នៅពីថ្ងៃទី២០, ២៧ និង២៩ ខែមីនា ឆ្នាំ២០១៩នេះ ក្រុមគ្រូពេទ្យស្ម័គ្រចិត្តជនជាតិជប៉ុន ចំនួន ៣នាក់ នឹងចុះពិនិត្យ និងអប់រំសុខភាពមាត់ធ្មេញឥតគិតថ្លៃ ជូនដល់សិស្សានុសិស្ស នៃសាលាបឋមសិក្សាចំនួន ៣ក្នុងក្រុងសៀមរាប ខេត្តសៀមរាប រួមានសាលាបឋមសិក្សា ស៊ូ វ៉ុន ភ្នំក្រោម សាលាបឋមសិក្សាស្ព័រធរ និងសាលាបឋមសិក្សាបន្ទាយចាស់។
តាមការឲ្យដឹងពី លោក អ៊ីន ដាក់ដាក់ ថាកាហ៊ីរុ តំណាងឲ្យប្រធានក្រុមហ៊ុន AJC ដែលជាក្រុមហ៊ុនស្របច្បាប់ នាំពលករទៅធ្វើការនៅប្រទេសជប៉ុន បានមានប្រសាសន៏ថា សុខភាពមាត់ធ្មេញគឺជាកត្តាមិនអាចមើលរំលងបាន កុមារត្រូវទទួលទាន បានគ្រប់ទើប មានកម្លាំង និងប្រាជ្ញាវាងវៃ តែបើពួកគេឈឺធ្មេញ ពួកគេពិតជាមិនចង់ទៅរៀនឡើយ។បន្ទាប់ពីទទួលបានការអនុញ្ញាតពី លោកប្រធានមន្ទីរសុខាភិបាលខេត្តសៀមរាប ក្រុមគ្រូពេទ្យស្ម័គ្រចិត្ត ជនជាតិជប៉ុន របស់យើង នៅថ្ងៃទី២០ ខែមីនា ឆ្នាំ២០១៩នេះ បានចុះមកដល់សាលាបឋមសិក្សា ស៊ូ វ៉ុន ភ្នំក្រោម ដើម្បីធ្វើការពិនិត្យ និងអប់រំអំពីសុខភាពមាត់ធ្មេញ ជូនដល់កុមារតូចៗនៅទីនេះ ក៏ដូចជាណែនាំដល់អាណាព្យាបាល ត្រូវប្រាប់ដល់កូនៗរបស់គាត់ ឲ្យចេះសម្អាតអនាម័យមាត់ធ្មេញ ជាប្រចាំមួយថ្ងៃ ៣ដងជារៀងរាល់ថ្ងៃ ទើបមិនមានរោគ និងឆ្លងជម្ងឺផ្សេងៗ។
លោកបានបញ្ជាក់ថា នៅឆ្នាំ២០១៩ នេះជាលើកទី៣ ហើយ ដែលក្រុមការងារមនុស្សធម៌របស់លោក ចុះធ្វើការផ្សព្វផ្សាយពាក់ព័ន្ធទៅនឹង ការថែរក្សាសុខភាពមាត់ធ្មេញ។ នាពេលខាងមុខ ចាប់ពីខែតុលា ឆ្នាំ២០១៩ ក្រុមការងារគ្រូពេទ្យស្ម័គ្រចិត្តជប៉ុន នឹងចុះពិនិត្យ និងអប់រំសុខភាពមាត់ធ្មេញ នៅទូទាំងប្រទេសកម្ពុជាតែម្ដង។
ព័ត៌មានជាតិ ថ្មីៗ
លោក អឿន ឆែក នាយកសាលាបឋមសិក្សា ស៊ូ វ៉ុន ភ្នំក្រោមបានថ្លែងអំណរគុណ ដល់ក្រុមគ្រូពេទ្យស្ម័គ្រចិត្តជប៉ុន ដែលបានគិតគូរដល់ សុខភាពមាត់ធ្មេញ របស់កុមារតូចៗ ក្នុងសាលារបស់លោក។ លោកនឹង ណែនាំដល់លោកគ្រូអ្នកគ្រូ ឲ្យផ្សព្វផ្សាយបន្ថែមអំពីការថែរក្សាសុខភាពមាត់ធ្មេញ ទៅដល់សិស្សានុសិស្សបន្ថែមទៀត បន្ទាប់ពីយុទ្ធនាការនេះ។
លោកស្រី សាត រន់ ដែលជាមាតាសិស្ស បាននិយាយថា បន្ទាប់ពីចូលរួមក្នុងការផ្សព្វផ្សាយអំពីការថែរក្សាសុខភាពមាត់ធ្មេញនេះ គាត់បានដឹងពីជំងឺជាច្រើនដែលបណ្ដាលមកពី មិនបានសំអាតមាត់ធ្មេញ បន្ទាប់ពីបរិភោគចំណីអាហារ ព្រមទាំងយល់ច្បាស់ថា នៅពេលឈឺមាត់ និងឈឺធ្មេញ វាធ្វើឲ្យសុខភាពមនុស្ស មានការទ្រុឌទ្រោម ប្រឈមនឹងជំងឺផ្សេងៗជាច្រើន។
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ៖ សេង ផល្លី
