ថ្លែងក្នុងកិច្ចប្រជុំអនុគណៈកម្មការត្រួតពិនិត្យផលិតផលថ្នាំជក់ នៅខេត្ដសៀមរាប នាព្រឹកថ្ងៃទី១៩ ខែកក្កដា ឆ្នាំ២០២២នេះ លោក ពិន ប្រាកដ អភិបាលរងខេត្ដសៀមរាប បានសម្ដែងការព្រួយបារម្ភពីផលប៉ះពាល់ដល់សុខភាពទៅលើយុវជន ដោយសារការលក់បារី និងជក់បារី នៅតាមទីសាធារណៈ នៅក្នុងខេត្តមួយនេះ ហាក់មិនមានការថមថយទាល់តែសោះ ដែលទាមទារឲ្យអ្នកពាក់ព័ន្ធត្រូវបង្កើនការផ្សព្វផ្សាយ និងទប់ស្កាត់នូវបញ្ហានេះបន្ថែមទៀត។
លោក ពិន ប្រាកដ បានបញ្ជាក់ថា តាមការពិនិត្យលើការអនុវត្ដច្បាប់ស្តីពីការត្រួតពិនិត្យផលិតផលឆ្នាំជក់ ឆ្នាំ២០១៥ និងអនុក្រឹត្យស្តីពីការរៀបចំ និងការប្រព្រឹត្តទៅរបស់គណៈកម្មាធិការត្រួតពិនិត្យផលិតផលថ្នាំជក់ ឆ្នាំ២០១៧ គឺនៅមានភាពខ្វះចន្លោះ និងជួបប្រទះនូវបញ្ហាជាច្រើន ដូចជាមានជនឆ្លៀតឱកាសផ្សព្វផ្សាយ និងដាក់តាំងលក់ផលិតផលថ្នាំជក់ ដោយពុំបានគោរពតាមច្បាប់ជាធរមាន បើទោះជាស្ថិតនៅក្នុងបរិបទកូវីដ-១៩ក៍ដោយ។ ការផ្សព្វផ្សាយផលិតថ្នាំជក់ពិតណាស់ វាកាន់តែគ្រោះថ្នាក់ និងងាយស្រួលក្នុងការឆ្លងមេរោគកូវីដ-១៩ ដោយសារតែអ្នកជក់បានដោះម៉ាស់ចេញ។
លោកអភិបាលរងខេត្ត បានបន្ថែមថា បច្ចុប្បន្នក្រុមហ៊ុនថ្នាំជក់បានដាក់ចេញនូវយុទ្ធសាស្រ្តលក់ថ្មីៗ សំបូរបែប ដើម្បីទាក់ទាញឱ្យមានអ្នកជក់បារី ដូចជាការទិញកញ្ចប់បារីពីអ្នកជក់វិញជាដើម។ ជាងនេះទៅទៀតក្រុមហ៊ុនបារីមួយចំនួន បានបង្កើនសកម្មភាពលើកតម្កើងមុខមាត់របស់ខ្លួន តាមរយៈកម្មវិធីសម្បុរសធម៌ ជួយសង្គមក្នុងពេលមានវិបត្តិ ប៉ុន្ដែនៅក្នុងកម្មវិធីនោះពួកគេបានឆ្លៀតឱកាសឧបត្ថម្ភជាផលិតផលបារីទៀតផង។ ជាមួយគ្នានោះ បញ្ហាបារីអេឡិចត្រូនិក និងផលិតផល អេចឈ៍ ធី ភី ដែលជាផលិតផលថ្នាំជក់ប្រភេទថ្មីដ៏មានគ្រោះថ្នាក់ ហើយកម្ពុជាបានហាមឃាត់នូវរាល់ការចែកចាយ និងប្រើប្រាស់ក្នុងចំណោមយុវជនគួរឱ្យបារម្ភ មិនថានៅតាមទីសាធារណៈ ឬដោយលួចលាក់ក្នុងមួយរយៈក្រោយនេះ។ ដូចនេះស្នើរឱ្យអ្នកពាក់ព័ន្ធ ត្រូវចូលរួមទប់ស្កាត់ការប្រើប្រាស់ថ្នាំជក់ និងការជក់បារីអេឡិចត្រូនិក ឱ្យមានប្រសិទ្ធិភាព ដើម្បីកាត់បន្ថយផលប៉ះពាល់ដល់សុខភាពខ្លួនឯង រួមនឹងសុខភាពសាធារណៈជនផងដែរ។
បើតាមលោក មុំ គង់ នាយកប្រតិបត្ដិអង្គការចលនាដើម្បីសុខភាពកម្ពុជា បានបង្ហាញថា បច្ចុប្បន្នការកើនឡើងនៃកាជក់បារី គឺដោយសារមានការផ្សព្វផ្សាយ ពីផលិតផលថ្នាំជក់ និងការដាក់តាំងបង្ហាញកញ្ចប់ផលិផលបារី នៅតាមទីសាធារណៈខុសច្បាប់មានការកើនឡើង ដោយនៅលើកញ្ចាប់បារីគ្មានរូបភាព និងសារព្រមាន។ ចំពោះការប្រើប្រាស់ផលិតផលថ្នាំជក់ បានបង្កគ្រោះថ្នាក់យ៉ាងធ្ងន់ធ្ងរដល់សុខភាពប្រជាពលរដ្ឋ សេដ្ឋកិច្ច និងបរិស្ថាន។ ជាក់ស្ដែងការជក់បារី បានធ្វើឱ្យប្រជាជនកម្ពុជា ប្រមាណ ១៥,០០០នាក់ បានស្លាប់ក្នុងមួយឆ្នាំ និង ៤០នាក់ក្នុងមួយថ្ងៃ ហើយបានបាត់បង់ថវិកាប្រមាណ ២,៧ពាន់លានរៀលក្នុងមួយឆ្នាំ។ ក្នុងនោះក្រៅពីការសំណល់ថ្នាំជក់ កន្ទុយបារី កញ្ចប់បារី វាបានបំពុលដល់បរិស្ថានគួរឱ្យព្រួយបារម្ភ។ បន្ថែមលើពីនោះដើមឈើ ៦០០លានដើម បានបាត់បង់ ហើយកាបូនឌីអុកស៊ីត ប្រមាណ ៨៤លានតោន ត្រូវបានបំភាយទៅកាន់បរិយាកាស ដោយសារការផលិតថ្នាំជក់នៅលើពិភពលោកក្នុងមួយឆ្នាំៗ៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
