នៅខេត្តសៀមរាប នាព្រឹកថ្ងៃទី២០ ខែកក្កដា ឆ្នាំ២០២២នេះ ក្រសួងវប្បធម៌ និងវិចិត្រសិល្បៈ បានរៀបចំសិក្ខាសាលាថ្នាក់ភូមិភាគស្តីពីការផ្សព្វផ្សាយសន្ធិសញ្ញា និងអនុសញ្ញានានាដែលកម្ពុជាបានចូលជាភាគី និងផ្សព្វផ្សាយលិខិតបទដ្ឋានគតិយុត្តទាក់ទងនឹងច្បាប់សិទ្ធិអ្នកនិពន្ធ និងសិទ្ធិប្រហាក់ប្រហែល ក្រោមអធិបតីភាពឯកឧត្តម ឡុង ប៉ុណ្ណស៊ីរីវត្ថ រដ្ឋលេខាធិការក្រសួងវប្បធម៍ និងវិចិត្រសិល្បៈ ដោយមានការចូលរួមពីសំណាក់លោកលោកស្រីប្រធានអនុប្រធានមន្ទីរពាក់ព័ន្ធក្នុងខេត្ត រួមទាំងលោកលោកស្រី ជាសិល្បករសិល្បការិនី និងប្អូនៗនិស្សិតជាច្រើននាក់។
ឯកឧត្តម ឡុង ប៉ុណ្ណស៊ីរីវត្ថ បានមានប្រសាសន៍ថា អង្គសិក្ខាសាលាដែលបានរៀបចំឡើងនាឱកាសនេះក្នុងគោលបំណងដើម្បីចូលរួមផ្សព្វផ្សាយខ្លឹមសារច្បាប់ សិទ្ធិអ្នកនិពន្ធ អនុសញ្ញ និងសិទ្ធិសញ្ញានានា ដែលកម្ពុជាបានចូលជាភាគី ជូនទៅដល់សិក្ខាកាម ជាពិសេសប្អូនៗ សិល្បករ និងនិស្សិត ដែលជាយុវជនឱ្យបានយល់ដឹងកាន់តែទូលំទូលាយនូវចំណេះដឹងបន្ថែម អំពីច្បាប់សិទ្ធិអ្នកនិពន្ធ និងសិទ្ធិប្រហាក់ប្រហែល។ អង្គសិក្សាសាលានេះដែរ វាពិតជាមានសារៈសំខាន់ណាស់ក្នុងការផ្តល់នូវចំណេះដឹងថ្មីៗ រួមទាំងបទពិសោធន៍ល្អៗ សម្រាប់បងប្អូនទាំងអស់គ្នាយកទៅអនុវត្ត និងផ្សព្វផ្សាយបន្ត នៅតាមមូលដ្ឋានរបស់ខ្លួន ដើម្បីរួមចំណែកក្នុងការលើកកម្ពស់ទៅដល់ការបង្កើតថ្មីនូវស្នាដៃវប្បធម៌ច្រើនទៀត។
ឯកឧត្តមរដ្ឋលេខាធិការ មានប្រសាសន៍បន្ថែមថា ពិតណាស់ ច្បាប់សិទ្ធិអ្នកនិពន្ធ គឺជាផ្នែកមួយនៃច្បាប់កម្មសិទ្ធិបញ្ញា ដែលត្រូវបានបង្កើតឡើងក្នុងគោលបំណង និងគោលដៅជួយជំរុញការបង្កើតឱ្យមានស្នាដៃថ្មីៗ និងការពារនូវផលិតផលវប្បធម៌ជាស្នាដអ្នកនិពន្ធ អ្នកសម្តែង ផលិតករហ្វូណូក្រាម និងអង្គភាពទូរផ្សាយសំដៅធានាការធ្វើអាជីវកម្មមួយត្រឹមត្រូវ ស្របច្បាប់លើផលិតផលវប្បធម៌ទាំងនោះ ដើម្បីរួមចំណែកក្នុងការអភិវឌ្ឍន៍វិស័យវប្បធម៌ស្របតាមគោល នយោបាយជាតិ ស្តីពីវិស័យវប្បធម៌ ឆ្នាំ២០១៤ និងចូលរួមចំណែកអភិវឌ្ឍន៏សេដ្ឋកិច្ច សង្គម ដែលជាកត្តាជួយជំរុញលើកទឹកចិត្តដល់អ្នកនិពន្ធ ផលិតករ សិល្បករ ម្ចាស់សិទ្ធិ ឱ្យខិតខំបង្កើតស្នាដៃថ្មី និងដើម្បីទាក់ទាញវិនិយោគិនឱ្យចូលមកប្រកបរបរក្នុងស្រុក ដោយអនុលោមតាមបទដ្ឋានជាតិ និងអន្តរជាតិ ជាពិសេសអនុសញ្ញា សន្ធិសញ្ញា និងកិច្ចព្រមព្រៀងនានាដែលកម្ពុជាបានចូលជាភាគី៕
អត្ថបទ និង រូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
