បុរសជនជាតិជប៉ុន ២នាក់ ដែលធ្វើសកម្មភាពអារកសម្លាប់ ប្លន់យករថយន្តពីអ្នករត់តាក់ស៊ីនោះ ត្រូវបានលោកជូ លឹមហ៊ាង ចៅក្រមស៊ើបសួរសាលាដំបូងខេត្តសៀមរាប សម្រេចចេញដីកាឃុំខ្លួនជាបណ្ណោះអាសន្ន នៅរសៀលថ្ងៃទី១៩ ខែមីនា ឆ្នាំ២០១៩ ក្រោមបទចោទប្រកាន់ ឃាតកម្មគិតទុកជាមុន។
ការសម្រេចឃុំខ្លួនជាបណ្តោះអាសន្នលើបុរសជនជាតិជប៉ុនទាំង២នាក់ បន្ទាប់ពីពួកគេធ្វើសកម្មភាពអារកប្លន់សម្លាប់លើបុរសអ្នកបើកបររថយន្តតាក់ស៊ីម្នាក់ ឈ្មោះ ហ៊ឹម ចាន់ កាលពីវេលាម៉ោងប្រមាណ ៥ល្ងាច ថ្ងៃទី១៧ ខែមីនា ឆ្នាំ២០១៩ ស្ថិតនៅចំណុចលើកំណាត់ផ្លូវជាតិលេខ៦ ត្រង់ចំណុចជញ្ជីញថ្លឹងរថយន្ត ក្នុងទឹកដីភូមិគោកដូង ឃុំពួក ស្រុកពួក ខេត្តសៀមរាប ។
តាមប្រភពពីសមត្ថកិច្ចជំនាញបានប្រាប់ថា បន្ទាប់ពីធ្វើសកម្មភាព កម្លាំងរបស់អធិការនគរបាលស្រុកពួក ខេត្តសៀមរាប បានឃាត់ខ្លួនជនជាតិជប៉ុនចំនួនទាំងពីរនាក់បានភ្លាមៗ រួចបញ្ជូនយកមកការិយាល័យនគរបាលកម្រិតធ្ងន់ នៃស្នងការនគរបាលខេត្តដើម្បីកសាងសំណុំរឿង តាមនីតិវិធី។
ជនសង្ស័យទាំងពីរនាក់មាន ទី០១ឈ្មោះ ឈ្មោះ អ៊ីស៊ីដា រ៉េមុន (ISHIDA REIMON) ភេទប្រុស អាយុ២៤ឆ្នាំ ,ទី០២ឈ្មោះ ណាកា គុគី រីយូជី (NAKA KUKI RYUJI) ភេទប្រុស អាយុ២៤ឆ្នាំ បានចូលមកប្រទេសកម្ពុជាតាមច្រកអន្តរជាតិប៉ោយប៉ែត ខេត្តបន្ទាយមានជ័យ។
យោងតាមប្រភពពីសមត្ថកិច្ចបានឲ្យដឹងថា យោងតាមចម្លើយសារភាព របស់ជនសង្ស័យបានប្រាប់ថា លុះព្រឹកថ្ងៃទី១៧ ខែមីនា ឆ្នាំ២០១៩ វេលាម៉ោង ១២ថ្ងៃត្រង់ ពួកគេបានរកតាក់ស៊ី ជិះទៅក្រុងសិរីសោភ័ណ្ឌ ខេត្តបន្ទាយមានជ័យ ក្នុងគោលបំណងរកឡានតាក់ស៊ី ដែលមានសភាពថ្មី ដើម្បីប្លន់យកទៅប្រើប្រាស់។ លុះពេលទៅដល់ ពួកគេក៏បានជួលរថយន្តជនរងគ្រោះ ម៉ាកហាយឡែនឌ័រ ពណ៏ស្ករ ស្លាកលេខ ២AB ៥២១៨ ដោយពួកគេប្រាប់ថា ចង់ទៅខេត្តសៀមរាប និងបានចរចារត្រូវគ្នាក្នុងតម្លៃ៣០ដុល្លារ ។
ពេលជិះដល់ចំណុចកើតហេតុ ពួកគេបានប្រាប់តាក់ស៊ីឱ្យឈប់ ហើយ ឈ្មោះ ឈ្មោះ អ៊ីស៊ីដា រ៉េមុន (ISHIDA REIMON) បានបើកទ្វារចុះ ដើម្បីមើលផ្លូវ ដោយទុកឱ្យបក្ខពួកខ្លួនធ្វើសកម្មភាពអារកប្លន់សម្លាប់យករថយន្ត។ បន្ទាប់ពីធ្វើសកម្មភាពរួច ពួកគេក៏បានបើកទ្វាររថយន្តទម្លាក់ជនរងគ្រោះមកលើផ្លូវ។ ភ្លាមៗជនសង្ស័យទាំងពីរនាក់ក៏បានឡើងរថយន្ត បើកចេញពីកន្លែងកើតហេតុ ។ ប៉ុន្តែបានប្រហែល ៣០០ម៉ែត្រ រថយន្តក៏ជ្រុលទៅបុកគោយន្តកន្ត្រៃដឹកស្រូវ បណ្តាលឲ្យទៅមុខលែងរួច។
យោងតាមសមត្ថកិច្ចស្រុកពួក បានឲ្យដឹងថា បន្ទាប់ពីទទួលបានសេចក្តីរាយការណ៍ពីករណីឃាតកម្មនេះ សមត្ថកិច្ចបានតាមចាប់ជនដៃដល់ បានភ្លាមៗ និងបញ្ជូនមកកាន់ស្នងការដ្ឋានខេត្តសៀមរាប ដើម្បីចាត់ការបន្ត។ បន្ទាប់ពីបញ្ចប់ការសាកសួរ នៅព្រឹកថ្ងៃទី១៩ ខែមីនា ឆ្នាំ២០១៩ កម្លាំងនគរបាលខេត្តសៀមរាប ក៏បានបញ្ជូនអ្នកទាំងពីរមកកាន់សាលាដំបូងខេត្តសៀមរាប ហើយចៅក្រមសាលាដំបូងក៏សម្រេចចេញដីកាឃុំខ្លួននៅរសៀលថ្ងៃដដែល៕
អត្ថបទ និងរូបភាព៖ លោក ជា ស្រស់ និង លោក ខេង ឧត្តម
កែសម្រួលអត្ថបទ៖ លោក សេង ផល្លី
