ព្រះសពព្រះសុមង្គលសិលាចារ្យឥន្ទកេសរោ បណ្ឌិត ពេជ្រ សន អតីតព្រះមេគណខេត្តសៀមរាប នឹងត្រូវធ្វើពិធីបុណ្យ រំលាយព្រះសព នៅពីថ្ងៃទី២៣ ខែមីនា ឆ្នាំ២០១៩ បន្ទាប់ពីបានតម្កល់ព្រះសពព្រះអង្គអស់រយៈពេល ៣ឆ្នាំកន្លងមក នៅវត្តព្រះឥន្ទកោសីយ៍ ស្ថិតនៅភូមិទ្រាំង សង្កាត់ស្លក្រាម ក្រុងសៀមរាប ដែលមានការចូលរួមដង្ហែប្រមាណពីប្រជាពុទ្ធបរិស័ទប្រមាណ ៩ពាន់អង្គ។
បន្ទាប់ពីបានពិគ្រោះយោបល់ និងសម្រេចជារួម ដោយព្រះមេគណខេត្ត អនុគណក្រុង ឯកឧត្តមអ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប អាជ្ញាធរមូលដ្ឋាន ព្រះគ្រូចៅអធិការវត្ត គណៈកម្មការវត្ត និង ពុទ្ធបរិស័ទចំណុះជើងវត្ត ព្រះសពអតីតព្រះមេគណខេត្តសៀមរាប ត្រូវបានដង្ហែ និងតម្កល់រងចាំពិធីរំលាយព្រះសព កាលពីថ្ងៃទី១៨ ខែមីនា ឆ្នាំ២០១៩ម្សិលមិញនេះ។
ក្នុងពិធីដង្ហែព្រះសពនេះ ពុទ្ធបរិស័ទ បានរៀបចំធ្វើពិធីរំកិលព្រះសព ដង្ហែប្រទក្សិណចេញពីទីវត្តព្រះឥន្ទកោសីយ៍ ទៅតាមដងវិថីនានាក្នុងក្រុងសៀមរាប ដោយមានប្រជាពុទ្ធបរិស័ទ បានចេញមករងចាំដង្ហែជូនដំណើរព្រះអង្គ ជាកិច្ចគោរពប្រតិបត្តិនាចុងក្រោយរបស់ព្រះអង្គ រហូតដល់ក្បួនត្រឡប់មកដល់វត្តព្រះឥន្ទកោសីយ៍វិញ និង ធ្វើការប្រទក្សិណ៣ជុំ ជុំវិញព្រះមេរុ ទើបបានរំកិលព្រះសពយកទៅដាក់ តម្កល់នៅលើព្រះមេរុ ដើម្បីធ្វើបុណ្យទៅតាមប្រពៃណីព្រះពុទ្ធសាសនា ក្នុងរយៈពេល៧ថ្ងៃ ចាប់ពីថ្ងៃទី១៨ ដល់ទី២៤ មីនាឆ្នាំ២០១៩នេះ ជាកិច្ចបង្ហើយបុណ្យ។
ព័ត៌មានជាតិ ថ្មីៗ
គួររំលឹកថា ព្រះសពព្រះសុមង្គលសិលាចារ្យឥន្ទកេសរោ បណ្ឌិត ពេជ្រ សន ប្រសូតនៅថ្ងៃទី០១ ខែកុម្ភៈ ឆ្នាំ១៩៣២ នៅភូមិតូច ឃុំរំចេក ស្រុកបាភ្នំ ខេត្តព្រវែង មានបងប្អូន៧នាក់ ប្រុស៤ ស្រី៣ ហើយព្រះអង្គជា បុត្រទី៦។ ព្រះអង្គ ពុំធ្លាប់មានប្រពន្ធកូនទេ។ ព្រះអង្គ បានទទួលអនិច្ចធម្ម កាលពីថ្ងៃទី១៨ ខែធ្នូ ឆ្នាំ២០១៥ ក្នុងព្រះជន្មាយុ ៨២ព្រះវស្សា ដោយព្រះរាគាពាធ។
ក្នុងនាមជាចៅអធិការវត្តព្រះឥន្ទកោសីយ៍ ព្រះសុមង្គលសិលាចារ្យឥន្ទកេសរោ បណ្ឌិត ពេជ្រ សន បានដឹក នាំភិក្ខុសង្ឃ សាមណេរ និងពុទ្ធបរិស័ទចំណុះជើងវត្តប្រកបដោយភាពជោគជ័យ និងខ្ជាប់ខ្ជួន នៅក្នុងវិស័យព្រះពុទ្ធសាសនា ហើយបានបន្សល់នូវស្នាព្រះហស្ថយ៉ាងច្រើន រហូតទទួលបានការតែងតាំងឋានៈ និងប្រគេនបណ្ណកិត្តិយសពីសំណាក់ថ្នាក់ដឹកនាំសង្ឃ រាជរដ្ឋាភិបាល និងបរទេសទៀតផង។ ក្រៅពីសមិទ្ធផលផ្នែកសាសនា ព្រះមេគណខេត្តក៏បានចូលរួមក្នុងសកម្មភាពថែរក្សា ការពារ គ្រប់គ្រង និងអភិរក្សបេតិកភណ្ឌដូនតានៅលើទឹកដីអង្គរផងដែរ។
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ សេង ផល្លី
