នៅក្នុងឆ្នាំ២០១៩នេះ ស្រុកអង្គជុំ នឹងទទួលបានផ្លូវក្រាលកៅស៊ូ ចំនួន ៦ខ្សែ ដែលបង្កភាពងាយស្រួលដល់ប្រជាពលរដ្ឋប្រកបរបរ និងធ្វើដំណើរ ទៅកាន់ស្រុកវ៉ារិន ស្រុកពួក ស្រុកស្រីស្នំ ជាពិសេសក្រុងសៀមរាប និងបណ្ដាខេត្តជិតខាងផងដែរ។
ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការនូវអាគារមណ្ឌលសុខភាពតាសោម ស្ថិតក្នុងឃុំតាសោម ស្រុកអង្គជុំខេត្តសៀមរាប កាលពីថ្ងៃទី១៤ខែមីនាឆ្នាំ២០១៩ លោក លុក ផុស អភិបាលស្រុកអង្គរជុំ បានឲ្យដឹងថា ផ្លូវក្រាលកៅស៊ូ ដែលនឹងទទួលបានក្នុងឆ្នាំ២០១៩នេះ រួមមាន៖
– ផ្លូវខ្សែទី១ ពីស្រុកពួក កាត់ឃុំត្រីញ័រ ឆ្ពោះទៅស្រុកអង្គរជុំមានប្រវែង ៣២គ.ម គាំទ្រដោយក្រសួងអភិវឌ្ឍន៍ជនបទ ផ្លូវមួយខ្សែនេះកំពុងដំណើរការស្ថាបនា។
– ខ្សែទី២ ចេញពីរង្វង់មូលវត្តចារឈូក ឃុំចារឈូក កាត់តាមឃុំគោល ឃុំស្រែខ្វាវ ស្រុកអង្គរជុំ ឆ្ពោះទៅផ្លូវជាតិលេខ៦៨ ស្រុកស្រីស្នំ មានប្រវែងប្រមាណ ១៨គ.ម ផ្លូវមួយខ្សែនេះកំពុងដំណើរការស្ថាបនា។
– ខ្សែទី៣ ចេញពីភូមិគោកចាន់ ឃុំតាសោម កាត់តាមឃុំនគរភាស ឆ្ពោះទៅឃុំគោកដូង ស្រុកអង្គរជុំ មានប្រវែង១១គ.ម ប្រភេទកៅស៊ូ គាំទ្រដោយក្រសួងអភិវឌ្ឍន៍ជនបទ។
– ខ្សែទី៤ ជួសជុល និងពង្រីកផ្លូវកៅស៊ូលេខ២៦៦E ពីឃុំសសរស្តម្ភ ស្រុកពួក ឆ្ពោះទៅស្រុកអង្គរជុំ ប្រវែង១៣គ.ម គាំទ្រដោយមន្ទីរសាធារណៈការនិងដឹកជញ្ជូនខេត្ត។
– ខ្សែទី៥ ជួសជុលផ្លូវដីក្រហម និងក្រាលកៅស៊ូ ពីសាលាឃុំដូនពែង ឆ្ពោះទៅភូមិដូនអែម ឃុំគោកដូង ស្រុកអង្គរជុំប្រវែង ១៣គ.ម គាំទ្រដោយក្រសួងអភិវឌ្ឍន៍ជនបទ
– និងខ្សែទី៦ ជួសជុលផ្លូវដីក្រហម និងក្រាលកៅស៊ូផ្លូវលេខ266E ចេញពីសាលាឃុំដូនពែង ស្រុកអង្គរជុំ ឆ្ពោះទៅឃុំស្វាយស ស្រុកវ៉ារិន ប្រវែង៥គ.ម គាំទ្រដោយមន្ទីរសាធារណៈការនិងដឹកជញ្ជូនខេត្ត។
ក្រៅពីសមិទ្ធិផលផ្លូវ៦ខ្សែនេះ លោក លុក ផុស បានថ្លែងអំណរគុណដល់ ឯកឧត្តម អ្នកឧកញ៉ា សៀង ណាំ សមាជិកសភា និងជាតំណាងរាស្ត្រមណ្ឌលសៀមរាប រួមនឹងសប្បុរសជនជនជាតិស្វីស ដែលបានផ្ដល់អាគារមណ្ឌលសុខភាព ថ្មី រួមទាំង ក្លោងទ្វារ របងនិងបន្ទប់ទឹក ព្រមទាំងបំពាក់សម្ភារៈមួយចំនួន ក្រោយពីសាងសង់រួច សរុបជាទឹកប្រាក់ ចំនួន៥ម៉ឺន៥ពាន់ដុល្លារអាមេរិក។
សូមជម្រាបថា ស្រុកអង្គជុំ ខេត្តសៀមរាប មានផ្ទៃដីសរុប៤៧៩.០៣គីឡូម៉ែត្រក្រឡា មានឃុំចំនួន៧ និងភូមិចំនួន៨៦ មានប្រជាជនសរុបចំនួន៧១.៣៤១នាក់ ស្រីចំនួន៣៦.៩០៨នាក់ មានមុខរបរជាកសិករប្រមាណ៨៥.៦៣% ក្រៅពីនោះជាមន្ត្រីរាជការនិងអ្នកលក់ដូរ។ ស្រុកនេះ មានមន្ទីរពេទ្យបង្អែក ១ មួយកន្លែង មណ្ឌលសុខភាព ៦កន្លែង នៃឃុំចំនួន៧ មានមន្ត្រីសុខាភិបាលបម្រើការក្នុងស្រុក ៥៣នាក់ និងគ្រែសម្រាកព្យាបាល ៧៣គ្រែ។
អត្ថបទ និងរូបភាព៖ លោក យូ វង្ស
កែសម្រួលអត្ថបទ៖ លោក សេង ផល្លី
