គិតត្រឹមថ្ងៃទី១៤ ខែមីនា ឆ្នាំ២០១៩នេះ ការធ្វើជំរឿនឆ្នាំ២០១៩ ក្នុងខេត្តសៀមរាប នៅមិនទាន់ចប់ស្រេចបាច់ទៅតាមផែនការនៅឡើយទេ។ ប៉ុន្តែលោកប្រធានមន្ទីរផែនការខេត្តសៀមរាប បានបញ្ជាក់ថា ការជំរឿននេះ បានសម្រេចជាង៩៩ភាគរយហើយ ហើយនិងបិទបញ្ចប់ការប្រមូលសិ្ថតិនៅរសៀលថ្ងៃទី១៥ ខែមីនា ឆ្នាំ២០១៩នេះ។
បើតាមការឲ្យដឹងពីលោក ហាក់ សុធារ៉ា ប្រធានមន្ទីរផែនការខេត្តសៀមរាបបានឲ្យដឹងថា ស្រុកចំនួន១១ ក្នុងចំនោម ១២ក្រុង-ស្រុក ក្នុងខេត្តសៀមរាប បានបិទបញ្ចប់ការធ្វើជំរឿនកាលពីម្សិលមិញរួចរាល់ហើយ គឺនៅសល់តែក្រុងសៀមរាបតែមួយប៉ុណ្ណោះ។ ភាពយឺតយ៉ាវនេះ បណ្ដាលមកពី កំណើនប្រជាជនក្នុងក្រុងសៀមរាប មានការកើនឡើងខ្លាំង និង កំណើនផ្ទះជួល បន្ទប់ជួលផងដែរ ដែលមានការលំបាក ដល់មន្ត្រីជំរឿន ធ្វើការណាត់ជួបម្ចាស់គេហដ្ឋាន ក្នុងនោះ មន្ត្រីជំរឿនមួយចំនួនបានបំពេញការងាររហូតដល់ម៉ោង ៨ទៅដល់ម៉ោង៩យប់។ រីឯ មន្ត្រីមួយចំនួនទៀត ដែលបានជ្រើសរើសពីស្ថាប័នដទៃ សម្រាប់បម្រើឲ្យយុទ្ធនាការធ្វើជំរឿនឆ្នាំ២០១៩នេះ បានសុំលាសុំឈប់ពីការងារ ដោយសារបញ្ហាសុខភាព មានការលំបាក ដោយសារប្រជាពលរដ្ឋមិនសហការ និងប្រើសម្ដីមិនសមរម្យមកលើមន្ត្រីជំរឿនផងដែរ។
ទោះបីជា ជួបប្រទះទៅនឹងបញ្ហាខ្វះខាតមន្ត្រីជំរឿន បន្ទាប់ពីដល់ថ្ងៃកំណត់ នៃការបិទបញ្ចប់ការធ្វើជំរឿនឆ្នាំ២០១៩នេះក្ដី គឺនៅថ្ងៃទី១៣ ខែមីនា ឆ្នាំ២០១៩ម្សិលមិញនេះ លោក ហាក់ សុធារ៉ា បានបញ្ជាក់ថា ការធ្វើជំរឿនក្នុងខេត្តសៀមរាបសម្រេចបានការចុះបញ្ជីខ្នងផ្ទះ និងសម្ភាសន៍ជាង៩៩ភាគរយហើយ ដែលស្មើនឹង២៤៣,៧៩៥គ្រួសារ។ ទន្ទឺមនឹងនោះ សង្កាត់ក្នុងក្រុងសៀមរាប ដែលនៅសល់រួមមាន សង្កាត់ស្លក្រាម សង្កាត់ជ្រាវ សង្កាត់គោកចក សង្កាត់សាលាកំរើក និងសង្កាត់ស្វាយដង្គុំ ដើម្បីបញ្ចប់ការធ្វើជំរឿន នៅត្រឹមរសៀលថ្ងៃទី១៥ មីនា ឆ្នាំ២០១៩ ស្អែកនេះ លោកបានបញ្ជូនមន្ត្រី ដែលមានសមត្ថភាពរបស់មន្ទីរផ្ទាល់ ចុះទៅប្រមូលទិន្នន័យរួចរាល់ហើយ។
ក្នុងនោះ លោក ខៀវ សត ចៅសង្កាត់ស្លក្រាម ក្រុងសៀមរាប បានឲ្យដឹងថា ការធ្វើជំរឿនឆ្នាំ២០១៩នេះ ក្នុងសង្កាត់របស់លោក មានបញ្ហាខ្លះដូចជា ប្រជាពលរដ្ឋមិនសូវនៅផ្ទះ ប្រជាពលរដ្ឋណាត់ជាមួយមន្ត្រីជំរឿន ប៉ុន្តែមិនមកជួបជាមួយនឹងមន្ត្រីជំរឿន ក្នុងនោះក៏មានព្រះសង្ឃ និង ប្រជាពលរដ្ឋមិនសហការមានចំនួន ៥ករណីផងដែរ។ ដោយ ខាងអាជ្ញាធរ ភូមិសង្កាត់ បានចុះទៅពន្យល់ណែនាំជាមួយមន្ត្រីជំរឿនបន្ថែមទើបពួកគាត់យល់ព្រមផ្ដល់ព័ត៌មានជំរឿន។
ពាក់ព័ន្ធនឹង ការធ្វើជំរឿនឆ្នាំ២០១៩នេះដែរ ប្រជាពលរដ្ឋស្ថិតក្នុងភូមិដូនប៉ា សង្កាត់ស្លក្រាម ក្រុងសៀមរាប បាននិយាយប្រហាក់ប្រហែលគ្នាថា ការធ្វើជំរឿននេះល្អណាស់ដល់ប្រទេសជាតិ ប៉ុន្តែប្រជាពលរដ្ឋមួយចំនួនគាត់មិនបានដឹងពីថ្ងៃបញ្ចប់នៃការធ្វើជំរឿនទេ ដោយឡែកពួកគាត់បានផ្ដល់បទសម្ភាសន៍ដល់មន្ត្រីជំរឿនបានយ៉ាងក្បោះក្បាយ។
គួររំលឹកថា នេះគឺជាការជំរឿនប្រជាពលរដ្ឋទូទាំងប្រទេសលើកទី៤ហើយ បើគិតចាប់ តាំងពីទស្សវត្សរ៍ឆ្នាំ១៩៦០ មកដល់ឆ្នាំ២០១៩នេះ។ ដោយឡែក ការជំរឿនប្រជាពលរដ្ឋទូទាំងប្រទេសសម្រាប់ឆ្នាំ២០១៩នេះ នឹងបញ្ចប់នៅថ្ងៃទី១៣ ខែមីនា ឆ្នាំ២០១៩ ដែលមានរយៈពេលសរុប១១ថ្ងៃ។
អត្ថបទ និងរូបភាព៖ លោក សេង ផល្លី និង លោក ហាំ ម៉េងហួត
