នៅសណ្ឋាគារសុខាល័យខេត្តសៀមរាប នាថ្ងៃទី១៦ខែមីនាឆ្នាំ២០១៩ គណៈស្នងការជាតិ នៃកាយរឹទ្ឋិជាតិកម្ពុជា បានរៀបចំកិច្ចប្រជុំប្រចាំឆ្នាំ របស់ថ្នាក់ដឹកនាំកាយរឹទ្ឋិ នៃបណ្តាប្រទេស ក្នុងតំបន់អាស៊ាន ដែលមានសមាសភាពប្រតិភូជាប្រធានគណៈស្នងការជាតិ ស្នងការជាតិកិច្ចការអន្តរជាតិ និងស្នងការជំនាញផ្សេងៗទៀតចូលរួមជាអ្នកសង្កេតការណ៍សរុបចំនួន២៥រូប ដែលមានប្រទេសកម្ពុជា ប្រុយណេ ម៉ាឡេស៊ី ឥណ្ឌូណេស៊ី ហ្វីលីពីន ថៃ សឹង្ហបុរី និងប្រទេសវៀតណាម និងមានវត្តមានថ្នាក់ដឹកនាំ និងសមាជិកសមាជិកា នៃកាយរឹទ្ឋិជាតិកម្ពុជា ចូលរួមជាច្រើនផងដែរ។
ថ្លែងបើកកិច្ចប្រជុំនាឱកាសនោះ ឯកឧត្តម បណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំយុវជននិងកីឡា និងជាប្រធានកាយរឹទ្ឋិជាតិកម្ពុជា មានប្រសាសន៍ថា៖ សមាគមកាយរឹទ្ឋិអាស៊ាន សម្រាប់កិច្ចសហប្រតិបត្តិការតំបន់ក្នុងតំបន់ (ASEAN Scout Association for Regional Cooperation) ហៅកាត់ថា ASARC ត្រូវបានបង្កើតឡើងនៅក្នុងសន្និសីទកាយរឹទ្ឋិអាស៊ានលើកទី១ កាលពីខែកញ្ញាឆ្នាំ២០១៧ នៅទីក្រុងកូឡាឡាំពួរ ប្រទេម៉ាឡេស៊ី និងបង្កើតឡើងដោយអង្គការជាតិ នៃចលនាកាយរឹទ្ឋិ ក្នុងបណ្តាប្រទេសតំបន់អាស៊ាន ក្នុងគោលបំណង លើកទឹកចិត្តនិងលើកកម្ពស់កិច្ចសហប្រតិបត្តិការក្នុងភាពជាដៃគូរ ការឯកភាព មិត្តភាពបងប្អូន និងសាមគ្គីភាពក្នុងតំបន់អាស៊ាន ដោយធ្វើការជាមួយគ្នាយ៉ាងជិតស្និទ្ឋ ដើម្បីបង្កើត ឲ្យបាននូវកម្មវិធីផ្តល់អត្ថប្រយោជន៍ដល់កុមារ ដល់យុវជន។ បន្ថែមពីនេះដើម្បីពង្រឹងកិច្ចសហប្រតិបត្តិការក្នុងតំបន់ ដោយអនុលោមទៅតាមគោលការណ៍កាយរឹទ្ឋិកម្ម និងធម្មនុញ្ញអាស៊ាន ជួយអភិក្ស និងលើកកម្ពស់ចលនាកាយរឹទ្ឋិក្នុងតំបន់ និងជួយដោះស្រាយបញ្ហាផ្សេងៗ ដែលកើតមានឡើងនៅក្នុងចលនាកាយរឹទ្ឋិ។
ឯកឧត្តម បណ្ឌិតសភាចារ្យ ហង់ជួន ណារ៉ុន បានមានប្រសាសន៍បញ្ជាក់បន្ថែមនៅក្នុងសន្និសីទសារព័តមាន នៅថ្ងៃដដែលនោះថា៖ កិច្ចប្រជុំមេដឹកនាំកាយរឹទ្ឋិអាស៊ានលើកទី១១ គឺជាកិច្ចជំនួបប្រចាំឆ្នាំរបស់ថ្នាក់ដឹកនាំកាយរឹទ្ឋិនៃបណ្តាប្រទេសក្នុងតំបន់អាស៊ាន ដែលមានអង្គការជាតិនៃចលនាកាយរឹទ្ឋិ ទទួលស្គាល់និងជាសមាជិកពេញសិទ្ឋិរបស់ អង្គការពិភពលោកនៃចលនាកាយរឹទ្ឋិ និងជាក្រុមប្រទេសនៃសមាជិក សមាគមប្រជាជាតិអាស៊ីអាគ្នេយ៍ ។
ឯកឧត្តម បញ្ជាក់ថា៖កិច្ចប្រជុំនេះ មានសារៈសំខាន់ណាស់ ដើម្បីពិភាក្សាលើរបៀបវារៈដូចជា៖
១. ពិនិត្យ និងអនុម័ត លើកំណត់ហេតុអង្គប្រជុំមេដឹកនាំកាយរឹទ្ឋិអាស៊ានលើកទី១០ និងសន្និសីទកាយរឹទ្ឋិអាស៊ានលើកទី៥កាលពីថ្ងៃទី១៣ខែតុលាឆ្នាំ២០១៨នៅទីក្រុងម៉ានិលឡា ប្រទេសហ្វីលីពីន។
២.អនុម័តលើសំណើបង្កើតលេខគណនីធនាគាររបស់ASARC(សមាគមកាយរឹទ្ឋិអាស៊ានសម្រាប់សហការក្នុងតំបន់)នៅក្នុងធនាគារណាមួយ របស់ប្រទេសសឹង្ហបុរី ដើម្បីរក្សាទុកមូលនិធិកាយរឹទ្ឋិអាស៊ាន។
៣.ពិភាក្សា និងអនុម័តលើរូបភាពពានរង្វាន់ មេដឹកនាំកាយរឹទ្ឋិអាស៊ាន ដែលមានឈ្មោះថា៖ ពានរង្វាន់មេដឹកនាំកាយរឹទ្ឋិ ដើម្បីផ្តល់ជូន និងលើកទឹកចិត្តមេដឹកនាំកាយរឹទ្ឋិអាស៊ាន ដែលមានស្នាដៃឆ្នើមក្នុងកិច្ចកាយរឹទ្ឋិក្នុងតំបន់អាស៊ាន។
៤.ពិភាក្សាលម្អិតលើសេចក្តីព្រាងលក្ខខណ្ឌ តម្រូវគុណវុឌ្ឍ និងលក្ខណៈសម្បត្តិដែលជាតម្រូវការរបស់គណៈកម្មការផ្តល់រង្វាន់
៥.បន្តកិច្ចពិភាក្សា និងស្វែងរកដំណោះស្រាយ លើបញ្ហាប្រឈម ក្នុងការបង្កើតចលនាកាយរឹទ្ឋិឡាវ ដោយមានការទទួលស្គាល់ពីរដ្ឋាភិបាលនៃប្រទេសឡាវ និងបន្តពិភាក្សាលើកិច្ចត្រៀមរៀបចំកម្មវិធីបោះជំរុំកាយរឹទ្ឋិអាកាសលើកទី១នៅប្រទេសសឹង្ហបុរីនាខែវិច្ឆិកាឆ្នាំ២០១៩ខាងមុខនេះ។
អត្ថបទ និងរូបភាព៖ លោក យូ វង្ស
