សមត្ថកិច្ចនគរបាលខេត្តសៀមរាបបានឲ្យដឹងថា កាលពីល្ងាចថ្ងៃទី ២០ ខែមីនា ឆ្នាំ២០១៩ម្សិលមិញនេះ សមត្ថកិច្ចនគរបាលខេត្ត បានរៀបចំកសាងសំណុំរឿង បញ្ជូនខ្លួនជនសង្ស័យចំនួន ០២នាក់ រួមទាំងវត្ថុតាងទៅសាលាដំបូងខេត្ត ដើម្បីចាត់ការបន្តតាមផ្លូវច្បាប់ ក្នុងនោះមាន ៖ ១.ឈ្មោះ សាយ ឌី ភេទប្រុស ឆ្នាំកំណើត ១៩៩៦ ជនជាតិខ្មែរ មានទីលំនៅភូមិ កន្ត្រក សង្កាត់ស្វាយដង្គំ ក្រុង/ខេត្ត សៀមរាប ជាប់ពាក់ព័ន្ធនឹងករណីរក្សាទុក ជួញដូរ និងប្រើប្រាស់ដោយខុសច្បាប់នូវសារធាតុញៀន ព្រមទាំងមានសារធាតុញៀនក្នុងខ្លួន , ២-ឈ្មោះ ជាង សុវណ្ណា ភេទប្រុស ឆ្នាំកំណើត ១៩៨៧ ជនជាតិខ្មែរ មានទីលំនៅភូមិបន្ទាយចាស់ សង្កាត់ស្លក្រាម ក្រុងសៀមរាប ជាប់ពាក់ព័ន្ធករណីរក្សាទុក ជួញដូរ និងប្រើប្រាស់ ហើយមានសារធាតុញៀនក្នុងខ្លួន ។
សមត្ថកិច្ចនគរបាលខេត្តសៀមរាប បានឲ្យដឹងទៀតថា ជនសង្ស័យទាំង ០២នាក់នេះ ត្រូវបានសមត្ថកិច្ចឃាត់ខ្លួនបានក្នុងប្រតិបត្តការមួយ កាលពីវេលាម៉ោង ២១ ថ្ងៃទី១៩ ខែមីនា ឆ្នាំ២០១៩ ខណៈកំលាំងការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាប ចុះបង្ក្រាបករណីរក្សាទុកជួញដូរ និងប្រើប្រាស់ដោយខុសច្បាប់នូវសារធាតុញៀន នៅត្រង់ចំនុចភូមិ បន្ទាយចាស់ សង្កាត់ស្លក្រាម ក្រុងខេត្តសៀមរាបព្រមទាំងបានដកហូតវត្ថុតាង រួមមាន៖ ម្សៅមេតំហ្វេតាមីន ប្រភេទទឹកកកចំនួន ១០កព្ចាប់ ស្មើនឹងទម្ងន់ ៣,៥ក្រាម (ទាំងសំបក) , ឧបករណ៏ប្រើប្រាស់គ្រឿងញៀនមួយចំនួន និងទូរស័ព្ទដៃចំនួន ០២គ្រឿង ៕
អត្ថបទ និងរូបភាព៖ ថាច់ ពិសុទ្ធ
កែសម្រួលអត្ថបទ ៖អ៊ុន ណារាជ្យ
