ថ្លែងក្នុងពិធីបិទការប្រឡងអំណានប្រចាំឆ្នាំ២០២២ របស់ប្អូនៗសិស្សានុសិស្សនៃសាលាវេសហ្គេតអន្តរជាតិខេត្តសៀមរាប កាលពីល្ងាចថ្ងៃទី០៣ ខែកក្កដា ឆ្នាំ២០២២នេះ លោក រ័ត្ន រស្មី នាយកសាលាវេសហ្គេតអន្តរជាតិខេត្តសៀមរាប មានប្រសាសន៍ថា ដោយមើលឃើញនូវតម្រូវការជាក់ស្តែងដែលសិស្សានុសិស្ស ត្រូវសិក្សាទ្រឹស្តីភ្ជាប់ជាមួយនឹងការអនុវត្តន៍ជាក់ស្តែងនោះ ទើបគណៈគ្រប់គ្រងសាលាបានសម្រេចផ្តួចផ្តើមគំនិតជាមួយលោកគ្រូ អ្នកគ្រូ រៀបចំការប្រឡងអំណាន ប្រចាំឆ្នាំ២០២២ ដែលមានគណៈមេប្រយោគទាំងខ្មែរ និងបរទេស ដើម្បីឲ្យស្របតាមទិសដៅរបស់ក្រសួងអប់រំ យុវជន និងកីឡាក្នុងការផ្តល់ឱកាសឲ្យសិស្សានុសិស្ស ចេះស្រឡាញ់ និងយកចិត្តទុកដាក់ក្នុងការអាន សរសេរឲ្យបានកាន់តែច្រើន ដូចជាសុភាសិតមួយបានពោលថា អានច្រើន ចេះច្រើន ឬ អានមួយជីវិតក៏មិនចេះចប់។
លោកនាយកសាលា បានចាត់ទុក ការស្តាប់ គឺជាឫសគល់ដ៏សំខាន់នៃការរៀនភាសា ដូច្នេះមាតាបិតាត្រូវចេះអានឱ្យកូនស្តាប់នៅពេលដែលកូននៅតូច មិនទាន់ចេះអានដោយខ្លួនឯង។ ក្នុងនោះការអានរឿងព្រេងនិទានឱ្យកូនស្តាប់បានជួយលើកកម្ពស់ប្រសិទ្ធភាពក្នុងការស្តាប់ទៀតផង។ ហើយចំពោះការប្រឡងអំណាន គឺដើម្បីលើកកម្ពស់គុណភាពអប់រំនៅកម្ពុជា និងដើម្បីលើកកម្ពស់ស្តង់ដាវីជ្ជាជីវៈគ្រូបង្រៀន។ បន្ថែមពីលើការប្រឡងនេះ គណៈគ្រប់គ្រងសាលាក៍មានយុទ្ឋសាស្ត្រចូលរួមអភិវឌ្ឍធនធានមនុស្សរយៈពេលវែង និងមានគោលដៅបណ្តុះបណ្តាលធនធានមនុស្សប្រកបដោយគុណភាព គុណតម្លៃ ដើម្បីឆ្លើយតបបានទៅនឹងទីផ្សារការងារ សំដៅរួមចំណែកអភិវឌ្ឍសង្គម និងសេដ្ឋកិច្ច ស្របតាមយុទ្ឋសាស្ត្ររបស់រាជរដ្ឋាភិបាលកម្ពុជា។ រាជរដ្ឋាភិបាលកម្ពុជា បានយកចិត្តទុកដាក់យ៉ាងខ្លាំងក្នុងការបន្តកសាង និងអភិវឌ្ឍធនធានមនុស្សលើគ្រប់ផ្នែកប្រកបដោយគុណភាព និងមានគុណធម៌ល្អប្រពៃ ដែលឆ្លើយតបទៅនឹងសំណូមពរនៃការ អភិវឌ្ឍន៍សង្គម សេដ្ឋកិច្ច ដើម្បីកសាងកម្ពុជាឱ្យក្លាយជាសង្គមរីកចំរើន ជឿនលឿន លើសពីនេះក៍បានគិតគូរផងដែរ គឺការអប់រំសម្រាប់ទាំងអស់គ្នា ដូច្នេះការអភិវឌ្ឍន៍ធនធានមនុស្ស ប្រកបដោយគុណភាព សមត្ថភាព និងគុណធម៌ គឺជាកត្តាគន្លឹះ សម្រាប់ទ្រទ្រង់កំណើនសេដ្ឋកិច្ច និងភាពប្រកួតប្រជែងរបស់ប្រទេស ទាំងក្នុងពេលចំពោះមុខ ទាំងសម្រាប់អនាគត។
សូំជម្រាបថា ការប្រឡងអំណានប្រចាំឆ្នាំ២០២២ រៀបចំកម្មវិធីប្រឡងស្ទាបស្ទង់សមត្ថភាពសិស្សពីថ្នាក់ទី១ ដល់ថ្នាក់ទី១២ លើវិញ្ញាសារសរសេរ វិញ្ញាសារអំណាន ស្មូតកំណាព្យ និងការតែងនិពន្ធ និងការឡើងថ្លែងជាសាធារណៈនៃឃ្លាប្រយោគ ខ្លឹមសារ នៃការនិពន្ធពីគំនិតផ្ទាល់ខ្លួនរបស់ប្អូនៗ សិស្សានុសិស្សផងដែរ។ ការប្រឡងនេះធ្វើឡើងជា ៣ភាសាគឺ ភាសាខ្មែរ អង់គ្លេស និងភាសាចិន។ ក្នុងនោះជារៀងរាល់ឆ្នាំគណៈគ្រប់គ្រងសាលាវេសហ្គេតអន្តរជាតិ ខេត្តសៀមរាប តែងតែសហការពិគ្រោះជាមួយសាស្ត្រចារ្យ លោកគ្រូអ្នកគ្រូ ដើម្បីជ្រើសរើស និងរៀបចំវិញ្ញាសារប្រឡងឱ្យស្របទៅនឹងកម្រិតថ្នាក់ ក្មួយៗប្អូនៗ ដែលកំពុងសិក្សានៅទីនេះ ក្នុងបំណងដើម្បីបណ្ដុះទម្លាប់នៃការអាន ជំរុញវប្បធម៌អាន លើកកម្ពស់សមត្ថភាពអាន លើកកម្ពស់ការសូត្រកំណាព្យ និងការតែងនិពន្ធ សំដៅរួមចំណែកការពារ និងពង្រឹងវប្បធម៌ អក្សសាស្ត្រ ស្របជាមួយនឹងការជំរុញបន្ថែមលើការសិក្សាភាសាចិន និងអង់គ្លេស ដើម្បីឱ្យសិស្សានុសិស្សដើរទាន់ទៅនឹង ការរីកចម្រើនរបស់ពិភពលោក និងដើម្បីរួមគ្នាសម្រេចគោលដៅអភិវឌ្ឍប្រកបដោយចីរភាព ដែលធានាគុណភាពអប់រំប្រកបដោយសមធម៌ បរិយាបន្ន និងលើកកម្ពស់ការសិក្សាពេញមួយជីវិតសម្រាប់ទាំងអស់គ្នា៕
ព័ត៌មានជាតិ ថ្មីៗ
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
