ពិធីផ្សព្វផ្សាយ ក្របខណ្ឌគោលដៅអភិវឌ្ឍប្រកបដោយចីរភាពកម្ពុជា ២០១៦-២០៣០ ដែលប្រារព្ធឡើងថ្ងៃទី១៥ ខែមីនា ឆ្នាំ២០១៩ ក្នុងខេត្តសៀមរាប រៀបចំដោយ ក្រសួងផែនការ មានគោលបំណងបង្ហាញពីសមិទ្ធិផល នៃកិច្ចសហការគ្នារវាងរាជរដ្ឋាភិបាល រួមនិងដៃគូអភិវឌ្ឍ អង្គការសង្គមស៊ីវិលនានា ដើម្បីជម្រុញឲ្យកម្ពុជា ក្លាយទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ ២០៣០ នឹងឈានទៅជាប្រទេសដែលមានចំណូលខ្ពស់នៅឆ្នាំ ២០៥០ ព្រមទាំងបង្ហាញ គោលនយោបាយ និងយុទ្ធសាស្ត្ររបស់រាជរដ្ឋាភិបាលកម្ពុជា តាមរយៈឯកសារជាតិ ស្ដីអំពី ក្របខណ្ឌគោលដៅអភិវឌ្ឍប្រកបដោយចីរភាពកម្ពុជា ២០១៦-២០៣០។
អញ្ជើញជាតំណាងដ៏ខ្ពង់ខ្ពស់ ឯកឧត្តម ឆាយ ថន ទេសរដ្ឋមន្ត្រី រដ្ឋមន្ត្រី ក្រសួងផែនការ ក្នុងពិធីនេះ ឯកឧត្តម ទួន ថាវរៈ រដ្ឋលេខាធិការក្រសួងផែនការ បានមានប្រសាសន៍ថា ឯកសារជាតិ ស្ដីអំពី ក្របខណ្ឌគោលដៅអភិវឌ្ឍប្រកបដោយចីរភាពកម្ពុជា ២០១៦-២០១៣០នេះ នឹងរួមចំណែកយ៉ាងពេញលេញ ក្នុងការជម្រុញសន្ទុះនៃការអភិវឌ្ឍប្រទេសកម្ពុជា ឲ្យក្លាយជាប្រទេស ដែលមានចំណូលមធ្យមកម្រិតខ្ពស់នៅឆ្នាំ ២០៣០ នឹងឈានទៅរកប្រទេស មានចំណូលខ្ពស់នៅឆ្នាំ ២០៥០ ជាមួយនិងការកាត់បន្ថយអត្រានៃភាពក្រីក្ររបស់ប្រជាជនកម្ពុជា និងឈានទៅលុបបំបាត់ទាំងស្រុង ព្រមទាំងលើកកម្ពស់កម្រិតជីវភាពរបស់ប្រជាជន តាមរយៈការអនុវត្ត ការធ្វើសមាហរណកម្មក្របខ័ណ្ឌនេះទៅក្នុងប្រព័ន្ធផែនការជាតិ។
បើយើងពិនិត្យមើលឡើងវិញ ពីលទ្ធផលនៃការអនុវត្តគោលដៅអភិវឌ្ឍន៍សហស្សវត្សរ៍កម្ពុជា យើងសម្រេចស្ទើរតែបានគ្រប់គោលដៅទាំងអស់ ទន្ទឹមនឹងនោះកម្ពុជាត្រូវបានអង្គការសហប្រជាជាតិធ្វើចំណាត់ថ្នាក់ ជាប្រទេសគំរូមួយក្នុងចំណោមបណ្ដាប្រទេសចំនួន ៦ ដែលសម្រេចបានគោលដៅច្រើនជាងគេ នៃគោលដៅអភិវឌ្ឍន៍សហស្សវត្សរ៍។ សមិទ្ធផលនេះគឺបានបង្ហាញឲ្យឃើញច្បាស់ ពីការប្ដេជ្ញាចិត្តរបស់រាជរដ្ឋាភិបាលកម្ពុជា ក្នុងនាមជាសមាជិកមួយរបស់អង្គការសហប្រជាជាតិ ក្នុងការអនុវត្តន៍ និងរួមចំណែកធ្វើឲ្យសម្រេចបានរបៀបវារៈឆ្នាំ ២០៣០ របស់អង្គការសហប្រជាជាតិ។
