ក្រសួងអភិវឌ្ឍជនបទ នៅថ្ងៃទី១៤ ខែមិថុនា ឆ្នាំ២០២២នេះ បានរៀបចំសិក្ខាសាលាស្ដីពីការបញ្ជា្របគោលនយោបាយជនជាតិដើមភាគតិចរបស់ IFAD និងរាជរដ្ឋាភិបាល និងវគ្គបណ្តុះបណ្តាលគោលនយោបាយ របស់ IFAD ស្តីពីការប្រឆាំងនឹងការបៀតបៀន កេងប្រវ័ញ្ច រំលោភបំពានផ្លូវភេទរបស់គម្រោងគាំទ្រនិរន្តរភាព ហេដ្ឋារចនាសម្ព័ន្ធជនបទ ដើម្បីទីផ្សារកសិករ និងពាណិជ្ជូបនីយកម្មកសិកម្ម។ សិក្ខាសាលានេះត្រូវបានរៀបចំឡើងនៅសណ្ឋាគារអង្គរប៉ារ៉ាឌី ខេត្តសៀមរាប មានរយៈពេល ២ថ្ងៃគឺថ្ងៃទី១៤និងទី១៥ ខែមិថុនា ឆ្នាំ២០២២ ក្រោមអធិបតីភាពឯកឧត្តម ភួង សោភា រដ្ឋលេខាធិការក្រសួងអភិវឌ្ឍជនបទ និងជាអ្នកសម្របសម្រួលគម្រោង ដោយមានការចូលរួមពីសំនាក់ថ្នាក់ដឹកនាំក្រសួងពាក់ព័ន្ឋ ប្រធានកម្មវិធី ASPIRE លោក លោកស្រីថ្នាក់ដឹកនាំមន្ទីរ រួមនឹងអង្គការដៃគូជាច្រើនរូបទៀត។
ឯកឧត្តម ភួង សោភា មានប្រសាសន៍ថា នៅក្នុងបរិបទសន្តិភាពជាង ២០ឆ្នាំចុងក្រោយនេះ កម្ពុជាបានយកចិត្តទុកដាក់ និងខិតខំយ៉ាងខ្លាំងក្លា ដើម្បីអភិវឌ្ឍន៍ប្រទេសជាតិ ជាមួយគ្នានេះរាជរដ្ឋាភិបាលបានដាក់ចេញនូវចក្ខុវិស័យ “កម្ពុជានឹងក្លាយជាប្រទេសមានចំណូលមធ្យមកម្រិតខ្ពស់នៅក្នុងឆ្នាំ ២០៣០ នឹងក្លាយជាប្រទេសអភិវឌ្ឍន៍នៅក្នុងឆ្នាំ ២០៥០” ជាមួយគ្នានេះរាជរដ្ឋាភិបាលកម្ពុជាក៏បានគាំទ្រ និងយកចិត្តទុកដាក់លើជនជាតិដើម ភាគតិចតាមរយៈដាក់ចេញនូលគោលនយោបាយ បង្កើតយន្តការនានា សម្រាប់ការអភិវឌ្ឍ និងអភិរក្សជនជាតិដើមភាគតិច។ ដូចគ្នានេះដែរ រាជរដ្ឋាភិបាលក៍បានគិតគួរដល់កិច្ចការពារប្រឆាំងនឹងការការបៀតបៀន និងការកេងប្រវ័ញ្ច ការបំពានផ្លូវភេទ តាមរយៈការលើកកម្ពស់សមភាពយេនឌ័រ ការពារសិទ្ធិស្ត្រីនិងកុមារី និងមានការប្ដេជ្ញាខ្ពស់ប្រកបដោយប្រសិទ្ធិភាពនិងបរិយាប័ន្នផងដែរ។
ព័ត៌មានជាតិ ថ្មីៗ
ឯកឧត្តមបន្តថា បច្ចុប្បន្ន IFAD បានសហការជាមួយក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ដើម្បីអនុវត្តគម្រោង ផ្តោតលើការអភិវឌ្ឍហេដ្ឋារចនាសម្ព័ន្ធ ជនបទ បណ្ដុះបណ្តាលជំនាញ បច្ចេកវិទ្យា និងសហគ្រិនភាព។ គម្រោង “គាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករ និងពាណិជ្ជូបនីយកម្ម (SAAMBAT) មានបំណងបង្កើននិរន្តរភាពនូវផលិតកម្មរបស់គ្រួសារ យុវជន ស្ត្រី និងក្រុមងាយរងគ្រោះដទៃទៀតនៅតាមតំបន់ជនបទព្រមទាំងគាំទ្រដល់ សហគ្រាស