បន្ទាប់ពីបញ្ចប់ ដំណើរទស្សនកិច្ចនៅតាមប្រាសាទមួយចំនួន ក្នុងរមណីយដ្ឋានតំបន់អង្គរ ឯកឧត្តម មូន ជេអ៊ីន ប្រធានាធិបតីកូរ៉េខាងត្បូង និងលោកជំទាវ បានអញ្ជើញចាកចេញពីព្រលានយន្តហោះអន្តរជាតិខេត្តសៀមរាបហើយ នៅវេលាម៉ោង ០១:១០នាទី រសៀល ដើម្បីត្រឡប់ទៅព្រលានយន្តហោះអន្តរជាតិពោចិនតុង រាជធានីភ្នំពេញវិញ បន្ទាប់មកទើបបន្តហោះចេញ ទៅកាន់ប្រទេសកូរ៉េខាងត្បូង តាមរយៈយន្តហោះពិសេសរបស់ឯកឧត្តម នៅថ្ងៃទី ១៦ ខែមីនា ឆ្នាំ ២០១៩ ដដែលនេះតែម្ដង។
ទស្សនកិច្ចផ្លូវរដ្ឋរយៈពេល ៣ថ្ងៃ របស់ ប្រធានាធិបតីកូរ៉េខាងត្បូងនេះ បានបន្សល់ទុកនូវលទ្ធផលផ្លែផ្កាជាច្រើនដល់ប្រទេសកម្ពុជា ដែលវាបានបង្ហាញពីចំណងមិត្តភាពកាន់តែរឹងមាំ និងកិច្ចសហប្រតិបត្តិការរវាងប្រទេសទាំងពីរកាន់តែស៊ីជម្រៅ។ បន្ទាប់ពី ប្រមុខរាជរដ្ឋាភិបាលកម្ពុជា និងប្រមុខរដ្ឋកូរ៉េខាងត្បូង បានអញ្ជើញធ្វើជាសាក្សី ក្នុងពីធីចុះហត្ថលេខាលើកិច្ចព្រមព្រៀងចំនួន ៥ នោះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បានធានា ដល់អ្នកវិនិយោគគ្រប់រូប នូវបរិយាកាសវិនិយោគ ប្រកបដោយភាពអំណោយផលជាពិសេស គឺសន្តិភាព សន្តិសុខ និងស្ថេរភាពនយោបាយ ក៏ដូចជាស្ថេរភាពម៉ាក្រូសេដ្ឋកិច្ច ក្របខ័ណ្ឌច្បាប់ និងស្ថាប័នដែលប្រកបដោយ ប្រសិទ្ធភាពតម្លាភាព គណនេយ្យភាព និងភាពអាចប៉ាន់ប្រមាណបាន។
សូមជម្រាបថា កិច្ចព្រមព្រៀងចំនួន ៥នោះរួមមាន៖
ទី១-កិច្ចសម្របសម្រួលក្របខណ្ឌស្ដីពីការផ្ដល់ឥណទានសម្បទាន នៃមូលនិធិសហប្រតិបត្តិការអភិវឌ្ឍន៍សេដ្ឋកិច្ចសម្រាប់ឆ្នាំ ២០១៩-២០២៣ ដែលចុះហត្ថលេខា។
ទី២-កិច្ចព្រមព្រៀងឥណទានសម្បទាន សម្រាប់គម្រោងបង្កើត មន្ទីរពេទ្យសាកលវិទ្យាល័យ វិទ្យាសាស្ត្រសុខាភិបាល។
ទី៣-អនុស្សរណៈនៃការយោគយល់គ្នា លើគម្រោងផ្គត់ផ្គង់ថាមពល សម្រាប់ប្រព័ន្ធបណ្ដាញអគ្គិសនីខ្នាតតូចបំផុត និងស្ថានីយសាកអាគុយនៅកម្ពុជា ។
