កាលពីចុងសប្តាហ៍ថ្មីៗនេះ មន្ទីរអប់រំយុវជននិងកីឡាខេត្តសៀមរាប បានរៀបចំពិធីបំពាក់គ្រឿងឥស្សរិយយសជូនមន្ត្រី នៃមន្ទីរអប់រំ យុវជន និងកីឡា ខេត្តសៀមរាប ចំនួន៦១០រូប នៅសាលាគរុកោសល្យ និងវិក្រិតការខេត្ត ក្រោម អធិបតីភាពដ៍ខ្ពង់ខ្ពស់ ឯកឧត្តម បណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡា និងលោកស្រីយូ សុភា អភិបាលរងខេត្ត ព្រមទាំងវត្តមានឯកឧត្តម រដ្ឋលេខាធិការ អនុរដ្ឋលេខាធិការ និងប្រតិភូអមដំណើរ ចូលរួមជាច្រើនរូបផងដែរ។
ក្នុងសេចក្តីរាយការណ៍របស់ លោក សយ ទិត្យាវង្ស ប្រធានមន្ទីរអប់រំ យុវជន និងកីឡាខេត្តសៀមរាបបានឲយដឹងថា៖ តាមរយៈការអនុវត្តគោលនយោបាយ នៃផែនការយុទ្ធសាស្ត្រវិស័យអប់រំ ដែលធានាការអប់រំមានគុណភាព ប្រកបដោយសមធម៌ និងបរិយាបន្ន និងលើកកម្ពស់ឱកាសសិក្សាពេញមួយជីវិតសម្រាប់ទាំងអស់គ្នា ព្រមទាំងធានាភាពស័ក្តិសិទ្ធនៃភាពជាអ្នកដឹកនាំ និងគ្រប់គ្រងរបស់មន្ត្រីអប់រំគ្រប់លំដាប់ថ្នាក់ មន្ទីរអប់រំ យុវជន និងកីឡាខេត្តសៀមរាបបានរកគ្រប់មធ្យោបាយ គំនិតផ្តួចផ្តើម និងបានកសាងនូវលក្ខខណ្ឌចាំបាច់នានា ដើម្បីជំរុញឱ្យ វិស័យអប់រំ យុវជន និងកីឡា តម្រង់ឆ្ពោះទៅកាន់ភាពជោគជ័យ ព្រមទាំងឆ្លើយតបទៅនឹងគោលដៅអភិវឌ្ឍន៍ប្រកបដោយចីរភាពឆ្នាំ២០១៥-២០៣០។
លោកស្រី យូ សុភា អភិបាលរងខេត្ត ថ្លែងថា៖ការងារអប់រំ ជាគន្លឹះមួយយ៉ាងសំខាន់បំផុត ក្នុងការកសាងធនធានមនុស្ស ដែលសង្គមទាំងមូលត្រូវចូលរួមវិនិយោគឱ្យបានខ្លាំងក្លា និងប្រើប្រាស់ពេលវេលាយូរអង្វែង ទាមទារនូវការអត់ធ្មត់ និងស្មារតីទទួលខុសត្រូវខ្ពស់។ ការបណ្តុះបណ្តាលធនធានមនុស្ស គឺផ្តើមចេញពីការកសាងសមត្ថភាព ការអប់រំ សីលធម៌ ការអប់រំបំណិនជីវិត ដើម្បីឱ្យកុមារ យុវជន មានសមត្ថភាពពេញលេញ ក្លាយជាទំពាំងស្នងឬស្សី ដែលជាអ្នកបន្តវេន ក្នុងការកសាង និងអភិវឌ្ឍសង្គមជាតិនាពេលអនាគត។
លោកស្រីអភិបាលរងខេត្តបន្តទៀតថា៖ វិស័យអប់រំ នៅក្នុងខេត្តសៀមរាបមានការរីកចម្រើនគួរឱ្យកត់សម្គាល់ និងទទួលបានការកោតសរសើរពីគ្រប់មជ្ឈដ្ឋាន ជាក់ស្តែងលទ្ធផល នៃការប្រឡងសញ្ញាប័ត្រមធ្យមសិក្សាទុតិយភូមិ ក្នុងឆ្នាំសិក្សាកន្លងមក មានសិស្សប្រឡងជាប់បាន ៧៧ភាគរយ ក្នុងនោះនិទ្ទេសA ៣១នាក់ ស្រី១៨នាក់ ដែលអាជ្ញាធរខេត្តបានជូនរង្វាន់លើកទឹកចិត្តផងដែរ។ អាជ្ញាធរខេត្តគ្រប់លំដាប់ថ្នាក់ តែងយកចិត្តទុកដាក់ខ្ពស់ ចំពោះសិស្សពូកែដែលខ្វះលទ្ធភាព និងមានមហិច្ចិតាលើការសិក្សារៀនសូត្របន្ទាប់ពីបញ្ចប់ថ្នាក់មធ្យមសិក្សា។
អត្ថបទ និងរូបភាព៖ លោក យូ វង្ស
