ថ្ងៃទី ១៣ ខែមីនា ឆ្នាំ២០១៩នេះ លោក ជេក ម៉ា សហស្ថាបនិកក្រុមហ៊ុន អាលីបាបា គ្រុប (Alibaba Group) និងមហាសេដ្ឋីចិន លំដាប់ពិភពលោក បានចាកចេញពីខេត្តសៀមរាបហើយ តាមរយៈក្រុមហ៊ុនអាកាសចរណ៍មួយ បន្ទាប់ពីទស្សនកិច្ចកំសាន្ត នៅតាមបណ្ដារមណីយដ្ឋានបុរាណ និងប្រាសាទមួយចំនួនក្នុងតំបន់អង្គរ និងក្នុងក្រុងសៀមរាប រយៈពេល២ថ្ងៃកន្លងមក។
ថ្លែងប្រាប់អ្នកសារព័ត៌មាន អំឡុងពេលទស្សនាប្រាសាទអង្គរវត្ត លោក ជេក ម៉ា បានឆ្លើយយ៉ាងខ្លីថា ប្រាសាទបុរាណខ្មែរពិតជាអស្ចារ្យណាស់។ ក្នុងនោះដែរ លោកបានបង្ហាញអារម្មណ៍ភ្ញាក់ផ្អើល និងកោតសរសើរពីរូបចម្លាក់ទៅតាមជញ្ជាំងប្រាសាទអង្គរ។ ជាងនេះទៅទៀតនោះ មហាសេដ្ឋីរូបនេះក៏បានឡើងទៅដល់ប្រាង្គបាកាន នៃកំពូលប្រាសាទអង្គរវត្តផងដែរ។
អមដំណើរទស្សនានៅប្រាសាទអង្គរវត្តនោះដែរ ឯកឧត្តម សុខ សង្វារ អគ្គនាយករងអាជ្ញាធរជាតិអប្សរា ជឿជាក់ថា តាមរយៈវត្តមានរបស់លោក ជេក ម៉ា (Jack Ma) ក៏ដូចជាបុគ្គលល្បីៗផ្សេងទៀត ក្នុងពិភពលោក ដែលបានមកទស្សនារមណីយដ្ឋានអង្គរ ពិតជាបានបង្ហាញទៅដល់ភ្ញៀវទេសចរគ្រប់ជាតិសាសន៍ កាន់តែចាប់អារម្មណ៍ ហើយមកទស្សនាតំបន់រមណីយដ្ឋានអង្គរកាន់តែច្រើនឡើងៗ ជារៀងរាល់ឆ្នាំបន្ថែមទៀត។
ព័ត៌មានជាតិ ថ្មីៗ
ក្នុងដំណើរកំសាន្តទៅកាន់ នៅប្រាសាទបន្ទាយស្រី របស់លោក ជេក ម៉ា (Jack Ma) ប្រធានមន្ទីរទេសចរណ៍ខេត្តសៀមរាប លោក ង៉ូវ សេងកាក់ ក៏បានស្វាគមន៍ និងសម្ដែងនូវក្ដីរីករាយ ចំពោះមហាសេដ្ឋីចិនរូបនេះផងដែរ និងបានវាយតម្លៃថា វត្តមានរបស់លោក ជេក ម៉ា (Jack Ma) ពិតជារួមចំណែកជួយជម្រុញ ការផ្សព្វផ្សាយវិស័យទេសចរណ៏កម្ពុជា និងការវិនិយោគផ្សេងៗ។ តាមរយៈដំណើរទស្សន:កិច្ចនេះដែរ បានបង្ហាញដល់ពិភពលោក ថាកម្ពុជា ជាប្រទេសមួយកំពុងអភិវឌ្ឍន៌ មានសុខសន្តិភាពពេញលេញ ក្រោមការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា។
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក សេង ផល្លី
