បច្ចុប្បន្ននេះ ការអភិវឌ្ឍវិស័យអគ្គិសនីនៅព្រះរាជាណាចក្រកម្ពុជា មានការរីកចម្រើនគួរឱ្យកត់សម្គាល់ ដោយភូមិនៅទូទាំងប្រទេស បានអូសបណ្តាញអគ្គីសនីសម្រេចបានដល់៩៨ភាគរយហើយ ដែលស្មើនឹងប្រមាណជិត ២លានខ្នងផ្ទះ នេះបើតាមការលើកឡើងឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល ក្នុងពិធីប្រកាសឡើងកាន់តំណែង លោក ឡេង លាត ជាប្រធានមន្ទីររ៉ែ និងថាមពលខេត្តសៀមរាប នៅព្រឹកថ្ងៃទី១៧ ខែឧសភា ឆ្នាំ២០២២។
ឯកឧត្តមរដ្ឋមន្ត្រី បន្ថែមថា ចំពោះចំនួនដែលនៅសល់ ២ភាគរយទៀត គឺជាភូមិដាច់ស្រយាលនៅក្នុងព្រៃ ពុំទាន់មានផ្លូវចូល និងនៅលើកោះ។ល។ បញ្ហានេះ រាជរដ្ឋាភិបាល បានរកវិធីសាស្រ្តផ្សេងៗដូចជាការរៀបចំប្រព័ន្ធបំលែងថាមពលអគ្គិសនី ដោយប្រើពន្លឺព្រះអាទិត្យជាដើម។
តាមការបញ្ជាក់របស់ ឯកឧត្តមរដ្ឋមន្រ្តី សម្រាប់លទ្ធភាព ដែលកម្ពុជាអាចផ្គត់ផ្គត់ថាមពលអគ្គិសនីមានប្រមាណរហូតដល់ ៣៨០០មេហ្គាវ៉ាត់ ក្នុងនោះខេត្តសៀមរាប បានប្រើប្រាស់អស់ប្រមាណជា ១០០មេហ្គាវ៉ាត់។ ប៉ុន្តែដោយសារ វិបត្តកូវីដ-១៩ និងសង្គ្រាមអ៊ុយក្រែន-រុស្ស៊ី បានធ្វើឱ្យវិស័យថាមពលមានការខ្វះខាត ដោយសារប្រភពថាមពលដូចជា ប្រេង និងធ្យូងថ្មឡើងថ្លៃ និងបណ្ដាលឱ្យការប្រើប្រាស់ចរន្តអគ្គិសនីនៅក្នុងប្រទេសកម្ពុជា បានធ្លាក់មកត្រឹមតែជាង២ពាន់ម៉េហ្គាវ៉ាត់ប៉ុណ្ណោះ កត្តានេះ បានធ្វើឱ្យអគ្គិសនីកម្ពុជាខាតធនយ៉ាងច្រើន។
ឯកឧត្តមរដ្ឋមន្រ្តី បញ្ជាក់បន្ថែមថា ទោះពិភពលោកកំពុងជួបវិបត្តិក្ដី សម្រាប់ប្រទេសកម្ពុជាមិនបានឡើងថ្លៃ ឬក៏បញ្ចុះតម្លៃទេ ដោយបានរក្សានៅតម្លៃថាមពលអគ្គិសនីនៅដដែល ដោយសារប្រភពអគ្គីសនីដែលកំពុងផ្គត់ផ្គង់នៅក្នុងប្រទេសកម្ពុជាភាគច្រើន ជាប្រភពដែលប្រើវារីអគ្គីសនី។ ជាក់ស្តែង ប្រទេសកម្ពុជា មានប្រភពវារីអគ្គីសនីចំនួន៧កន្លែង កំពុងតែដំណើរការទាំងអស់ ហើយសម្រាប់ប្រភពដែលទិញមកពីក្រៅ ភាគច្រើនប្រើវារីអគ្គីសនីផងដែរ។
ទន្ទឹមនោះ ឯកឧត្តម ក៏បានជំរុញដល់ប្រធានមន្ទីរ ដែលទើបតែងតាំងថ្មីត្រូវទប់ស្កាត់ និងលុបបំបាត់នូវអាជីវកម្មធនធានរ៉ែគ្មានច្បាប់អនុញ្ញាតឱ្យខាងតែបាន និងត្រូវបន្តសហការជាមួយក្រុមការងារចម្រុះ ដែលដឹកនាំដោយរដ្ឋបាលខេត្ត ក្នុងចុះត្រួតពិនិត្យស្ថានីយប្រេងឥន្ធនៈ ស្ថានីយឧស្ម័នឥន្ធនៈ និងស្ថានីយ៍រួម ប្រេង និងឧស្ម័នឥន្ធនៈ នៅក្នុងភូមិសាស្ត្រខេត្តសៀមរាបឱ្យបានល្អប្រសើរ។ ក្នងនោះដែរ ក៏ត្រូវផ្តល់នូវសេវាសាធារណៈ ឱ្យមានគុណភាព ប្រសិទ្ធភាព អាចជឿទុកចិត្តបាន និងអាចឆ្លើយតបបានទាន់ពេលវេលាទៅនឹងតម្រូវការរបស់ប្រជាពលរដ្ឋ៕
អត្ថបទ និង រូបភាព៖ លោក ជា ស្រស់ និងលោក ឃុត សៅ
កែសម្រួល៖ លោក សេង ផល្លី
