នៅរសៀលថ្ងៃទី២០ ខែមីនា ឆ្នាំ២០១៩ សម្តេចព្រះអគ្គមហាសង្ឃរាជាធិបតីឧទ្ទេសបណ្ឌិត ទេព្យ វង្ស បាននិមន្ត និងពិនិត្យមើល សកម្មភាពសាងសង់នូវគម្រោងអភិវឌ្ឍន៍ “មជ្ឈមណ្ឌលវប្បធម៌សន្តិភាព” ដែលមានទីតាំងនៅទំនប់៧៨ ស្ថិតក្នុងសង្កាត់ជ្រាវ ក្រុងសៀមរាប ខេត្តសៀមរាប។
ក្នុងនាមព្រះអង្គជាម្ចាស់គម្រោង និងជាព្រះប្រធានកិត្តិយស ស្របតាមខ្លឹមសារនៃលិខិតលេខ ៩៤៩ ស.ជ.ណ ចុះថ្ងៃ ២០ សីហា ឆ្នាំ២០១៥ របស់ទីស្តីការគណ:រដ្ឋមន្ត្រីបានអនុញ្ញាតឲ្យអនុវត្តន៍គម្រោង”មជ្ឈមណ្ឌលវប្បធម៌សន្តិភាព” នេះទៅតាមផ្លូវច្បាប់ជាធរមាន ។ ក្រោយមកគម្រោងនេះត្រូវបាន ប្រគល់សិទ្ធិ ជូន លោក គង់ មង្គល ដែលជាទីប្រឹក្សាផ្ទាល់របស់សម្តេចព្រះមហាសង្ឃរាជ និងជាប្រធានសហគមន៍ជ្រាវ ដើម្បីសហការជាមួយអាជ្ញាធរ-ស្ថាប័នពាក់ព័ន្ធគ្រប់ជាន់ថ្នាក់ និងចាត់ចែងការកសាងអោយបានសម្រេចជាស្ថាពរ តាមផែនការមេនៃគម្រោងទាំងមូល ។
សម្តេចព្រះមហាសង្ឃរាជ ទេព វង្ស បានមានសង្ឃដីកាថា សមិទ្ធិផលជាតិដ៏មហិមានេះនឹងរួមចំណែកក្នុងការកសាងសេដ្ឋកិច្ចជាតិ កាត់បន្ថយភាពភាពក្រីក្ររបស់ប្រជាពលរដ្ឋក្នុងខេត្ត និងប្រជាសហគមន៍ តាមរយៈសេវាកម្មទេសចរណ៍ផ្សេងៗ មិនតែប៉ុណ្ណោះគម្រោងអភិវឌ្ឍន៍នេះ នឹងមានការសាងសង់សំណង់មហាប្រាសាទអរុណសួរស្តី សារមន្ទីរ សួនច្បារ និងសំណង់រចនាបទខ្មែរដែលគួរអោយទាក់ទាញថែមទៀតផង។
សម្តេចសង្ឃរាជ ទេព វង្ស មានសង្ឃដីកាបន្ថែមថា បន្ទាប់ពីគម្រោងនេះ ត្រូវបានជាប់គាំង អស់រយៈពេល ៤ ឆ្នាំកន្លងទៅ គម្រោងនេះ នឹងនៅតែបន្តដំណើរការសាងសងជាធម្មតា ដូច្នេះយើងទាំងអស់គ្នាត្រូវរួមសហការគ្នាឲ្យបានរឹងមាំ ដើម្បីធ្វើឲ្យសមិទ្ធិផលដ៏ប្រពៃនេះទទួលបានជោគជ័យជាស្ថាពរ។
សូមបញ្ជាក់ថា គម្រោងអភិវឌ្ឍន៍ មជ្ឈមណ្ឌលវប្បធម៌សន្តិភាពនេះ គ្រោងចំណាយថវិកាសាងសង់ប្រមាណជា ៤០ លានដុល្លារអាមេរិក ដែលស្ថិតនៅជាប់ព្រំប្រទល់ ភូមិចំនួន ៥ ក្នុងសង្កាត់ជ្រាវ នៃក្រុងសៀមរាប និងមានចម្ងាយ ៣ គីឡូម៉ែត្រ ពីទីប្រជុំជនផ្សារជ្រាវ ។
អត្ថបទ និង រូបភាព ៖ លោក ស៊ាន សុផាត
កែសម្រួលអត្ថបទ៖ សេង ផល្លី
