ដោយមានការផ្តួចផ្តើមពីសហគមន៍បារាំងនៅក្នុងខេត្តសៀមរាប សភាពាណិជ្ជកម្ម និងឧស្សាហកម្មបារាំង – កម្ពុជា និងមានការគាំទ្រពីស្ថានទូតបារាំងប្រចាំកម្ពុជាផងនោះ ព្រឹត្តិការណ៍ សបា្តហ៍បារាំង ជាលើកទី២ ត្រូវបានបើកសម្ពោធជាផ្លូវការហើយកាលពីល្ងាច ថ្ងៃទី០៧ ខែមីនា ឆ្នាំ២០១៩ កន្លងទៅថ្មីៗនេះ នៅក្រុងសៀមរាប ដើម្បីផ្សព្វផ្សាយអំពីជំនាញរបស់ក្រុមហ៊ុនបារាំងនៅកម្ពុជា ឱ្យសាធារណជនក្នុងស្រុក និងភ្ញៀវអន្តរជាតិនានាបានស្គាល់ និងបានចាប់ដៃគូធ្វើការវិនិយោគផ្សេងៗ ជាពិសេសធ្វើឱ្យចំណងមិត្តភាពនៃប្រទេសទាំងពីរបារាំង-កម្ពុជា កាន់តែល្អប្រសើរបន្ថែមទៀត។
លោកជំទាវ Eva Nguyen Bin ឯកអគ្គរដ្ឋទូតបារាំងប្រចាំកម្ពុជា បានមានប្រសាសន៍ថា សៀមរាប ជាទឹកដីកំណើតនៃវប្បធម៌ខ្មែរ ហើយសៀមរាប គឺជាគោលដៅមិនអាចរំលងបានឡើយ គឺដោយសារភាពសម្បូរបែបនៃសម្បត្តិបេតិកភណ្ឌ និងលទ្ធភាពរបស់ខេត្តនេះក្នុងការទទួលស្វាគមន៍ពិភពលោកទាំងមូលបានយ៉ាងល្អ ខណៈដែលលោកជំទាវផ្ទាល់ រួមជាមួយសហគមន៍បារាំងនៅខេត្តសៀមរាប ចង់រៀបចំព្រឹត្តិការណ៍នេះជាយូមកហើយ ដើម្បីរួមចំណែកមួយក្នុងការធ្វើឱ្យចំណងមិត្តភាពនៃប្រទេសទាំងពីរកាន់តែល្អប្រសើរឡើង ជាពិសេសបានផ្តល់ឱកាសសហគ្រិនបារាំង បានធ្វើទាក់ទំនងជាមួយសហគ្រិនផ្សេងៗទៀតនៅខេត្តសៀមរាប។
លោកជំទាវ Eva Nguyen Bin បានបញ្ជាក់ទៀតថា ក្នុងព្រឹត្តិការណ៍នេះ មានក្រុមហ៊ុន និងអង្គការបារាំងនានាប្រមាណជាង៧០ ធ្វើការបង្ហាញជូនដល់ពលរដ្ឋខេត្តសៀមរាប និងភ្ញៀវទេសចរ អំពីចំណេះធ្វើរបស់សហគ្រិនបារាំង លាយផ្សំជាមួយចំណេះធ្វើប្រពៃណី និងវត្ថុធាតុដើមរបស់ខ្មែរ ហើយក្រៅពីនេះ មានកម្មវិធីជាច្រើនទៀត នឹងត្រូវបង្ហាញដល់សាធារណជន ដូចជា ស្តីពីវប្បធម៌ ការប្រគួតប្រជែងចម្លាក់សូន្យរូប ស្តង់ភោជនីយដ្ឋានបារាំង ការបញ្ចាំងភាពយន្ត ការសម្តែងរបាំសហសម័យដោយក្រុមសិល្ប:ខ្មែរ និងការដើរបង្ហាញម៉ូដចៃ្នដោយផលិតករក្នុងស្រុកជាដើម។
លោក ង៉ាន់ ភិរុណ អភិបាលរងខេត្តសៀមរាប បានមាន ប្រសាសន៍ថា ប្រទេសកម្ពុជា និងបារាំង គឺជាប្រទេសមិត្តភាពជាមួយគ្នាយូរមកហើយ ហើយការរៀបចំព្រឹត្តិការណ៍ សបា្តហ៍បារាំង ជាលើកទី២នៅក្រុងសៀមរាបនេះ ក៏ជាចំណែកមួយក្នុងការធ្វើឱ្យចំណងមិត្តភាពនៃប្រទេសទាំងពីរកាន់តែល្អប្រសើរផងដែរ ខណៈកន្លងមក រដ្ឋបាលខេត្តសៀមរាប បានចងសម្ព័ន្ធមេត្រីភាពជាមួយខេត្ត-ក្រុងចំនួន០៣ និងតំបន់០១ របស់សាធារណរដ្ឋបារាំង រួមមានក្រុងហ្វុងតែនប្លូ ក្រុងវែកសែ ខេត្តអូដឺសែន និងតំបន់ដកដូញ។
លោក ង៉ាន់ ភិរុណ មានប្រសាសន៍ទៀតថា កន្លងមកនេះ រដ្ឋាភិបាល និងប្រជាជនបារាំង បានជួយយ៉ាងច្រើនដល់ខេត្តសៀមរាប បើគិតចាប់ពីឆ្នាំ១៩៩៣មក ភាគីមិត្តបារាំង បានផ្ដល់ហិរញ្ញប្បទានដល់កម្ពុជាសរុបប្រមាណជាង៦៤១ លានអឺរ៉ូ , គោលនយោបាយផ្តល់ជំនួយអភិវឌ្ឍន៍ផ្លូវការ ODA របស់បារាំង បានផ្តល់ការគាំទ្រដល់ការអភិវឌ្ឍមូលដ្ឋាន សេដ្ឋកិច្ច និងសង្គមរបស់កម្ពុជា ដើម្បីសម្រេចចក្ខុវិស័យក្លាយខ្លួនជាប្រទេសចំណូលមធ្យម កម្រិតខ្ពស់នៅក្នុងឆ្នាំ២០៣០ និងជាប្រទេសចំណូលខ្ពស់នៅឆ្នាំ២០៥០។
សូមបញ្ជាក់ថា ព្រឹត្តិការណ៍«សបា្តហ៍បារាំង»ជាលើកទី២នៅក្រុងសៀមរាបនេះ មានរយៈពេល៤ថ្ងៃចាប់ពីថ្ងៃទី៧ ដល់ថ្ងៃទី១០ ខែមីនា ឆ្នាំ២០១៩ ដែល«សបា្តហ៍បារាំង»នេះ ធ្វើនៅបរិវេណមហាសណ្ឋាគារអង្គរ (Raffles Grand Hôtel d’Angkor) ដែលបើកឱ្យប្រជាពលរដ្ឋកម្ពុជា និងអ្នកទេសចរចូលទស្សនាដោយសេរី ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
