ក្នុងឱកាសមកធ្វើទស្សនកិច្ចការងារ ដើម្បីស្វែងយល់ ពីស្ថានភាពនៃ វិស័យព័ត៌មាន នៅទូទាំងអាស៊ីអាគ្នេយ៍ ក៏ដូចជានៅក្នុងប្រទេសកម្ពុជា លោក មើម៉ូដ ខាស្មី (Mehmood Kazmi) ប្រធានផ្នែកអភិវឌ្ឍន៍ពាណិជ្ជកម្ម នៃ យូអេស អេចិនស៊ី ហ្លូបបល មីឌៀ (US Agency for Global Media) ដែលជាមន្ត្រីជាន់ខ្ពស់ របស់សហរដ្ឋអាមេរិក ដែលទើបចូលកាន់តំណែង រួមជាមួយ លោក ក្រីស ដេចឆឺត Chris Decherd ប្រធានវិទ្យុសំឡេងសហរដ្ឋអាមេរិក VOA ជាខេមរភាសា បានអញ្ជើញចូលជួបសំដែងការគួរសម និងពិក្សាការងារ ជាមួយ ឯកឧត្តម ខៀវ កាញារីទ្ធ រដ្ឋមន្ត្រី ក្រសួង ព័ត៌មាន នៅព្រឹកថ្ងៃទី ២២ ខែ មីនា ឆ្នាំ ២០១៩ ។
លោក មើម៉ូដ ខាស្មី (Mehmood Kazmi) បានបញ្ជាក់ពីគោលបំណងមកជួប ឯកឧត្តម រដ្ឋមន្ត្រី ក្រសួងព័ត៌មាន នាឱកាសនេះថា លោកចង់ធ្វើការ បើកការិយាល័យ វិទ្យុសំឡេងសហរដ្ឋអាមេរិក VOA ឡើងវិញនៅក្នុងប្រទេសកម្ពុជា ។
ទាក់ទងនិងការស្នើសុំនេះ ឯកឧត្តម រដ្ឋមន្ត្រី ខៀវ កាញារីទ្ធ បានសំដែងនូវការស្វាគមន៏ ហើយ ឯកឧត្តម បានបញ្ជាក់ដែរថា ក្នុងរយៈពេលកន្លងមកនេះ ក្រសួងព័ត៌មានកម្ពុជា មានជំហរ តែងតែមានការសម្រួល ដល់ដំណើរការងារ របស់វិទ្យុ VOA ធ្វើយ៉ាងណាឲ្យ អ្នកសារព័ត៌មាន ទាំងអស់បានបំពេញកាតព្វកិច្ច របស់ខ្លួនបានទៅដោយរលូន។ ទាក់ទងនិងបញ្ហា ពន្ធដារ ជាមួយ វិទ្យុ VOA គឺជារឿង ផ្សេងដាច់ដោយឡែក ពីក្រសួងព័ត៌មាន ប៉ុន្តែបើតាមដឹង វិទ្យុVOA បាននឹងកំពុងតែ ធ្វើកិច្ចការនេះជាមួយ ខាងអង្គភាពពន្ធដារហើយ។ ដូច្នេះ ឯកឧត្តម រដ្ឋមន្ត្រី ខៀវ កាញារីទ្ធ បាន សំដែងនូវការស្វាគមន៏ ការវិលមកជាថ្មីម្តងទៀត របស់វិទ្យុសំឡេងសហរដ្ឋ អាមេរិក VOA មកកម្ពុជា ៕
អត្ថបទ និងរូបភាព៖ ក្រសួងព័ត៌មាន
