នកវិយោគគិនក្នុងស្រុក ក្នុងការពិភាក្សា និងចាប់ដៃគូធ្វើអាជីវកម្មផងដែរ។
ឯកឧត្តមបានបញ្ជាក់ថា បច្ចុប្បន្ននេះអ្នកវិយោគគិនបរទេសភាគច្រើន បានមកទំនាក់ទំនងធ្វើការវិនិយោគទុកនៅកម្ពុជា តាមរយៈសភាពាណិជ្ជកម្មកម្ពុជា និងពាណិជ្ជកម្មខេត្តនានា ដោយសារពួកគេយល់ឃើញថា សភាពាណិជ្ជកម្មកម្ពុជា និងសភាពាណិជ្ជកម្មខេត្ត គឺមានការគាំទ្រពីរាជរដ្ឋាភិបាល និងមានការប្រមូលផ្តុំវិស័យឯកជនក្នុងស្រុក ដែលធ្វើឲ្យពួកគេជឿទុកចិត្ត និងអាចចាប់ដៃគូបណ្តាក់ទុនវិនិយោគបាន។
លោកឧកញ៉ា ហ៊ុយ ភៀវ ប្រធានសភាពាណិជ្ជកម្មខេត្តសៀមរាប-ឧត្តរមានជ័យ បានមានប្រសាន៍ថា រយៈពេល ៣ឆ្នាំ(១ អាណត្តិ) ដែលលោកជាប្រធានសភាពាណិជ្ជកម្មខេត្តសៀមរាប-ឧត្តរមានជ័យកន្លងមកនេះ សភា បានរៀបចំឲ្យមានជំនួបចាប់ដៃគូពាណិជ្ជកម្មនៅក្នុងស្រុក និងនៅក្រៅប្រទេសជាច្រើនដូចជា ជាមួយនិងប្រទេសចិន ថៃ វៀតណាម នេប៉ាល់ អូស្ត្រាលី សិង្ហបុរី និងប្រទេសផ្សេងៗជាច្រើនទៀត។ហើយនៅក្នុងឆ្នាំ២០១៩នេះ សភាពាណិជ្ជកម្មមណ្ឌលខេត្តសៀមរាប-ឧត្តរមានជ័យ មានគម្រោងបង្កើតផ្សារពាណិជ្ជកម្មខេត្តសៀមរាប ដោយផ្តោតសំខាន់ទៅលើបន្លែ និងផលិតផលកសិកម្មក្នុងស្រុក ដែលលក់នូវរាល់ថ្ងៃសៅរ៍ និងអាទិត្យ ដើម្បីឲ្យប្រជាកសិករ សមាគមកសិកម្ម អាចលក់បន្លែ ឬផលិតផលដែលផលិតបាន ដល់អថិតិជនផ្ទាល់តែម្តង៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក សេង ផល្លី
