រដ្ឋបាលខេត្តសៀមរាប នៅព្រឹកថ្ងៃទី១០ ខែមិថុនា ឆ្នាំ២០២២នេះ បានបើកកិច្ចប្រជុំមួយ ដើម្បីពិភាក្សាការងារពាក់ព័ន្ធនឹងការត្រៀមស្បៀង សម្រាប់សង្គ្រោះបន្ទាន់ ដើម្បីឆ្លើយតបក្នុងករណីមានគ្រោះមហន្តរាយធម្មជាតិ ដែលកើតឡើងនៅក្នុងខេត្តសៀមរាប។
លោក សុខ ថុល នាយករដ្ឋបាល សាលាខេត្ត ក្នុងនាមជាប្រធានអង្គប្រជុំបានលើកឡើងថា កិច្ចប្រជុំនេះ ធ្វើឡើងដើម្បីរិះរកគ្រប់វិធីធ្វើយ៉ាងណា ដើម្បីជំរុញឲ្យការធានាបានសន្តិសុខស្បៀងនៅទូទាំងខេត្ត បើទោះក្នុងកាល:ទេស:ដែលជួបនូវគ្រោះធម្មជាតិផ្សេងៗក្តី។ លោក សុខ ថុល ក៏បានជំរុញផងដែរ ដល់អាជ្ញាធរក្រុង ស្រុក ត្រូវចុះពិនិត្យតាមដាន និងរាយការណ៍ជាបន្ទាន់ ចំពោះ សកម្មភាព ឬហេតុការណ៍ដែលកើតមានពាក់ព័ន្ធនឹងគ្រោះមហន្តរាយនានា នៅក្នុងមូលដ្ឋានរបស់ខ្លួន មកជូនថ្នាក់ដឹកនាំខេត្ត ដើម្បីលោកបានជ្រាប ក្នុងការពិនិត្យវាយតម្លៃ និងមានវិធានការសម្រេចដោះស្រាយ។
លោកនាយករដ្ឋបាល បន្តថា ដោយសារមានភ្លៀងធ្លាក់ជាបន្តបន្ទាប់ បានធ្វើឲ្យដំណាំស្រូវ និងដំណាំរួមផ្សំរបស់ប្រជាពលរដ្ឋទទួលរងនូវផលប៉ះពាល់ និងខូចខាត ដែលស្ថានភាពនេះ បានធ្វើឲ្យមានការព្រួយបារម្ភពីកង្វះខាតស្បៀង និងអសកម្មការងារបង្កបង្កើនផល នៅតាមតំបន់ និងមូលដ្ឋានមួយចំនួន។
លោក បន្ថែមទៀតថា អាជ្ញាធរខេត្ត និងមន្ទីរកសិកម្មខេត្ត កំពុងផ្តោតយកចិត្តទុកគិតគូរ និងរៀបចំស្នើសុំពូជស្រូវ និងបន្លែផ្សេងៗ ពីក្រសួងកសិកម្ម និងក្រសួងពាក់ព័ន្ធ ដើម្បីបានពូជស្រូវ និងបន្លែផ្សេងៗទាំងនោះ យកមកធ្វើការចែកជូនដល់បងប្អូនប្រជាពលរដ្ឋក្នុងខេត្ត។
យោងតាមរបាយការណ៍របស់មន្ទីរ កសិកម្ម រុក្ខាប្រមាញ់ និងនេសាទ ខេត្តសៀមរាប កាលពីថ្ងៃទី០៩ ខែមិថុនា ឆ្នាំ២០២២ បានបង្ហាញថា នៅក្នុងអំឡុងខែឧសភា ឆ្នាំ២០២២កន្លងទៅនេះ ជំនន់ទឹកភ្លៀងដើមរដូវនេះ បានបង្កឲ្យប៉ះពាល់ដល់ដំណាំស្រូវ ១,២១៦ហិកតា លើស្រុកចំនួន៣ រួមមាន ស្រុកអង្គរជុំ ស្រុកពួក និងស្រុកប្រាសាទបាគង។ ជាមួយនឹងផលប៉ះពាល់នេះ ក៏បានធ្វើឲ្យដំណាំស្រូវរបស់ប្រជាពលរដ្ឋចំនួន ៩០៥ហិកតា ក្នុងស្រុកពួក និងស្រុកអង្គរជុំ បានរងនូវការខូចខាតផងដែរ។ ដោយឡែកដំណាំរួមផ្សំរបស់ប្រជាពលរដ្ឋនៅស្រុកអង្គរធំ ប្រមាណជា ២១ហិកតា ក៏ទទួលរងនូវការខូចខាតទាំងស្រុង។
របាយការណ៍ដដែលនេះ ក៏បានបង្ហាញដែរថា បើទោះយ៉ាងនេះក្តី ប្រជាកសិករ ក៏បាន នឹងកំពុងធ្វើការដាំដុះឡើងវិញជាបណ្តើរៗ នៅពេលដែលមេឃចាប់ផ្តើមរាំងភ្លៀង៕
អត្ថបទ និងរូបភាព: លោកជា ស្រស់ កែសម្រួលដោយ លីវ សុខុន!!!
