លោក នឹម វ៉ាន់សំ ប្រធានគណៈកម្មការរៀបចំការបោះឆ្នោតខេត្តសៀមរាប បានឲ្យដឹងថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ដែលបានប្រកាសបើកជាផ្លូវការកាលពីវេលាម៉ោង៧ព្រឹកថ្ងៃទី០៥ ខែមិថុនា ឆ្នាំ២០២២នេះ ត្រូវបានប្រកាសបិទជាផ្លូវការហើយ កាលពីម៉ោង៣រសៀលថ្ងៃដដែលនេះ បន្ទាប់ពីដំណើរការអស់រយៈពេល៨ម៉ោង ។
លោក នឹម វ៉ាន់សំ បន្តថា អ្នកមានឈ្មោះក្នុងបញ្ជីបោះឆ្នោត បានទៅបោះឆ្នោតចំនួន៤២៧.៩៨៤នាក់ ស្មើនឹង ៧២,៧២ភាគរយ នៃអ្នកមានឈ្មោះក្នុងបញ្ជីបោះឆ្នោតចំនួន៥៨៨.៥៥៣នាក់ ហើយអ្វីៗបានប្រព្រឹត្តិទៅដោយរលូនតាមប្រក្រតីទិន និងនិតិវិធី ដែលគណៈកម្មាធិការជាតិរៀបចំការបោះឆ្នោតបានកំណត់ គិតមកទល់ពេលប្រកាសបិទជាផ្លូវការនោះ ការបោះឆ្នោតបានប្រព្រឹត្តទៅដោយរលូន គ្មានបញ្ហាអ្វីកើតឡើងឡើយ ។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់ ជាការបោះឆ្នោតជ្រើសរើសថ្នាក់ដឹកនាំនៅមូលដ្ឋាន និង ជាការបោះឆ្នោតសកល ដែលបានប្រព្រឹត្តទៅក្នុងរយៈពេល៥ឆ្នាំជាទៀងទាត់ និងតាមពេលវេលាដែលបានកំណត់ ហើយកាលពីអាណត្តិទី១ គឺនៅឆ្នាំ២០០២ ហើយការបោះឆ្នោតជ្រើសរើសក្រុមប្រឹក្សាឃុំ-សង្កាត់ គឺជាការបោះឆ្នោតដ៏មានសារៈសំខាន់ ដែលផ្តល់ឱកាសឱ្យប្រជាពលរដ្ឋបានជ្រើសរើសថ្នាក់ដឹកនាំឃុំ សង្កាត់ ដែលមានសមត្ថភាព មានការយកចិត្តទុកដាក់ក្នុងការបម្រើប្រជាពលរដ្ឋ និងកសាងឃុំ សង្កាត់ឱ្យកាន់តែប្រសើរ និង ជាដំណើរប្រជាធិបតេយ្យនៅកម្ពុជា ដែលប្រជាពលរដ្ឋទូទៅចង់ឃើញដំណើរប្រជាធិបតេយ្យនេះចាក់គ្រឹះកាន់តែរឹងមាំនៅក្នុងប្រទេសកម្ពុជា៕
អត្ថបទ ៖ លោក លីវ សាន្ត
