នៅក្នុងវគ្គបណ្តុះបណ្តាលមេដឹកនាំកាយរឹទ្ឋិជាន់ខ្ពស់ជំនាន់ទី២ ឯកឧត្តម ទៀ សីហា អភិបាលខេត្តសៀមរាប ត្រូវបានប្រធានកាយរឹទ្ធិជាតិកម្ពុជា តែងតាំងជាប្រធានក្រុមប្រឹក្សាជាតិ នៃកាយរឹទ្ធិជាតិកម្ពុជា ប្រចាំខេត្តសៀមរាប សម្រាប់អាណត្តិទី៣។
ថ្លែងបើកវគ្គបណ្តុះបណ្តាល្ងៃទី១៧ ខែមីនា ឆ្នាំ២០១៩ម្សិលមិញនេះ ឯកឧត្តម បណ្ឌិតសភាចារ្យ ហង់ ជួន ណារ៉ុន មានប្រសាសន៍ថា៖ វគ្គបណ្តុះបណ្តាលនេះ មានសារៈសំខាន់ណាស់ ដើម្បីពង្រឹងសមត្ថភាពរបស់សិក្ខាកាម ហើយក្រោយបញ្ចប់វគ្គសិក្ខាកាមនឹងទទួលបាននូវបទពិសោធ និងចំណេះដឹងកាយរឹទ្ឋិកម្មយ៉ាងពេញលេញ ពីអ្នកឯកទេសកាយរឹទ្ឋិកម្ម នៃកាយរឹទ្ឋិជាតិកម្ពុជា ដែលមានឯកទេសនិងជំនាញ ទទួលស្គាល់ដោយអង្គការពិភពលោក នៃចលនាកាយរឹទ្ឋិប្រចាំតំបន់អាស៊ី ប៉ាស៊ីហ្វិក ។
ឯកឧត្តម ប្រធានកាយរឹទ្ឋិជាតិកម្ពុជា បន្តថា៖សមាជិកភាពកាយរឹទ្ឋិកម្ពុជា មាន ការងារសំខាន់ គឺពង្រឹងសមត្ថភាពមន្ត្រីមេដឹកនាំកាយរឹទ្ឋិជាតិកម្ពុជាប្រកបដោយគុណភាព ធ្វើការពង្រីកសមាជិកភាពកាយរឹទ្ឋិកម្ពុជា ទៅដល់គ្រប់សាលាទូទៅ និងគ្រប់កម្រិតសិក្សា សំដៅចូលរួមចំណែក ក្នុងការជួយបណ្តុះបណ្តាលយុវជនកម្ពុជា ដែលជាគោលដៅអាទិភាពគឺតម្រង់ឆ្ពោះទៅកាន់យុវជននៅក្នុងសាលា និងជំហានបន្ទាប់យុវជននៅក្រៅសាលា ដើម្បីបំផុសពួកគាត់ ឲ្យមានសីលធម៌ គុណធម៌ ចូលរួមការងារក្នុងសង្គម ដោយមានកម្មវិធីបណ្តុះបណ្តាលច្បាស់លាស់ និងស្របតាមក្រមសិលធម៌របស់កាយរឹទ្ឋិជាតិកម្ពុជា ហើយក៏ដើម្បីសម្រេចបានតាមគោលដៅ សមាជិកភាពកាយរឹទ្ឋិជាតិកម្ពុជា មិនគិតតែលើចំនួននោះទេ សំខាន់គិតពីគុណភាព និងគុណតម្លៃរបស់សមាជិភាព។
ក្នុងនោះដែរ ដើម្បីពង្រីកសមាជិកភាពឱ្យកាន់តែច្រើន និងមានគុណភាព ឯកឧត្តម បានស្នើដល់ការិយាល័យកាយរឹទ្ឋិរាជធានីខេត្ត និងតាមបណ្តាមន្ទីរអប់រំយុវជននិងកីឡា ទាំងអស់ត្រូវពង្រឹងសមត្ថភាពមេដឹកនាំកាយរឹទ្ឋិ និងត្រូវមានផែនការសកម្មភាពជាក់ស្តែង សម្រាប់ពង្រីកសមាជិកភាពនៅតាមសាលារៀនតាមរយៈ ក្រុមប្រឹក្សាយុវជន និងក្រុមប្រឹក្សាកុមារ រៀបចំទិញកន្សែង យកទៅបំពាក់ដោយមិនចាំបាច់ឯកសណ្ឋាន តែបើសមាជិកណាមានលទ្ឋភាពអាចទិញដោយខ្លួនឯងបានជាការប្រសើរ និងសហការជាមួយវិស័យឯកជនដើម្បីផលិតឯកសណ្ឋានកាយរឹទ្ឋិ និងបណ្តុះបណ្តាលក្រុមតន្ត្រីកាយរឹទ្ឋតាមវិទ្យាល័យនិងអនុវិទ្យាល័យនានា។