ទី៤-អនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការទ្វេភាគី រវាងទីភ្នាក់ងារជម្រុញវិនិយោគពាណិជ្ជកម្មកូរ៉េ និងក្រុមប្រឹក្សាអភិវឌ្ឍន៍កម្ពុជា សម្រាប់កិច្ចសហប្រតិបត្តិការសម្រួលការវិនិយោគពីកូរ៉េ។
និងទី៥-អនុស្សរណៈនៃការយោគយល់គ្នា រវាងរាជបណ្ឌិតសភាកម្ពុជា និងក្រុមប្រឹក្សាស្រាវជ្រាវជាតិ សម្រាប់សេដ្ឋកិច្ច មនុស្សសាស្ត្រ និងសង្គមសាស្ត្រ នៃសាធារណរដ្ឋកូរ៉េ ។
ក្រៅពីកិច្ចព្រមព្រៀងចំនួន ៥នេះ សម្ដេចតេជោ ហ៊ុន សែន និង ឯកឧត្តម មូន ជេអ៊ីន ក៏បានព្រមព្រៀងគ្នា ក្នុងការមិនយកពន្ធត្រួតគ្នា។ បន្ថែមពីលើនោះ រដ្ឋាភិបាលកូរ៉េខាងត្បូង បានសម្រេចពន្លឿនការវិនិយោគ រួមនឹងកិច្ចសហប្រតិបត្តិការ លើការដឹកជញ្ជូនក្នុងវិស័យកសិកម្មផងដែរ។ ទន្ទឹមនឹងនោះ ភាគីទាំងពីរ បានសម្ដែងនូវការពេញចិត្ត តាមរយៈកំណើន នៃការប្រាស្រ័យទាក់ទងរវាងប្រជាជន និងប្រជាជននៃប្រទេសទាំងពីរ ក្នុងវិស័យទេសចរណ៍ និងធុរកិច្ច ក៏ដូចជាទំនាក់ទំនងល្អ ក្នុងការបញ្ជូនពលករខ្មែរទៅធ្វើការនៅសាធារណរដ្ឋកូរ៉េផងដែរ។
សូមបញ្ជាក់ថា ព្រះរាជាណាចក្រកម្ពុជា និងសាធារណរដ្ឋកូរ៉េ (កូរ៉េខាងត្បូង) បានផ្អាកទំនាក់ទំនងជាមួយគ្នា អស់មួយរយៈ ដោយសារបញ្ហា សង្គ្រាមស៊ីវិលនៅកម្ពុជា តែទំនាក់ទំនងការទូតនេះត្រូវបានតភ្ជាប់ឡើងវិញ នៅថ្ងៃទី៣០ ខែតុលា ឆ្នាំ១៩៩៧ បន្ទាប់ពីសម្តេចតេជោ បានធ្វើទស្សនកិច្ចនៅសាធារណរដ្ឋកូរ៉េ នាខែកក្កដា ឆ្នាំ១៩៩៦។ គិតពីឆ្នាំ១៩៩៦ មកដល់ឆ្នាំ២០១៨ រដ្ឋាភិបាលប្រទេសកូរ៉េ បានផ្ដល់ហិរញ្ញប្បទានប្រមាណ ៦៣២លានដុល្លារសហរដ្ឋអាមេរិក ក្នុងនោះហិរញ្ញប្បទានឥតសំណងមានប្រមាណជាង ៣០០ លានដុល្លារអាមេរិក។
គួររំលឹកដែរថា ប្រធានាធិបតីនៃសាធារណរដ្ឋកូរ៉េត្បូង ឯកឧត្តម មូន ជេអ៊ីន និងលោកជំទាវ បានអញ្ជើញមកទស្សនកិច្ចនៅកម្ពុជារយៈពេល ៣ ថ្ងៃ ចាប់ពីថ្ងៃទី ១៤ ដល់ថ្ងៃទី ១៦ ខែមីនា ដែលនេះជាដំណើរទស្សនកិច្ច គឺជាដំណើរទស្សនកិច្ចលើកដំបូងរបស់ឯកឧត្តម ក្នុងឋានៈជាប្រមុខរដ្ឋនៃសាធារណរដ្ឋកូរ៉េ ដែលតបតាមការអញ្ជើញពីព្រះមហាក្សត្រនៃព្រះរាជាណាចក្រកម្ពុជា។
អត្ថបទ៖ សេង ផល្លី
