នៅព្រឹកថ្ងៃទី២២ ខែមីនានេះ តំបន់ខ្លះក្នុងក្រុងសៀមរាប បានដាច់ចរន្តអគ្គិសនី ជាបន្តបន្ទាប់រួមមាន តំបន់ផាប់ស្ទ្រីត តំបន់ផ្សារចាស់ តំបន់ផ្សារលើ និងតំបន់ផ្សារក្រោមជាដើម ក្នុងនោះប្រជាពលរដ្ឋក៏បានឲ្យដឹងថា នៅតាមផ្សាទំនើប សណ្ឋាគារធំៗ មួយចំនួន បានបញ្ឆេះម៉ាស៊ីនភ្លើងបន្តបន្ទាប់គ្នាផងដែរ។
សូមជម្រាបថា អគ្គិសនីខេត្តសៀមរាប បានជូនដំណឹងកាលពីថ្ងៃ២១ ខែមីនា ឆ្នាំ២០១៩ម្សិលមិញនេះថា នៅថ្ងៃទី២២ ខែមីនានេះ ចាប់ផ្តើមពីម៉ោង ៥ព្រឹក ដល់ម៉ោង ៥ល្ងាច នៃអនុស្ថានីយ៍ទី១ ស្រុកពួក និងផ្នែកខ្លះនៃអនុស្ថានីយ៍ទី២ ស្រុកប្រាសាទបាគង ដោយសារការជួសជុល និងកែសម្រួលបរិក្ខាអគ្គិសនីមួយចំនួន នៅក្នុងប្រទេសថៃ។
ដោយឡែក អំឡុងពេលដាច់ចរន្តអគ្គិនីនេះដែរ អគ្គិសនីសៀមរាបបានជូនដំណឹងបន្ថែម នៅលើបណ្ដាញសង្គមហ្វេសប៊ុកផ្លូវការរបស់ខ្លួនថា អគ្គិសនីសៀមរាប នឹងដាក់ឲ្យការដំណើរការម៉ាស៊ីនរោងចក្រ 10 មេហ្កាវ៉ាត់ ដែលនឹងផ្គត់ផ្គង់ទីតាំងសំខាន់ៗ មួយចំនួនដូចជា មន្ទីរពេទ្យ សាលាខេត្តជាដើម។
អត្ថបទ ៖ លោក ម៉ាត់ អារីហ្វីន
កែសម្រួលអត្ថបទ៖ សេង ផល្លី