និងសេដ្ឋកិច្ចជនបទ សម្រាប់ការងារនិងបង្កើតប្រាក់ចំណូល តាមរយៈការធ្វើអន្តរាគមន៍វិនិយោគសំខាន់ៗ នៅក្នុងហេដ្ឋារចនាសម្ព័ន្ធជនបទ ដែលមាននិរន្តរភាពនិងភាពស៊ាំនៃអាកាសធាតុ រួមមានកែលម្អផ្លូវជនបទ កែលម្អផ្សារជនបទ កសាងកន្លែងប្រមូលផ្ដុំកសិផល និងកែលម្អកំពង់ដរសម្រាប់កសិករដឹកជញ្ជូនផលិតផលកសិផល ដែលនឹង អនុវត្តដោយក្រសួងអភិវឌ្ឍន៍ជនបទ ព្រមទាំង បណ្តុះបណ្តាលជំនាញ និងភាពជាសហគ្រិនសម្រាប់ យុវជន និងគ្រួសារក្រីក្រនិងងាយរងគ្រោះ និងបង្កើនការប្រើប្រាស់បច្ចេកវិទ្យាឌីជីថល នៅក្នុងសេដ្ឋកិច្ចជនបទ ដែលនឹងអនុវត្តដោយក្រសួងសេដ្ឋកិច្ច និងហិរញ្ញវត្ថុ។
ឯកឧត្តម រដ្ឋលេខាធិការ ក៏បានស្នើដល់មន្ត្រីអនុវត្តគម្រោង និងអ្នកពាក់ព័ន្ធនឹងគម្រោង ចាំបាច់ត្រូវយល់ដឹងពី គោលនយោបាយជនជាតិដើមភាគតិច និងគោលការណ៍ស្តីពី ការប្រឆាំងនឹងការបៀតបៀន កេងប្រវ័ញ្ច រំលោភបំពានផ្លូវភេទរបស់មូលនិធិអន្តរជាតិអភិវឌ្ឍន៍កសិកម្ម (IFAD) ដើម្បីការធានានូវការគិតគូនិងយកចិត្តទុកដាក់សុវត្ថិភាព និងភាពថ្លៃថ្នូរដល់ប្រជាពលរដ្ឋ ជាពិសេសបងប្អូនជនជាតិដើមភាគតិច និងសុវត្ថិភាពនៅនឹងកន្លែងការងារ ដោយមិនមានការបៀតបៀន និងមិនមានការកេងប្រវ័ញ្ច រួមទាំងបំពានផ្លូវភេទ ជារួមគឺជាគោលការណ៍ប្ដេជ្ញាចិត្ត សម្រាប់សេចក្ដីថ្លៃថ្នូរដោយវិជ្ជាវីជៈ និងមានការគោរពគ្នាទៅវិញទៅ មកដល់មនុស្សគ្រប់រូប។
សូមជំរាបថា គម្រោង SAAMBAT ទទួលការអនុវត្តគម្រោងចាប់ ឆ្នាំ២០១៩ ដល់ឆ្នាំ២០២៥ លើកញ្ចប់ថវិកាប្រមាណជាង ១៦០លានដុល្លារ ក្រោមការគាំទ្រពី មូលនិធិអន្តរជាតិ សម្រាប់ការអភិវឌ្ឍកសិកម្ម (IFAD) ធនាគារវិនិយោគអឺរ៉ុប (EIB) និងសហគមន៍អឺរ៉ុប (EU) សម្រាប់អនុវត្តគម្រោង ក្នុងទិសដៅ “ដើម្បី កាត់បន្ថយភាពក្រីក្រនិងពង្រឹងសន្តិសុខស្បៀង”។ គម្រោងនេះក៍ទទទួលបានការ សហការយ៉ាងជិតស្និទ្ធជាមួយគម្រោង “លើកកម្ពស់វិស័យ កសិកម្មនិងភាពស៊ាំនៃអាកាសធាតុ(ASPIRE) និងគម្រោងបង្កើនទីផ្សាររួមសម្រាប់សហគ្រាសខ្នាតតូច (AIMS) ដែលអនុវត្តដោយក្រសួងកសិកម្ម រុក្ខាប្រម៉ាញ់ និងនេសាទ នៅក្នុងតំបន់ប៉ូលសេដ្ឋកិច្ចចំនួន៥០ នៅក្នុងខេត្តចំនួន១២ គឺខេត្តកណ្តាល ស្វាយរៀង កំពង់ចាម កំពង់ធំ ព្រះវិហារ ស្ទឹងត្រែង បន្ទាយមានជ័យ បាត់ដំបង ពោធិសាត់ កំពង់ឆ្នាំង តាកែវ និងខេត្តកំពត៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
