ឆ្នាំ២០១៩នេះ ខេត្តសៀមរាប នឹង រៀបចំព្រឹត្តិការណ៍ <<សៀមរាបសង្ក្រាន្ត>> ដើម្បីអបអរសាទរ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរនាពេលខាងមុខ នៅក្នុងនៅបរិវេណសួនព្រះរាជដំណាក់ និងអាស្រមព្រះអង្គចេកព្រះអង្គចមក្រុងសៀមរាប នេះបើតាមប្រសាសន៍អភិបាលខេត្តសៀមរាប ឯកឧត្តម ទៀ សីហា។
ថ្លែងឲ្យដឹងកាលពីថ្ងៃទី១៨ខែមីនាឆ្នាំ២០១៩ ក្នុងពិធីបើកសន្និបាទបូកសរុបលទ្ធផលការងារឆ្នាំ២០១៨ និងលើកទិសដៅអនុវត្តបន្តឆ្នាំ២០១៩ របស់រដ្ឋបាលខេត្តសៀមរាប ឯកឧត្តម ទៀ សីហា បានមានប្រសាសន៍ថា កាលពី ៦ឆ្នាំកន្លងទៅ <<អង្គរសង្ក្រាន្ត>> គឺជាការព្រឹត្តិការណ៍របស់ថ្នាក់ជាតិ និងរៀបចំដោយសហភាពសហភាពសហព័ន្ធយុវជនកម្ពុជា ដែលមានថ្នាក់ដឹកនាំធំៗ ក្នុងជួររាជរដ្ឋាភិបាលកម្ពុជា ជាពិសេសសម្ដេចអគ្គមហាសេនាបតីតេជោ ហ៊ុន សែន និង សម្តេចគតិព្រឹទ្ធបណ្ឌិត ប៊ុន រ៉ានី ហ៊ុន សែន ក៏ដូចជាតំណាងប្រទេសជិតខាងចូលរួមផងដែរ។ ដោយឡែក នៅឆ្នាំ២០១៩ សហភាពសហព័ន្ធយុវជនខេត្តសៀមរាប សហការជាមួយអាជ្ញាធរខេត្ត រួមនិងអាជ្ញាធរអប្សរា មានកិត្តិយស ធ្វើជាម្ចាស់ផ្ទះ ក្នុងការរៀបចំព្រឹត្តិការណ៍នេះ ដោយខ្លួនឯង តាមរយៈបទពិសោធន៍រយៈពេល ៦ឆ្នាំកន្លងមក។
ឯកឧត្តម ទៀ សីហា បានបញ្ជាក់ថា បើទោះបី <<សៀមរាបសង្ក្រាន្ត>> មានការរៀបចំមិនធំដូចអង្គរសង្ក្រាន្ត ប៉ុន្តែព្រឺត្តិកាណ៍ថ្នាក់ខេត្តនេះ អាជ្ញាធរខេត្ត រួមជាមួយសហភាពសហព័ន្ធយុវជនខេត្តសៀមរាប កំពុងពិភាក្សាលើការរៀបចំកម្មវិធីកំសាន្តនានា ក្រៅពីកម្មវិធីសាសនា និងល្បែងប្រជាប្រិយដែលមានស្រាប់ រួមនិងការជ្រើសរើស ទីតាំងបន្ថែម រួមមានតាមបណ្ដាយផ្លូវស៊ីវុត្ថា និងតំបន់ផាប់ស្ទ្រីត ដើម្បីផ្ដល់ភាពសប្បាយរីករាយ រួមជាមួយសុវត្ថិភាព ដល់ប្រជាពលរដ្ឋដែលបានមកចូលរួមក្នុងព្រឺត្តិកាណ៍ប្រចាំឆ្នាំដ៏សប្បាយរីករាយនេះ។
ក្នុងព្រឹត្តិការណ៍ <<សៀមរាបសង្ក្រាន្ត>> នាពេលខាងមុខនេះ ឯកឧត្តមបានបន្ថែមថា អាជ្ញាធរខេត្តនៅតែរំពឹងថា នៅឆ្នាំនេះ ខេត្តសៀមរាបនៅតែជាទីកន្លែង ដ៏សប្បាយរីករាយសម្រាប់ប្រជាពលរដ្ឋកម្ពុជាមកពីគ្រប់ទិសទី មកអបអរសាទរ និងកំសាន្តក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរនាពេលខាងមុខនេះ ដោយសារខេត្តនេះ មានប្រាសាទ បុរាណ រមណីយដ្ឋានធម្មជាតិជាច្រើន យ៉ាងសំបូរបែប និងធានាបាននូវសន្តិសុខ សុវត្ថិភាពជូនដល់ពួកគាត់។ ជាមួយគ្នានេះ ឯកឧត្តមអភិបាលខេត្ត ក៏បានអំពាវនាវឱ្យប្រជាពលរដ្ឋនិងភ្ញៀវទេសចរទាំងអស់ដែលមកកម្សាន្តនៅខេត្តសៀមរាបសូមធ្វើដំណើរដោយមានការប្រុងប្រយ័ត្ន ជៀសវាមានគ្រោះថ្នាក់ចរាចរ និងសូមជួយថែរក្សាបរិស្ថានឱ្យបានល្អទាំងអស់គ្នា។
((ឃ្លីបសម្ភាសន៍ឯកឧត្តមទៀ សីហា))មាននៅក្នុងវីដេអូ
សូមបញ្ជាក់ថា សហភាពសហព័ន្ធយុវជនកម្ពុជា បានសហការជាមួយស្ថាប័នជាតិច្រើន បានរៀបចំព្រឹត្តិការណ៍ <<អង្គរសង្ក្រាន្ត>> អស់រយៈពេល៦ឆ្នាំមកហើយ គឺចាប់ពីតាំងពីឆ្នាំ២០១៣មកម្លេះ ហើយព្រឹត្តិការណ៍កន្លងមកនេះ បានបង្ហាញអំពីវប្បធម៌ដ៏សំបូរបែបរបស់កម្ពុជា ដែលមាននៅគ្រប់ទីកន្លែងនៃទឹកដីហើយដែលបច្ចុប្បន្នកំពុងត្រូវបានយកចិត្តទុកដាក់ស្រាវជ្រាវ រុករកយកមកថែរក្សា ការពារ អភិរក្ស និងអភិវឌ្ឍន៍។ ការលើកតម្លៃវប្បធម៌ និងទំនៀមទំលាប់ តាមរយៈការអប់រំ ការចូលរួម និងការកម្សាន្តរីករាយ នាឱកាសពីធីបុណ្យចូលឆ្នាំថ្មីក្នុងនាមជាមហាគ្រួសារខ្មែរជាមួយភ្ញៀវទេសចរជាតិ-អន្តរជាតិ ប្រកបដោយស្មារតីសាមគ្គីភាព ភារតរភាព និងសុខដុមរមនីយកម្ម។ជាពិសេសព្រឹត្តិការណ៍អង្គរសង្ក្រាន្តបានទាក់ទាញ់ភ្ញៀវទេសចរអន្តរជាតិឱ្យមកទស្សនាកម្ពុជាជាច្រើនលាននាក់ក្នុងមួយឆ្នាំៗ៕
អត្ថបទ និង រូបថត ៖ ជា ស្រស់
កែសម្រួលអត្ថបទ ៖ សេង ផល្លី
