គំនូររូបផ្កាចំនួន២៣ផ្ទាំង ដែលជាស្នាដៃផ្ទាល់របស់កុមារឈ្មោះ ចន្នី ហ្សាវ (Jonny Zhao) អាយុ១១ឆ្នាំ មកពីប្រទេសសឹង្ហបុរី ត្រូវបានកុមារសឹង្ហបុរីរូបនេះ នាំយកមកផ្ទាល់ខ្លួនសម្រាប់ដាក់តាំងលក់ នៅមន្ទីរពេទ្យកុមារអង្គរខេត្ដសៀមរាប ស្ថិតក្នុងភូមិមណ្ឌល១ សង្កាត់ស្វាយដង្គំ ក្រុងសៀមរាប ខេត្ដសៀមរាប ដើម្បីប្រមូលថវិកាជូនមន្ទីរពេទ្យកុមារអង្គរនេះ ដែលការដាក់តាំងលក់នេះ មានរយៈពេល១ខែ ចាប់ពីល្ងាចថ្ងៃទី០៧ខែមីនា ដល់ថ្ងៃទី០៧ ខែមេសា ឆ្នាំ២០១៩ ។
អ្នកស្រី ស៊ិនកេត អរុណ ប្រធានទំនាក់ទំនងសាធារណៈ នៃមន្ទីរពេទ្យកុមារអង្គរខេត្ដសៀមរាប បានឲ្យដឹងថា មន្ទីរពេទ្យកុមារអង្គរ ឬហៅថា មន្ទីរពេទ្យបេះដូង បាននឹងកំពុងព្យាបាលជំងឺកុមាររាប់រយនាក់ក្នុងមួយថ្ងៃៗ ដោយមិនគិតថ្លៃ ហើយសេវាការព្យាបាលនេះ ដែលពឹងផ្អែកទាំងស្រុងទៅលើសប្បុរសជនទាំងក្នុងប្រទេស និងក្រៅប្រទេស ដូច្នេះដោយមើលឃើញនូវបញ្ហានេះ ទើបកុមារ ចន្នី ហ្សាវ ស្វែងរកជំនួយដើម្បីជួយសង្គ្រោះដល់កុមារកម្ពុជា តាមរយៈការដាក់តាំងលក់រូបគំនូររូបផ្កា ដែលជាស្នាដៃផ្ទាល់របស់ខ្លួន ។
អ្នកស្រី ស៊ិនកេត អរុណ ឲ្យដឹងទៀតថា សម្រាប់ថវិកាទ្រទ្រង់មន្ទីរពេទ្យកុមារអង្គរនេះ មួយផ្នែកធំគឺទទួលបានពីសប្បុរសជនខាងក្រៅប្រទេស ដោយឡែកនៅក្នុងប្រទេសឯណេះវិញ ខាងមន្ទីរពេទ្យទទួលបានថវិកាពីសប្បុរសជនតាមរយៈការរៀបចំព្រឹត្តិការណ៍នានា មានប្រមាណពី៤០ម៉ឺនទៅ៦០ម៉ឺនដុល្លាអាមេរិកក្នុងមួយឆ្នាំៗ ខណៈនៅដើមឆ្នាំ២០១៩នេះ ខាងមន្ទីរពេទ្យបានរៀបចំកម្មវិធីស្វែងរកថវិកាបានចំនួន៧ដងរួចមកហើយ ។
ព័ត៌មានជាតិ ថ្មីៗ
តាមរយៈអ្នកបកប្រែ កុមារា ចន្នី ហ្សាវ បានឲ្យដឹងថា រូបគេបានចេះគូរគំនូររូបផ្កានេះតាំងអាយុ៣ឆ្នាំមកម្លេះ ព្រោះថាផ្កានេះរូបគេយល់ថា បានធ្វើឲ្យកុមារសប្បាយចិត្ដមិនថាជនជាតិអ្វីនោះទេ ប៉ុន្តែដោយមើលឃើញពីកុមារកម្ពុជាកំពុងតែមានជំងឺមហារីក និងខ្វះខាតថវិកាច្រើនសម្រាប់ការព្យាបាល ទើបរូបគេយកគំនូរផ្ការនេះ មកដាក់លក់និងតាំងពិព័រណ៍ ដើម្បីយកថវិកានេះជួយដល់កុមារកម្ពុជាទទួលបានការព្យាបាលមួយដែលមានគុណភាព ហើយការតាំងពិព័រណ៍គំនូរផ្កានេះ ក៏បានធ្វើឡើងជាច្រើនលើកផងដែរនៅប្រទេសសឹង្ហបុរី ដើម្បីប្រមូលថវិកាសម្រាប់ជួយក្មេងៗដែលមានជំងឺមហារីក ។
លោក ងួន ច័ន្ទភក្រា្ដ នាយកមន្ទីរពេទ្យកុមារអង្គរ បានមានប្រសាសន៍ថា មន្ទីរពេទ្យកុមារអង្គរនេះ ត្រូវបានបង្កើតឡើងដោយស្ថាបនិកជនជាតិជប៉ុន គឺលោក ខិនរ៉ូ អ៊ីស៊ុ នៅក្នុងឆ្នាំ១៩៩៩ ក្នុងទស្សនៈវិស័យផ្ដល់ការព្យាបាល និងថែទាំងសុខភាពដល់កុមារកម្ពុជាប្រកបដោយមេត្ដាករុណា គុណភាពខ្ពស់ និងមិនយកកម្រៃ ហើយមន្ទីរពេទ្យនេះក៏ជាកន្លែងបណ្ដុះបណ្ដាលដល់បុគ្គលិក មន្ដ្រីសុខាភិបាល និស្សិតវេជ្ជសាស្ត្រ និងសិស្សគិលានុបដ្ឋានមកពីទូទាំងប្រទេសកម្ពុជាផងដែរ ។
លោក ងួន ច័ន្ទភក្រា្ដ មានប្រសាសន៍ទៀតថា ជារឿងរាល់ថ្ងៃ ជាមធ្យមមានកុមារប្រមាណ៥០០នាក់ បានទទួលព្យាបាលនៅមន្ទីរពេទ្យកុមារអង្គរនេះ ដោយមិនគិតថ្លៃ និងបានចំណាយថវិកាប្រមាណ ៦,៥លានដុល្លាអាមេរិក ក្នុងមួយឆ្នាំ ទៅលើការព្យាបាលជំងឺកុមារទូទៅ និងជំងឺវះកាត់បេះដូងផងដែរ ដែលចាប់តាំងពីឆ្នាំ១៩៩៩មក មន្ទីរពេទ្យនេះ បានព្យាបាលកុមារចំនួន២លាននាក់ហើយ ៕
អត្ថបទ និង រូបថត ៖ លោក ជា ស្រស់ និង លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
