កម្លាំងនគរបាលខេត្តសៀមរាប សហការជាមួយកម្លាំងនៃមន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ បានបើកប្រតិបត្តិការចុះបង្ក្រាបគ្រឿងញៀន ក្នុងទីតាំងខារ៉ាអូខេមួយកន្លែង យីហោអេសស៊ី (SC) ស្ថិតនៅភូមិបន្ទាយចាស់ សង្កាត់ស្លរក្រាម ក្រុងសៀមរាប ខេត្តសៀមរាប ដោយឃាត់ខ្លូនមនុស្ស៣០នាក់ និងថ្នាំញៀនមួយចំនួន។
ស្នងការរងទទួលផែនប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តសៀមរាប លោកឧត្តមសេនីយ៍ត្រី អ៊ុ អមរ៉ា បានប្រាប់តាមទូរស័ព្ទនៅព្រឹកថ្ងៃទី១៧ ខែមីនា នេះ ឲ្យដឹងថា នៅយប់រំលងអាធ្រាតថ្ងៃទី១៦ ឈានចូលទី១៧ ខែមីនា ឆ្នាំ២០១៩ នេះកម្លាំងសមត្ថកិច្ច បានបើកប្រតិបត្តិការបង្ក្រាបគ្រឿងញៀន នៅទីតាំងខារ៉ាអូខេអេសស៊ី (SC) នេះ ដោយកម្លាំងជំនាញ ឃាត់ខ្លួនបានមនុស្ស៣០នាក់ ក្នុងនោះមានស្រី០៧នាក់។ ក្នុងនោះដែរ លោកស្នងការរង មិនបានបញ្ជាក់ថា មានជនបរទេស ឬអត់នោះទេ?
លោកឧត្តមសេនីយ៍ត្រី អ៊ុ អមរ៉ា បន្តថា ក្នុងប្រតិបត្តិការ ដែលដឹកនាំបញ្ជាផ្ទាល់ពី ឯកឧត្តម ទៀ សីហា អភិបាលខេត្តសៀមរាបនេះ សមត្ថកិច្ចដកហូតវត្ថុតាង ថ្នាំញៀនប្រភេទម៉េតំហ្វេតាមីន២១កញ្ចប់, ថ្នាំញៀន អិចស្តាស៊ី៩គ្រាប់ និងកញ្ចប់ថ្នាំញៀនប្រើរួច ព្រមទាំងសម្ភារៈសម្រាប់ប្រើប្រាស់គ្រឿងញៀនមួយចំនួន។
ព័ត៌មានជាតិ ថ្មីៗ
លោកស្នងការរងបានបន្តថា បច្ចុប្បន្ននេះកម្លាំងជំនាញកំពុងកសាងសំណុំរឿង ដើម្បីបញ្ជូនទៅកាន់សាលាដំបូងខេត្តសៀមរាប ចាត់ការបន្ដតាមនីតិវិធី៕
អត្ថបទ និងរូបភាព៖ លោក ជា ស្រស់
កែសម្រួល៖ លោក សេង ផល្លី