សូមជម្រាបថា វគ្គបណ្តុះបណ្តាលមេដឹកនាំកាយរឹទ្ឋិជាន់ខ្ពស់ជំនាន់ទី២ រយៈពេល៧ថ្ងៃនេះ ប្រារព្ធឡើងនៅសាលាពលទាហានទី៤ ស្រុកបន្ទាយស្រី ខេត្តសៀមរាប និង មានសមាជិកភាពកាយរឹទ្ឋិជាតិកម្ពុជាចំនួន៦៤រូប មកពីនាយកដ្ឋានសហប្រតិបត្តិការកាយរឹទ្ឋិ មន្ត្រីទទួលបន្ទុកកិច្ចការកាយរឹទ្ឋិកម្មថ្នាក់រាជធានីខេត្ត មន្ត្រីមកពីគណៈកម្មាធិការប្រតិបត្តិការជាតិ និងកាយរឹទ្ឋិរៀមច្បងនៃកាយរឹទ្ឋិជាតិកម្ពុជា។ ក្រោយបញ្ចប់វគ្គនេះ សិក្ខាកាមទាំងអស់ត្រូវសរសេរនិក្ខេបបទ និងរបាយការណ៍កម្មសិក្សារយៈ១២ខែ ដើម្បីបង្កើតនិងគ្រប់គ្រងដំណើរការកងឯកភាពនៅមូលដ្ឋានរបស់ខ្លួនដើម្បីទទួលបាន ប័ណ្ណសញ្ញាឈើពីរកំណាត់ ដែលទទួលស្គាល់ថាជាគ្រូឧទ្ទេសកាយរឹទ្ឋិ ស្របតាមគោលនយោបាយបណ្តុះបណ្តាលរបស់អង្គការពិភពលោកនៃចលនាកាយរឹទ្ឋិនិងកាយរឹទ្ឋិជាតិកម្ពុជា ។ ដោយឡែក សម្រាប់ជំនាន់ទី២នេះ ជាប្រវត្តិសាស្ត្រលើកទី១ ដែលនាយកដ្ឋានសហប្រតិបត្តិការកាយរឹទ្ឋិជាតិកម្ពុជា បានរៀបចំដោយប្រើប្រាស់ធនធានមនុស្ស សម្ភារៈនិងបច្ចេកទេសដោយខ្លួនឯង និងត្រូវបានទទួលស្គាល់លើវិញ្ញាបនបត្រ ដោយអង្គការពិភពលោកនៃចលនាកាយរឹទ្ឋិប្រចាំតំបន់អាស៊ីប៉ាស៊ីហ្វិក ខណៈដែលវគ្គបណ្តុះបណ្តាលមេដឹកនាំកាយរឹទ្ឋិជាន់ខ្ពស់ជំនាន់ទី១ បានរៀបចំឡើងនៅឆ្នាំ២០០៩ ដោយអង្គការពិភពលោក នៃចលនាកាយរឹទ្ឋិប្រចាំតំបន់អាស៊ីប៉ាស៊ីហ្វិក។
គួររំលឹកថា កាយរឹទ្ឋិជាតិកម្ពុជាបង្កើតឡើងនៅខែកញ្ញា ឆ្នាំ២០០៥ កាយរឹទ្ឋិជាតិកម្ពុជា ចូលរួមលើការងារអប់រំ និងការងារស្ម័គ្រចិត្ត ដោយចូលរួមបម្រើ និងជួយការងារសង្គមតាមរយៈការអប់រំ និងបណ្តុះបណ្តាលយុវជន និងកុមារ ឲ្យកែប្រែឥរិយាបទមិនគប្បីជាមួយសង្គម អប់រំសីលធម៌ គុណធម៌ និង បណ្តុះការគិតជាវិជ្ជាមានដល់យុវជននិងកុមារ ចៀសវាង ការគិតបែបស្រមើស្រមៃផ្តេសផ្តាស តាមវិធីបណ្តុះបណ្តល អប់រំ និងតម្រង់ទិស។ល។ កាយរឹទ្ឋិជាតិកម្ពុជា ក៏មានកាតព្វកិច្ច សង្គ្រោះមនុស្សគ្រប់កាលៈទេសៈ ដោយមិនប្រកាន់និន្នាការ នយោបាយ ពូជសាសន៍ពណ៌សម្បុរ សាសនាឡើយ។ សមាជិកភាពនៃ កាយរឹទ្ឋិជាតិកម្ពុជា ត្រូវមានគុណធម៌ ឈរលើ ភាពស្មោះត្រង់ ចិត្តបរិសុទ្ឋ និងភក្តីភាព។
អត្ថបទ និងរូបភាព៖ លោក យូ វង្ស
កែសម្រួលអត្ថបទ៖ លោក សេង ផល្លី
