លោក តាំង គ្រុយ ជាពលរដ្ឋរស់នៅភូមិលាងដៃ ឃុំលាងដៃ ស្រុកអង្គរធំ ខេត្ដសៀមរាប បានឱ្យដឹងនៅថ្ងៃទី១៣ ខែមិថុនា ឆ្នាំ២០២២នេះថា ដោយមានសំណើពីអាជ្ញាធរជាតិអប្សរា និងក្នុងបំណងរួមចំណែកធ្វើអ្វីសម្រាប់សង្គមជាតិផង កាលពីឆ្នាំ២០១២ លោកបានសម្រេចផ្តល់ដីផ្ទាល់ខ្លួនរបស់លោក ដែលកំពុងអាស្រ័យផល ឱ្យអាជ្ញាធរស្ដារប្រឡាយបុរាណ ក៏ដូចជាបង្កើតប្រភពទឹកខ្វាត់ខ្វែងនៅតំបន់នោះ។ លោករំឭកថា៖« ខ្ញុំគិតថាទីតាំងនេះ មិនមែនជារបស់បុគ្គលផ្តាច់មុខទេ ហើយដីយើងមានច្រើនដែរ គួរលះបង់ខ្លះដើម្បីប្រយោជន៍រួម ដើម្បីប្រទេសជាតិ និងសម្រាប់ដូនតាយើង ដែលខំកសាងប្រាសាទមក ព្រោះតាមការឮពីចាស់ទុំមកថា អង្គរវត្តយើងគឺពឹងអាស្រ័យលើទឹក គ្រឹះប្រាសាទអង្គរវត្ត គឺដីខ្សាច់ ដូច្នេះបើគ្មានទឹកច្បាស់ជារលំជាមិនខាន»។
លោកបន្ដថា នៅឆ្នាំ២០១២ ពេលដែលអាជ្ញាធរជាតិអប្សរាចាប់ផ្តើមស្ដារប្រឡាយឡើងវិញ ដោយប្រឡាយនេះមានតួនាទីទទួលទឹកពីភ្នំគូលែន បំបែកទៅប៉ែកខាងលិច គឺស្ទឹងពួក ស្ទឹងព្រះស្រុក និងហូរចាក់ទៅទន្លេសាប។ ទឹកនេះក៏បានបញ្ចូលទៅបារាយណ៍ខាងជើង បារាយណ៍ខាងលិច កសិន្ធុអង្គរវត្ត និងកសិន្ធុអង្គរធំ ដែលប្រឡាយនេះមានប្រវែងជិត ៥០គីឡូម៉ែត្រ ហើយត្រូវបានសង់ទ្វារទឹកថ្មី ជំនួសស្ពានបុរាណ ដែលស្ថិតនៅខាងលើទ្វារទឹកតាសោម។ ការស្ដារនេះ គឺចាប់ពីផ្នែកខាងជើង កាត់ក្បាលដីលោកកំពុងអាស្រ័យផល រហូតដល់ចុងដីនៅផ្នែកខាងត្បូង។ កាលណោះលោកមិនរំពឹងថា នឹងមានទឹកហូរហៀរដូចពេលនេះទេ ព្រោះថាកន្លងមកទីនោះ ជាដីគោក ដែលលោកដាំស្វាយចន្ទីពេញផ្ទៃដី។
បុរសរូបនេះ បានប្រាប់ទៀតថា ក្នុងនាមជាកសិករមួយរូប លោកពិតជារីករាយណាស់ ពេលឃើញទឹកសម្បូរបែបនេះ ដ្បិតកសិកម្ម គឺពឹងលើទឹក។ ក្រោយមានប្រភពទឹកនៅកៀក លោកក៏បានចាប់ផ្តើមកែប្រែចម្ការរបស់លោក ដោយប្ដូរពីការដាំស្វាយចន្ទីរមកដាំដំណាំហូបផ្លែផ្សេងៗ តែក្នុងនោះច្រើនជាងគេ គឺដំណាំដូង ដោយបច្ចុប្បន្នលោកដាំដូងបានជាង ២ពាន់ដើម និងមានគម្រោងដាំរហូតដល់ ១ម៉ឺនដើមនាពេលខាងមុខ។
ព័ត៌មានជាតិ ថ្មីៗ
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
