ដើម្បីផ្ដល់ភាពងាយស្រួល និងកាត់បន្ថយចំណាយរបស់ប្រជាពលរដ្ឋ ក្នុងការទទួលសេវាសាធារណៈ រាជរដ្ឋាភិបាល កម្ពុជា បានសម្រេចបង្កើតឲ្យមានអង្គភាពច្រកចេញចូលតែមួយ នៅតាមសាលាខេត្តនានា ដែលអង្គភាពមួយនេះ អនុញ្ញាតឲ្យប្រជាពលរដ្ឋអាចមកទទួលសេវាដោយផ្ទាល់ ដោយមិនចាំបាច់ពឹងអ្នករត់ការដូចមុននោះទេ ហើយការចំណាយរបស់គាត់តិច និងទទួលបានសេវាឆាប់រហ័សផងដែរ។
នេះបើតាមប្រសាសន៍ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ កាលពីថ្ងៃទី១៩ ខែមីនា ឆ្នាំ២០១៩ ក្នុងពិធីបិទសន្និបាទបូលសរុបលទ្ធផលការងារឆ្នាំ២០១៨ និងលើកទិសដៅឆ្នាំ២០១៩របស់រដ្ឋបាលខេត្តសៀមរាប។
សម្តេចបានបញ្ជាក់ថា បច្ចុប្បន្ននេះអង្គភាពច្រកចេញចូលតែមួយនៅសាលាខេត្ត និងការិយាល័យច្រកចេញចូលតែមួយនៅតាមបណ្តាក្រុង ស្រុក ខណ្ឌ នៅទូទាំងប្រទេស បាននិងកំពុងតែសម្រួលការងារដល់ប្រជាពលរដ្ឋជាច្រើន ទាំងការកាត់បន្ថយពេលវេលា ថវិកា ជាដើម។
សម្តេចបានជម្រុញឲ្យអាជ្ញាធរខេត្តសៀមរាប ត្រូវខិតខំសម្របសម្រួលជាមួយមន្ទីរជំនាញពាក់ព័ន្ធ ដើម្បីពន្លឿនការផ្ទេរសេវា ដែលនៅសេសសល់ឲ្យមកអង្គភាពច្រកចេញចូលតែមួយ នៅសាលាខេត្ត រួមទាំងផ្តល់ការគាំទ្របច្ចេកទេស ការកសាងសមត្ថភាពនៃការផ្តល់សេវាទាំងនេះឲ្យកាន់តែមាន តម្លាភាព គណនេយ្យភាព និងមានប្រសិទ្ធភាពខ្ពស់ ជូនប្រជាពលរដ្ឋ។
ឯកឧត្តម ទៀ សីហា អភិបាលខេត្តសៀមរាប បានមានប្រសាសន៍ថា បច្ចុប្បន្ននេះនៅខេត្តសៀមរាប មានអង្គភាពច្រកចេញចូលតែមួយចំនួន១ និងការិយាល័យច្រកចេញចូលតែមួយ នៅតាមបណ្តាក្រុង ស្រុក ចំនួន៣ កំពុងតែដំណើរការផ្តល់សេវាជូនប្រជាពលរដ្ឋ គឺមាននៅក្រុងសៀមរាប ស្រុកពួក និងស្រុកជីក្រែង។ ហើយនៅក្នុងឆ្នាំ២០១៩នេះមានគម្រោងបង្កើតការិយាល័យច្រកចេញចូលតែមួយចំនួន២ទៀត គឺនៅស្រុកសូទ្រនិគម និងស្រុកក្រឡាញ់។និងនៅឆ្នាំ២០២០មានគម្រោងបង្កើតការិយាល័យច្រកចេញចូលតែមួយចំនួន២ទៀត គឺនៅស្រុកបន្ទាយស្រី និងស្រុកប្រាសាទបាគង។
ឯកឧត្តមអភិបាលខេត្ត បានពន្យល់ថា ចំពោះអង្គភាពច្រកចេញចូលតែមួយរបស់រដ្ឋបាលខេត្តសៀមរាប ដែលទើបដាក់ឲ្យដំណើរការកាលពីឆ្នាំ២០១៨មកនេះ គឺមានសេវារដ្ឋបាលដែលបានប្រតិភូកម្មមានចំនួន១៤វិស័យ និងសរុបចំនួនជាង៣៧០ប្រភេទសេវា វិស័យទាំង១៤នេះ គឺមាន១ ការងារនីត្យានុកូលកម្ម (ការបញ្ជាក់លើឯកសារថតចម្លង)២ ការងាររដ្ឋបាល ៣ វិស័យសុខាភិបាល ៤ វិស័យទេសចរណ៍ ៥ វិស័យសាធារណការ និងដឹកជញ្ជូន ៦វិស័យវប្បធម៌ និងវិចិត្រសិល្បៈ ៧ វិស័យព័ត៌មាន ៨ វិស័យបរិស្ថាន ៩ វិស័យឧស្សាហកម្ម និងសិប្បកម្ម ១០វិស័យរ៉ែ និងថាមពល ១១ វិស័យពាណិជ្ជកម្ម១២ វិស័យរៀបចំដែនដី នគរូបនីយកម្ម និងសំណង់ ១៣ វិស័យកសិកម្ម រុក្ខាប្រមាញ់ និងនេសាទ និង១៤ វិស័យការងារ និងបណ្ដុះបណ្ដាលវិជ្ជាជីវៈ។សេវាតាមវិស័យនីមួយៗត្រូវអនុត្តតាមការកំណត់ក្នុងតារាងឧបសម្ព័ន្ធ នៃប្រកាសអន្តរក្រសួង រវាងក្រសួង ស្ថាប័នពាក់ព័ន្ធនីមួយៗ ជាមួយក្រសួងសេដ្ឋកិច្ច និងហិរញ្ញវត្ថុ រួមទាំងក្របខ័ណ្ឌពេលវេលា។
ឯកឧត្តម ទៀ សីហា ក៏បានអំពាវនាវដល់ប្រជាពលរដ្ឋ សូមមកទទួលសេវានៅអង្គភាពច្រកចេញចូលតែមួយតាមវិស័យ និងតាមសេវារដ្ឋបាល នៅថ្នាក់ក្រោមជាតិទាំងនេះ ដើម្បីទទួលបានសេវាឆាប់រហ័ស និងប្រកបដោយប្រសិទ្ធភាព និងតម្លាភាពខ្ពស់ ដែលរាជរដ្ឋាភិបាលកម្ពុជា បានកំពុងគិតគូរប្រកបដោយគតិបណ្ឌិត ក្នុងការផ្ដល់សេវាជូនប្រជាពលរដ្ឋ និងសាធារណជនទូទៅ ដើម្បីចូលរួមចំណែកក្នុងការអភិវឌ្ឍនូវគោលនយោបាយប្រទេស ប្រកបដោយនិរន្តរភាព៕
អត្ថបទ និងរូបភាព៖ លោក ឃុត សៅ
កែសម្រួលអត្ថបទ៖ លោក សេង ផល្លី
