នាព្រឹកថ្ងៃទី១៨ ខែឧសភា ឆ្នាំ២០២២នេះ អាជ្ញាធរ ព្រះសង្ឃ និងប្រជាពលរដ្ឋក្នុងខេត្តសៀមរាប បានចូលរួមប្រារព្ធទិវាជាតិនៃការចងចាំ ២០ឧសភា ស្ថិតនៅក្នុងបរិវេណវត្ដទេពពោធិ៍វង្ស ក្រុងសៀមរាប ដែលជាទីតម្កល់អដ្ឋិធាតុជនរងគ្រោះ ដែលបានស្លាប់នៅក្នុងរបបប្រល័យពូជសាសន៍ ប៉ុល ពត ដើម្បីឧទ្ទិសកុសលជូនដល់ជនរងគ្រោះ វីរជន ដែលបានខិតខំស្វែងរកសន្តិភាពជូនជាតិមាតុភូមិ រហូតដល់មានការអភិវឌ្ឍលើគ្រប់វិស័យដូចបច្ចុប្បន្ន។
ថ្លែងក្នុងពិធីនោះ ឯកឧត្តម អ៊ាន ឃុន ប្រធានក្រុមប្រឹក្សាខេត្ត លើកឡើងថា នាថ្ងៃទី១៨ ខែមីនា ឆ្នាំ១៩៧០ បាននាំមកនូវការបែកបាក់សាមគ្គីភាព ឯកភាពជាតិ និងផ្ទុះឡើងនូវភ្លើងសង្គ្រាមពេញផ្ទៃប្រទេស រហូតដល់ការចូលមកដល់នៃរបបកម្ពុជាប្រជាធិបតេយ្យប្រល័យពូជសាសន៍ ប៉ុល ពត ដែលបានធ្វើឱ្យមាតុភូមិ និងប្រជាជាតិកម្ពុជាទូទាំងប្រទេស រងគ្រោះយ៉ាងអណោចអធម អស់រយៈពេល ៣ឆ្នាំ ៨ខែ ២០ថ្ងៃ ព្រមទាំងការកាប់សម្លាប់ជាតិសាសន៍ឯងជាង៣លាននាក់។ ទុក្ខវេទនាទាំងនោះ បានដក់ជាប់នៅក្នុងអារម្មណ៍ និងស្មារតីប្រជាពលរដ្ឋខ្មែររហូតដល់បច្ចុប្បន្ន ដោយមិនអាចរាប់រៀបអស់។
ឯកឧត្តម អ៊ាន ឃុន គូសបញ្ជាក់ដា ក្រោមម្លប់ដ៏ត្រជាក់នៃអង្គព្រះមហាក្សត្រជាទីសក្ការៈដ៏ខ្ពង់ខ្ពស់បំផុតនៃយើង និងដំបូលនៃសន្តិភាព ដែលទទួលបានពីនយោបាយ ឈ្នះ ឈ្នះ និងការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានខិតខំពង្រឹងសាមគ្គីភាព ឯកភាពផ្ទៃក្នុងជាតិទាំងមូលបានយ៉ាងរឹងមាំ។ ស្របតាមគោលនយោបាយនានារបស់រាជរដ្ឋាភិបាល បាននិងកំពុងជំរុញការអភិវឌ្ឍន៍ប្រទេសឱ្យរីកចម្រើនលើគ្រប់វិស័យ ទាំងពុទ្ធចក្រ និងអាណាចក្រឆ្ពោះទៅកាន់វឌ្ឍនភាព កិត្យានុភាពជាតិ នៅលើឆាកអន្តរជាតិជាបន្តបន្ទាប់ប្រកបដោយមោទកភាព។
ឯកឧត្តម អ៊ាន ឃុន ក៏បានឧទ្ទិសនូវថ្ងៃទិវាជាតិនៃការចងចាំ២០ឧសភានេះ ឲ្យប្រែក្លាយទៅជាការកិច្ចអភិវឌ្ឍន៍សេដ្ឋកិច្ចជាតិ សំដៅទៅរកការកាត់បន្ថយនូវភាពក្រីក្ររបស់ប្រជាជនកម្ពុជា ព្រមទាំងបានអំពាវនាវដល់សមាជិក សមាជិកា និងជនរួមជាតិទូទាំងខេត្តសៀមរាប សូមអញ្ជើញទៅចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ ឱ្យបានគ្រប់ៗគ្នា ដើម្បីផ្ដល់លទ្ធភាពដល់រាជរដ្ឋាភិបាលដឹកនាំដោយសម្ដេចតេជោ ហ៊ុន សែន បន្តការអភិវឌ្ឍប្រទេសជាតិ ក៏ដូចជាខេត្តសៀមរាបយើងឱ្យកាន់តែរីកចម្រើនបន្ថែមទៀត។
មានចំណាប់អារម្មណ៍ក្នុងពិធីនោះ ក្រុមគរុសិស្ស នៃសាលាគរុកោសល្យខេត្ដសៀមរាបបានលើកឡើងថា ទោះបីពួកគេកំពុងរស់នៅក្នុងសម័យកាល ដែលប្រទេសទទួលបានសន្តិភាពហើយក្ដី ប៉ុន្តែទិវាជាតិនៃការចងចាំ ២០ឧសភា នៅតែជាថ្ងៃដែលប្រជាពលរដ្ឋកម្ពុជាគ្រប់ៗរូប ត្រូវចងចាំ។ ពួកគាត់បានអំពាវដល់ប្រជាជនខ្មែរគ្រប់រូប ចូលរួមថែរក្សាការពារសន្តិភាពឱ្យបានគង់វង្ស ព្រោះសន្តិភាពបានផ្តល់ឱកាសគ្រប់យ៉ាងក្នុងការកសាងសង្គមគ្រួសារ សហគមន៍ និងប្រទេសជាតិ ឱ្យកាន់តែរីកចម្រើនទៅមុខទៀត។
អត្ថបទ និង រូបភាព៖ លោក បូ សាវី និងលោក ស៊ាន សុផាត
កែសម្រួល៖ លោក សេង ផល្លី
