បន្ទាប់ពីសេចក្ដីណែនាំស្ដីពីការជំរុញផលិតកម្មដំណាំស្រូវរដូវវស្សាឆ្នាំ២០២២ របស់ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១០ ខែមិថុនា ឆ្នាំ២០២២នេះ មន្ត្រីជាន់ខ្ពស់ និងក្រុមការងារក្រសួងកសិកម្ម រុក្ខាប្រមាញ់ និងនេសាទ បានចុះពិនិត្យការបង្កបង្កើនផលដំណាំស្រូវ និងដំណាំរួមផ្សំនៅស្រុកចំនួន ៤ក្នុងខេត្តសៀមរាប រួមមាន ស្រុកពួក ស្រុកអង្គរជុំ ស្រុកស្រីស្នំ និងស្រុកក្រឡាញ់ ។
តាមការចុះពិនិត្យនេះ ឯកឧត្តម ណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ សង្កេតឃើញថា ទឹកបានចាប់ផ្តើមស្រកទៅវិញ ហើយប្រជាកសិករបានកំពុងភ្ជួរ រាស់ ព្រួសស្រូវឡើងវិញជាបណ្តើរៗ និងស្ទូងជួសនៅក្នុងស្រែដែលខូចខាតកន្លងមកផងដែរ។
តាមការសន្និដ្ឋាន របស់ឯកឧត្តម និងក្រុមការងារជំនាញ រំពឹងថានៅរង្វង់សប្តាហ៍ក្រោយ ល្បឿននៃការដាំដុះដំណាំស្រូវក្នុងខេត្តសៀមរាប នឹងកើនឡើងដល់៣០ភាគរយ នៃផែនការ ១៨៩,៧៣០ហិកតា ប្រសិនបើភ្លៀវមិនបន្តធ្លាក់មកទៀតនោះទេ។
ឯកឧត្តម បញ្ជាក់ថា មូលហេតុដែលបង្កឱ្យការដាំដុះដំណាំស្រូវមានការយឺតយ៉ាវ ដោយសារឥទ្ធិពលនៃការប្រែប្រួលអាកាសធាតុ នៅដើមឆ្នាំ២០២២នេះ ក្នុងនោះខេត្តសៀមរាបទទួលបរិមាណទឹកភ្លៀងច្រើនខុសពីបណ្តាឆ្នាំមុនៗ គឺចាប់តាំងពីដើមខែកុម្ភៈ និងបន្តធ្លាក់យ៉ាងច្រើនរហូតដល់បច្ចុប្បន្ន។ បរិមាណទឹកភ្លៀងនេះ បានជន់លិចវាលស្រែជាច្រើនជាពិសេសស្រែទំនាប ដែលធ្វើឱ្យកសិករមិនអាចភ្ជួររាស់ និងដាំដុះកើត។
ទន្ទឹមនោះ ឯកឧត្តមរដ្ឋលេខាធិការ ក៏បានអំពាវនាវ ដល់ប្រជាកសិករសូមប្រញ៉ាប់ប្រញាល់ភ្ជួររាស់ និងដាំដុះស្រូវសម្រាប់ដីដែលមានសណ្ឋានដីខ្ពស់ ព្រោះឆ្នាំនេះមិនមានកូនរដូវប្រាំងទេ និងត្រូវត្រៀមបម្រុងគ្រាប់ពូជស្រូវសម្រាប់ដាំដុះសារឡើងវិញ ក្នុងករណីដំណាំស្រូវដែលដាំដុះរួចរងការខូចខាតដោយជំនន់ទឹកភ្លៀង។
សូមជម្រាបថា យោងតាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទខេត្តគិតត្រឹមថ្ងៃទី១៦ ខែឧសភា ឆ្នាំ ២០២២ កម្ពស់ទឹកភ្លៀងក្នុងខេត្តសៀមរាបបានឡើងដល់ ៤២៥ម.ម ដែលឆ្នាំកន្លងទៅមានតែ ១២២ម.ម ពោលគឺច្រើនជាងឆ្នាំមុនជិតបួនដង។ ក្នុងនោះ ជំនន់ទឹកភ្លៀងដើមរដូវវស្សាឆ្នាំ២០២២នេះ បានបង្កឱ្យប៉ះពាល់ដល់ដំណាំស្រូវជាង១,២០០ហិកតា ដែលស្ថិតក្នុងស្រុកចំនួន៣ រូមមាន ស្រុកអង្គរជុំ ស្រុកពួក និងស្រុកប្រាសាទបាគង។ ក្នុងនោះ ដំណាំស្រូវរបស់ប្រជាកសិករចំនួន ៩០៥ហិកតា ស្ថិតក្នុងស្រុកពួក និងស្រុកអង្គរជុំ បានរងការខូចខាត។
អត្ថបទ និង រូបភាព៖ លោក យូ វង្ស
កែសម្រួល៖ លោក សេង ផល្លី