ឯកឧត្តម ទួន ថាវរៈ ក៏បានថ្លែងអំណរគុណដល់ដៃគូអភិវឌ្ឍនានា ជាពិសេស កម្មវិធីអភិវឌ្ឍន៍សហប្រជាជាតិ UNDP មូលនិធិសហប្រជាជាតិសម្រាប់ប្រជាជន UNFPA មូលនិធិសហប្រជាជាតិដើម្បីកុមារ UNICEF ដែលបានសហការគ្នាយ៉ាងស្អិតរមួត ដោយគាំទ្រទាំងលើផ្នែកបច្ចេកទេស និងហិរញ្ញវត្ថុ ដល់ដំណើរការនៃការរៀបចំឯកសារនេះ។
ឯកឧត្តម ក៏បានអំពានាវទៅដល់ គ្រប់ភាគីទាំងអស់ ដែលមានចំណែកពាក់ព័ន្ធ ទាំងថ្នាក់ជាតិ និងថ្នាក់ក្រោមជាតិ ជាពិសេសការចូលរួម និងការផ្ដល់ថវិកាពីវិស័យឯកជន ដើម្បីសម្រេចបាននូវមហិច្ឆិតាដ៏ធំធេងរបស់គោលដៅអភិវឌ្ឍប្រកបដោយចីរភាពកម្ពុជា។ ដូចនេះការជម្រុញ និងលើកកម្ពស់ចំណេះដឹង អំពីគោលដៅអភិវឌ្ឍប្រកបដោយចីរភាពកម្ពុជា ភាគីពាក់ព័ន្ធទាំងនេះ រួមទាំងប្រជាពលរដ្ឋទាំងមូលគឺជាកត្តាចាំបាច់ ដែលមិនអាចខ្វះបាន។
តាមរយៈបទបង្ហាញ នៃអង្គពិធី ក្របខណ្ឌគោលដៅអភិវឌ្ឍប្រកបដោយចីរភាពកម្ពុជា ២០១៦-២០១៣០ ចងក្រងឡើង ដើម្បីសម្រេចគោលបំណងចំនួន ៥ចំណុច៖
ទី១- បង្ហាញចេញនូវលទ្ធផល នៃការសម្រេចបានគោលដៅសហសវត្សរ៍កម្ពុជា ដែលបានអនុវត្តពីឆ្នាំ ២០០៣ ដល់ឆ្នាំ ២០១៥ និងកំណត់បញ្ហា ដែលនៅមិនទាន់សម្រេចបាន សម្រាប់អនុវត្តក្នុងអាណត្តិ នៃគោលដៅអភិវឌ្ឍន៍ប្រកបដោយចីរភាពកម្ពុជា។
ទី២- ពិនិត្យជ្រើសរើសគោលដៅចំណុចដៅ និងសូចនាកររបស់គោលដៅអភិវឌ្ឍន៍ប្រកបដោយចីរភាពសាកល ដើម្បីដាក់បញ្ចូលក្នុងអាទិភាពរបស់កម្ពុជា និងសម្រាប់ធ្វើសមាហរណកម្មទៅក្នុងផែនការជាតិ។
ទី៣- កំណត់ចេញនូវបញ្ហាប្រឈមនានា ដែលរំពឹងថា នឹងអាចជួបប្រទះ នៅក្នុងដំណើរការអនុវត្ត គោលដៅអភិវឌ្ឍន៍ប្រកបដោយចីរភាពកម្ពុជា និងដំណោះស្រាយបញ្ហានេះ។
ទី៤- កំណត់ចេញនូវចំណុចដៅជាក់លាក់ សម្រាប់គោលដៅនីមួយៗ របស់គោលដៅអភិវឌ្ឍន៍ប្រកបដោយចីរភាពកម្ពុជា សម្រាប់ជាទិសដៅ នៃការអនុវត្តឲ្យសម្រេចបាន គោលដៅជាតិ និងរួមចំណែកធ្វើឲ្យបានគោលដៅសាកល។
ទី៥- កំណត់ចេញនូវឧបករណ៍តាមដានត្រួតពិនិត្យ និងវាយតម្លៃពីលទ្ធផលនៃការសម្រេចបានគោលដៅទាំងនេះ។
អត្ថបទ និងរូបភាព៖ លោក សេង ផល្លី និងលោក ហាំ ម៉េងហួត
