លោក លីវ សុខុន ប្រធានមន្ទីរព័ត៌មានខេត្តសៀមរាប រួមនឹងថ្នាក់ដឹកនាំ និងមន្ត្រីមួយចំនួន បានទទួលបដិសណ្ឋាកិច្ចគណៈប្រតិភូវិទ្យុសំឡេងវៀតណាម VOV ដឹកនាំដោយ ឯកឧត្តម VU HAI អគ្គនាយករង នៃវិទ្យុសំឡេងវៀតណាម ក្នុងដំណើរទស្សនកិច្ចជាផ្លូវការនៅខេត្តសៀមរាប ក្នុងរយៈពេល២ថ្ងៃគឺនៅថ្ងៃទី០៨ និង ថ្ងៃទី០៩ ខែមីនា ឆ្នាំ២០១៩នេះ បន្ទាប់ពីគណៈប្រតិភូវិទ្យុសំឡេងវៀតណាម បានជួបពិភាក្សាការងារមួយចំនួនជាមួយឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន នៅរាជធានីភ្នំពេញ ។
សូមបញ្ជាក់ថា ក្នុងរយៈពេល នៃដំណើរទស្សនកិច្ចជាផ្លូវការរបស់គណៈប្រតិភូវិទ្យុសំឡេងវៀតណាមនៅក្នុងខេត្តសៀមរាបនាពេលនេះ គឺគណៈប្រតិភូ នឹងទៅទស្សនាប្រាង្គប្រាសាទនានាក្នុងខេត្ត និង ទៅសាកសួរសុខទុក្ខបងប្អូនសហគមន៍ជនជាតិវៀតណាម ដែលកំពុងរស់នៅក្នុងតំបន់បឹងទន្លេសាប ស្ថិតនៅក្នុងសង្កាត់ចុងឃ្នាស ក្រុងសៀមរាប ដែលជូនដំណើរដោយលោក លីវ សុខុន ប្រធានមន្ទីរ រួមជាមួយមន្ត្រីមួយចំនួន នៃមន្ទីរព័ត៌មានខេត្តសៀមរាប ។
គួររំលឹកថា កាលពីថ្ងៃទី០៦ ខែមីនា ឆ្នាំ២០១៩នេះ គណៈប្រតិភូវិទ្យុសំឡេងវៀតណាម បានជួបពិភាក្សាការងារមួយចំនួនជាមួយឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន នៅទីស្ដីការក្រសួងព័ត៌មាន ដែលកិច្ចពិភាក្សានេះ បានផ្ដោតជាសំខាន់លើការបន្តពង្រឹងពង្រីកកិច្ចសហប្រតិបត្តិការការងារផ្សព្វផ្សាយរវាងភាគីទាំងពីរ គឺក្រសួងព័ត៌មាន របស់កម្ពុជា និង វិទ្យុសំឡេងវៀតណាម VOV រួមទាំងគម្រោងចង់បង្កើតឲ្យមានវិទ្យុមិត្តភាពកម្ពុជា វៀតណាម នៅព្រះរាជាណាចក្រកម្ពុជា ដើម្បីធ្វើការផ្សព្វផ្សាយពីវិស័យវប្បធម៌ ទេសចរណ៍ និង វិស័យផ្សេងៗជាច្រើនទៀត ដើម្បីឲ្យប្រជាពលរដ្ឋនៃប្រទេសទាំងពីរ កម្ពុជា វៀតណាម បានយល់ដឹង ៕
អត្ថបទ ៖ លោក លីវ សាន្ត
រូបថត ៖ សហការី
