តាមការឲ្យដឹងពីលោកវរសេនីយ៏ឯក ទេព ពុំសែន អធិការនគរបាលស្រុកពួក បានឲ្យដឹងថា នៅថ្ងៃទី0៨ ខែមីនា ឆ្នាំ២០១៩ មានក្មេងស្រីម្នាក់បានលង់ទឹកស្លាប់ ត្រង់ចំនុចចំការកូរ៉េ ស្ថិតនៅខាងកើតភូមិត្រពាំងស្វាយ ឃុំរើល ស្រុកពួក ខេត្តសៀមរាប ។
លោកបន្តថា ក្មេងរងគ្រោះមានឈ្មោះ ហូន ធីតា ភេទស្រី អាយុ១១ឆ្នាំ រស់នៅភូមិ.ឃុំកើតហេតុខាងលើ ហើយតាមការសាកសួរក្មេងៗដែលទៅលេងទឹកជាមួយក្មេងស្រីរងគ្រោះ បានប្រាប់ថា មុនពេលកើតហេតុគឺក្មេងស្រីរងគ្រោះរួមជាមួយក្មេងៗដទៃទៀត បាននាំគ្នាទៅងូតទឹកស្រះដែលមានជម្រៅជាង ៧ម៉ែតនៅក្បែរផ្ទះ ខណៈពេលនោះមានក្មេងប្រុសម្នាក់ត្រូវជាប្អូនប្រុសក្មេងស្រីរងគ្រោះបានលង់ទឹក ពេលនោះជនរងគ្រោះក៏បានចុះទៅជួយ តែបែរជាត្រូវលង់ស្លាប់ខ្លួនឯងវិញ ចំណែកឯប្អូនប្រុសរបស់គេត្រូវបានប្រជាពលរដ្ឋជួយសង្គ្រោះទាន់។
ក្រោយកើតហេតុ មន្ត្រីប៉ុស្តិ៍នគរបាលរដ្ឋ បានចុះពិនិត្យកន្លែងកើតហេតុ និងសាកសពពុំមានស្លាកស្នាមពាក់ព័ន្ធបទល្មើសទេ ហើយបានប្រគលសពក្មេងស្រីរងគ្រោះឲ្យទៅក្រុមគ្រួសារយកទៅធ្វើបុណ្យតាមប្រពៃណី ៕
ព័ត៌មានជាតិ ថ្មីៗ
អត្ថបទ និងរូបភាព៖ ថាច់ ពិសុទ្ធ
កែសម្រួល ៖ អ៊ុន ណារាជ្យ
