ដើម្បីអបអរសាទរខួបអនុស្សាវរីយ៍លើកទី១០៨ ទិវានារីអន្តរជាតិ ៨មីនា ឆ្នាំ២០១៩នេះ ក្រោមប្រធានបទ លើកកម្ពស់សមភាពយេនឌ័រ និងការគាំពារសង្គម ដើម្បីអភិវឌ្ឍន៍ធនធានមនុស្ស ឯកឧត្តម ឈឹម ម៉ា អ្នកតំណាងរាស្ត្រមណ្ឌលខេត្តសៀមរាប និងជាប្រធានក្រុមការងារចុះជួយស្រុកពួក បានដឹកនាំក្រុមការងារស្ត្រី ក្នុងស្រុកពួកចំនួន៥០នាក់ មកពីឃុំនិងភូមិនានាក្នុងស្រុកពួក ធ្វើដំណើរទស្សនកិច្ចសិក្សាស្វែងយល់នៅតំបន់មួយចំនួន ដូចជា វិមានឈ្នះឈ្នះ , សួនសត្វ ភ្នំពេញ សាហ្វារី និង ប្រាសាទសំបូរព្រៃគុក ក្នុងខេត្តកំពង់ធំ ដែលជាប្រាសាទបេតិកភណ្ឌពិភពលោកជាដើម។
ក្នុងដំណើរទស្សនកិច្ចនេះ ធ្វើឡើងក្នុងគោលបំណង លើកកម្ពស់សមភាពយេនឌ័រ និងការគាំពារសង្គម ដើម្បីអភិវឌ្ឍធនធានមនុស្សនៃទិវាអន្តរជាតិនារី ៨មីនា និងផែនការសកម្មភាពជាតិ ស្តីពីការទប់ស្កាត់អំពើហិង្សា (២០១៩-២០២៣) ដែលជាគោលនយោបាយទាំង៣ ក្រោមកិច្ចសហការជាមួយក្រសួង ស្ថាប័ន អង្គការសង្គមស៊ីវិល និងដៃគូអភិវឌ្ឍន៍ គោលការណ៍សំខាន់ៗទាំង៣នោះ រួមមានដូចជា៖ ទី១. ការធ្វើស្ថាប័ននីយកម្មក្របខណ្ឌផ្អែកលើសមភាពយេនឌ័រ តាមវិស័យនីមួយៗ , ទី២. បង្កើនធនធានមនុស្ស និងធនធានហិរញ្ញវត្ថុ ក្នុងការលើកកម្ពស់សមភាពយេនឌ័រ ក្នុងរាជរដ្ឋាភិបាលកម្ពុជា ក៍ដូចជាវិស័យផ្សេងៗទៀត និង ទី៣. បង្កើតប្រព័ន្ធតាមដាន ត្រួតពិនិត្យមានលក្ខណៈសង្គតិភាព និងផ្តល់គណនេយ្យភាពសាធារណៈដល់ស្ត្រី និងក្មេងស្រី ។
ឯកឧត្តម ឈឹម ម៉ា មានប្រសាសន៍ថា នេះគឺជាសារមួយសម្រាប់ការប្រារព្ធពិធីអបអរសាទរខួបអនុស្សាវរីយ៍លើកទី១០៨ ទិវានារីអន្តរជាតិ ៨មីនា ដែលយើងទាំងអស់គ្នាត្រូវចូលរួមលើកកម្ពស់សមភាពយេនឌ័រ របស់ស្ត្រី ពិសេសដើម្បីឲ្យស្ត្រីទាំងអស់ ចងចាំជានិច្ចក្នុងអារម្មណ៍នូវឆន្ទ: មនសិកា និងថែរក្សានូវគោលការណ៍សំខាន់ៗទាំង៣នោះ ឲ្យបានស្ថិតស្ថេរជាអមត: ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
