រដ្ឋមន្ត្រីក្រសួងអប់រំ យុវជននិងកីឡា មានប្រសាសន៍ថា ការអភិវឌ្ឍជាតិ គឺជាសាក្សីបង្ហាញអំពីឥទ្ធិពលនៃសន្តិភាព !
ម្ភៃឆ្នាំក្រោយការបញ្ចប់សង្គ្រាម នៅគ្រប់បណ្តារាជធានី-ខេត្តទូទាំងប្រទេស បានប្រែក្លាយពីភាពខ្ទេចខ្ទាំ ទៅជាការអភិវឌ្ឍលើគ្រប់វិស័យ ដែលក្នុងនោះរួមមានវិស័យអប់រំសិក្សាធិការជាតិផងដែរ ។ សមិទ្ធផលទាំងនោះ គឺជាសាក្សីបង្ហាញច្បាស់អំពីការរីកចម្រើនដែលបានមកពីឥទ្ធិពលនៃម្លប់សន្តិភាព ក្រោមការដឹកនាំរបស់សម្តេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា ដែលជាស្ថាបនិកសន្តិភាព ដ៏ឈ្លាសវៃ ។
ឯកឧត្តម បណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡា ថ្លែងបង្ហាញយ៉ាងដូច្នេះ នៅក្នុងពិធីបំពាក់គ្រឿងឥស្សរិយយសការងាររបស់រាជរដ្ឋាភិបាល ជូនចំពោះមន្ត្រីអប់រំ ប្រមាណជាង ៦០០នាក់ នារសៀលថ្ងៃទី១៦ ខែមីនា ឆ្នាំ២០១៩ នៅសាលាគរុកោសល្យនិងវិក្រឹតការខេត្តសៀមរាប ។
ឯកឧត្តម បានរំលឹកឲ្យដឹងអំពីតំណាក់កាលរីកចម្រើននៃវិស័យអប់រំនៅកម្ពុជា ដោយបញ្ចាក់ថា ៖ វិស័យអប់រំបានចាប់ផ្តើមពីកំណែទម្រង់៨ចំណុច នៅក្នុងខែកញ្ញា ឆ្នាំ២០១៣ រហូតដល់ឆ្នាំ២០១៥ ក្រសួងបានដាក់ចេញនូវអទិភាពកំណែទម្រង់ចំនួន៥សំខាន់ៗ ដែលជាសសរស្តម្ភនៃកំណែទម្រង់គ្រូបង្រៀន ។ ទី១ ប្រាក់បៀវត្សរ៍របស់គ្រូបង្រៀនត្រូវបានតម្លើង៣ដងកន្លងមកហើយ ហើយនៅក្នុងខែមេសាខាងមុខ នឹងត្រូវតម្លើងបន្ថែមទៀត ពី ៤០ម៉ឺនរៀល ដល់ ១លាន ២សែនរៀល ។ ទី២ គឺការធ្វើអធិការកិច្ចនៅតាមសាលារៀន ដើម្បីពង្រឹងការងារដឹកនាំ ការងារគ្រប់គ្រងរបស់នាយក ការបង្រៀនរបស់គ្រូ ការសិក្សារបស់សិស្ស ការចូលរួមរបស់សហគមន៍មាតាបិតាសិស្សលើការគ្រប់គ្រងរបស់សាលារៀន ។ ទី៣ វាយតម្លៃការសិក្សារបស់សិស្ស ។ ទី៤ ការពិនិត្យឡើងវិញនូវកម្មវិធីសិក្សា និងទី៥ កំណែទម្រង់ឧត្តមសិក្សា ។
ឯកឧត្តមរដ្ឋមន្ត្រីក្រសួងអប់រំ បាបបន្ថែមថា នៅក្នុងអាណត្តិថ្មីនេះ រាជរដ្ឋាភិបាលធ្វើកំណែទម្រង់បន្តទៀត ដែលផ្តោតទៅលើអទិភាពថ្មីចំនួន២ ទី១ គឺការពង្រឹងគរុកោសល្យ ការកែលម្អហេដ្ឋារចនាសម្ព័ន្ធ ការកែលម្អការរៀននិងការបង្រៀននៅតាមបណ្តាមជ្ឈមណ្ឌលគរុកោសល្យភូមិភាគ ក៏ដូចជានៅតាមសាលាគរុកោសល្យរាជធានី-ខេត្ត ។ ក្រសួងនៅបានបង្កើតវិទ្យាស្ថានគរុកោសល្យចំនួន២កន្លែងថែមទៀត មួយនៅរាជធានីភ្នំពេញ និង មួយកន្លែងទៀតនៅខេត្តបាត់ដំបង ដើម្បីចាប់ផ្តើមបណ្តុះបណ្តាលគ្រូបង្រៀនកម្រឹតមូលដ្ឋាន កម្រឹតបឋម ១២បូក២ ទៅ ១២បូក៤ ។ ចំណុចទី២ គឺការពង្រឹងការគ្រប់គ្រងតាមសាលារៀន ហើយកន្លងមកនេះ តាមបណ្តាខេត្ត-រាជធានីទាំង២៥ ក្រសួងអប់រំបានជ្រើសរើសសាលាចំនួន១០០ ដើម្បីពង្រឹងការអនុវត្តគម្រោង ពង្រឹងការគ្រប់គ្រងសាលារៀនឲ្យមានប្រសិទ្ធភាពខ្ពស់ ។
ក្នុងរយៈពេលជាង១ឆ្នាំកន្លងមកនេះ ក្រសួងបានកត់សម្គាល់ឃើញថា មានការកែលម្អបានយ៉ាងប្រសើរ នៅតាមបណ្តាសាលារៀនមួយចំនួន ។ ដោយផ្អែកលើលទ្ធផលខាងលើ ក្រសួងបន្តពង្រឹងការជួយគាំទ្រ ផ្គត់ផ្គង់សាលារៀន តាមរយៈនៃការបង្កើតគណកម្មការគ្រប់គ្រងសាលារៀន ដោយមានការចូលរួមពីសំណាក់អាជ្ញាធរមូលដ្ឋាន្ ការចូលរួមពីសំណាក់អាណាព្យាបាល មាតាបិតាសិស្ស គ្រូបង្រៀន និង ការចូលរួមពីសំណាក់ក្រុមប្រឹក្សាកុមារជាដើម ។
ដោយឡែក ការអនុវត្តកម្មវិធីសិក្សាថ្មី ក្រសួងបានចាប់ផ្តើមបណ្តុះបណ្តាលគ្រូឧទ្ទេសថ្នាក់ជាតិ អនុវត្តវិធីសាស្ត្របង្រៀនតាមបែបត្រិះរិះ ដើម្បីឲ្យសិស្សមានសមត្ថភាព ប្រណាំងប្រជែងបានជាមួយបណ្តាប្រទេសក្នុងតំបន់ ដោយផ្តោតការយកចិត្តទុកដាក់ទៅលើការបង្រៀនភាសាបរទេស ៕
អត្ថបទ និងរូបភាព៖ លោក ងិន គឺមឡេង និងលោក យូ វង្ស
