នៅសាលាខេត្តសៀមរាប ព្រឹកថ្ងៃទី២០ ខែកក្កដា ឆ្នាំ២០២២ មន្ទីរព័ត៌មានខេត្តសៀមរាប ក្រោមការសហការគាំទ្រពីរដ្ឋបាលខេត្ត បានរៀបចំបើកវគ្គបណ្តុះបណ្តាលផ្នែកផលិតព័ត៌មាន “សរសេរព័ត៌មានបឋម” ទ្រង់ទ្រាយធំជាលើកដំបូងជូនដល់មន្ត្រី មន្ទីរ អង្គភាព រដ្ឋបាលក្រុង ស្រុកក្នុងខេត្ត ក្រោមអធិបតីភាព លោក លី សំរិទ្ឋ អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប និងសិក្ខាកាមចំនួន៩៨នាក់។
វគ្គបណ្តុះបណ្តាលនេះមានរយៈពេល ១ថ្ងៃកន្លះ ចាប់ពីថ្ងៃទី២០ដល់ថ្ងៃទី២១ ខែកក្កដា ឆ្នាំ២០២២ ក្នុងគោលបំណងបង្កើនសមត្ថភាព ដល់មន្ត្រីរាជការតាមបណ្ដាមន្ទីរ អង្គភាព រដ្ឋបាលក្រុង ស្រុក ក្នុងការស្វែងរកប្រភពព័ត៌មាន ដើម្បីផលិតព័ត៌មាន ពីស្ថាប័ន មន្ទីរ ឬអង្គភាពរបស់ខ្លួន ដែលសម្រេចបាន និងកំពុងបន្តអនុវត្ត សម្រាប់ផ្សព្វផ្សាយជូនដល់រាជរដ្ឋាភិបាល និងសាធារណជន ព្រមទាំងចូលរួមទប់ស្កាត់ព័ត៌មានមិនពិតនានា។
លោក លីវ សុខុន ប្រធានមន្ទីរព័ត៌មានខេត្ដសៀមរាប លើកឡើងថា៖ នេះជាលើកដំបូងហើយ ដែលមន្ទីរព័ត៌មានខេត្តក្រោមការសហការគាំទ្រពីរដ្ឋបាលខេត្ត ធ្វើការបើកការបណ្ដុះបណ្ដាលលើការផលិតព័ត៌មាន ដែលមានទ្រង់ទ្រាយធំបែបនេះ។ វគ្គបណ្ដុះបណ្ដាលនេះដែរ ក៏នឹងការបង្ហាញផ្លូវ ក្នុងការសិក្សាស្វែងយល់ពីជំនាញជាអ្នកនាំពាក្យនៅក្នុងអង្គភាព តាមគោលការណ៍របស់រាជរដ្ឋាភិបាល ក្រោយពេលដែលច្បាប់ស្ដីពីសិទ្ធិទទួលព័ត៌មានបានចេញជាផ្លូវការនាពេលខាងមុខ។
ថ្លែងបើកក្នុងវគ្គបណ្ដុះបណ្ដាលនេះ លោក លី សំរិទ្ធិ បង្ហាញថា ការសេរសេរព័ត៌មានប្រៀបដូចជាការដាំស្មៅ ប្រសិនបើមិនបានជ្រើសរើសពូជស្មៅល្អ វានឹងមិនធ្វើឱ្យមានសោភណ្ឌភាពនោះទេ ពោលព័ត៌មាន ដែលសរសេរគ្មានវិជ្ជាជីវៈ មិនមានប្រភពច្បាស់លាស់ វាមិនត្រឹមតែមិនផ្ដល់ប្រយោជន៍ដល់សង្គមទេ វាថែមទាំងធ្វើឱ្យចលាចលក្នុងសង្គមទៀតផង។ ដូច្នេះ តាមរយៈការផ្សព្វផ្សាយព័ត៌មាន ជាផ្នែកមួយបានផ្សារភ្ជាប់ទំនាក់ទំនងគ្នារវាងរាជរដ្ឋាភិបាល និងប្រជាពលរដ្ឋ ដើម្បីចូលរួមរក្សាសសណ្តាប់ធ្នាប់ និងរបៀបរៀបរយសាធារណៈបានល្អ ប៉ុន្ដែបើផ្សាយព័ត៌មានមិនពិត បំពុលសង្គម ធ្វើឲ្យប្រជាពលរដ្ឋមានការយល់ច្រឡំមកលើរាជរដ្ឋាភិបាល អាជ្ញាធរមានសមត្ថកិច្ច និងប៉ះពាល់ដល់សិទ្ធិបុគ្គល។
លោកអភិបាលរងខេត្ត បានបន្ថែមថា ការសរសេរព័ត៌មានត្រូវគិតពីប្រយោជន៍សាធារណៈ មិនត្រូវសរសេរតាមការញុះញង់ពីភាគីណាមួយឡើយ ដែលជាហេតុនាំឱ្យព័ត៌មាននោះគ្មានន័យ។ ជាមួយនោះ លោកបានវាយតម្លៃថា ការបណ្តុះបណ្តាលលើការសរសេរព័ត៌មាននេះ បានជួយបង្កើនសមត្ថភាពដល់មន្ត្រីក្នុងវិស័យសាធារណៈ ស្របតាមផែនការ និងយុទ្ធសាស្ត្ររបស់រាជរដ្ឋាភិបាល ក្នុងបរិបទ “ព័ត៌មាននាសម័យឌីជីថល” ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានដាក់ចេញយ៉ាងត្រឹមត្រូវនូវផែនការ និងយុទ្ធសាស្ត្រនានា សំដៅការលើកកម្ពស់វិស័យព័ត៌មានក្នុងព្រះរាជាណាចក្រកម្ពុជា ឱ្យដើរទាន់សភាពការណ៍សកលភាវូបនីយកម្ម៕
អត្ថបទ និង រូបភាព៖ លោក យូ វង្ស និង លោក បូូ សាវី
កែសម្រួល៖ លោក សេង ផល្លី
