ព្រឹត្តិការណ៍សៀមរាបសង្ក្រាន្តឆ្នាំ២០១៩ នឹងរៀបចំនៅកណ្កាលក្រុងសៀមរាប ដែលនឹងចំថ្ងៃបុណ្យចូលឆ្នាំប្រពៃណីខ្មែរជាតិ នេះបើតាមកិច្ចប្រជុំគណៈកម្មការរៀបចំ ព្រឹត្តិការណ៍សៀមរាបសង្ក្រាន្ត ដឹកនាំដោយឯកឧត្តម ទៀ សីហា អភិបាលនៃគណៈអភិបាលខេត្តសៀមរាប។
ក្នុងឱកាសនោះ អង្គប្រជុំបានធ្វើបទបង្ហាញអំពី គម្រោងរៀបចំ ភូមិអាហារនៃក្តីស្រឡាញ់ ការតាំងបង្ហាញពីតម្បាញក្រម៉ា ផលិតផលផលិតដោយស្ត្រីខ្មែរ ល្បែងប្រជាប្រិយ ការសម្ដែងសិល្បៈរបាំបុរាណខ្មែរ ។ល។ ក្នុងនោះ អាជ្ញាធរជាតិអប្សរា ក៏បានលើកផងដែរ អំពីគម្រោងនៃភូមិខ្ញុំ ដែលធ្វើការសាងសង់ នៅតាមបែបលំនៅដ្ឋានពីបុរាណកាល ក្នុងការបង្ហាញនូវពីការរស់នៅ របស់ប្រជាជនខ្មែរនាសម័យអង្គរ ។
សមាជិកនៃអង្គប្រជុំ បានធ្វើការពិភាក្សាយ៉ាងផុលផុស ដោយផ្តោតសំខាន់លើកត្តាចរាចរណ៍ សណ្តាប់ធ្នាប់ នៅជុំវិញ និង ទីកន្លែងប្រារព្ធពិធី ព្រមទាំងការផ្គត់ផ្គង់ ថាមពលអគ្គិសនី ជាពិសេសនោះ គឺបញ្ហាការប្រើប្រាស់ទឹក នៅក្នុងពិធីស្រង់ព្រះ ថ្ងៃទី១៦ មេសា ដែលជាថ្ងៃឡើងស័ក ដែលអាចនឹងជួបនូវបញ្ហាកង្វះទឹកប្រើប្រាស់ ដោយសារឆ្នាំ២០១៩នេះ នៅទូទាំងប្រទេសកម្ពុជា បានទទួលរងឥទ្ឋិពលសីតុណ្ហភាពក្តៅខ្លាំង រហូតដល់ខែឧសភា (El Nino)។
ឯកឧត្តម ទៀ សីហា បានស្នើឲ្យគ្រប់អនុគណៈកម្មការទាំងអស់ ត្រូវផ្តោតទៅលើភារកិច្ចរបស់ខ្លួន ដែលគណៈកម្មការបានប្រគល់ភារកិច្ចជូន ព្រមទាំងត្រូវធ្វើការត្រួតពិនិត្យឡើងវិញ នូវរាល់កិច្ចការដែលនៅសេសសល់ ។ ក្នុងនោះ ឯកឧត្តម ក៏បានលើកឡើងពី តុបតែងសោភណ្ឌភាពក្រុង នៅតាមដងស្ទឹង រុក្ខវិថីនានា និងរៀបចំលម្អភ្លើង តាមដងផ្លូវសាធារណៈសំខាន់ៗក្នុងក្រុងនាពេលរាត្រី។ ជាមួយគ្នានេះដែរ គ្រប់មន្ទីរ ស្ថាប័ន អង្គភាព និង វិស័យឯកជន ដែលពាក់ព័ន្ធ ត្រូវនាំគ្នាជម្រុញ និងផ្សព្វផ្សាយជាប្រចាំ ចំពោះថែរក្សា អនាម័យ បរិស្ថាន សំខាន់បង្គន់អនាម័យ និង ការរៀបចំសណ្ដាប់ធ្នាប់ នៅទីចំណតរថយន្តគ្រប់ប្រភេទ ។
ឯកឧត្តម ទៀ សីហា បានបញ្ជាក់ថា ព្រឹត្តិការណ៍សៀមរាបសង្ក្រាន្ត ធ្វើឡើងក្នុងគោលបំណង ដើម្បីរឹតនូវចំណងមិត្តភាព សាមគ្គីភាពរវាងប្រជាជាតិខ្មែរ និង ប្រជាជាតិលើសាកលលោក ។ ជាពិសេសព្រឹត្តិការណ៍នេះ នឹងបង្ហាញទៅដល់យុវជន ប្រជាពលរដ្ឋ ភ្ញៀវទេសចរណ៍ជាតិ-អន្តរជាតិ បានស្វែងយល់អំពីភាពសម្បូរបែបនៃវប្បធម៌ខ្មែរ និងអរិយធម៌ដ៏រុងរឿងនាសម័យអាណាចក្រខ្មែរ ដែលមានភស្តុតាងស្រាប់នៅលើជញ្ជាំងប្រាសាទបុរាណនានា។
បើតាមការឲ្យដឹង ពីអាជ្ញាធរខេត្តសៀមរាប បន្ទាប់ពីកិច្ចប្រជុំនេះថា អាជ្ញាធរខេត្តមិនបានហាមឃាត់ការលេងជះទឺក ក្នុងព្រឹត្តិការណ៍សៀមរាបសង្ក្រាន្តនេះឡើយ ប៉ុន្តែសូមយុវជន រួមនឹងប្រជាពលរដ្ឋចូលរួមថែរក្សាសណ្ដាប់ធ្នាប់ និងគិតពីសុវត្ថិភាព ដល់អ្នកដំណើរ ភ្ញៀវទេសចរជាតិ-អន្តរជាតិ ដែលចូលរួមក្នុងព្រឹត្តិការណ៍នេះ។
អត្ថបទ និង រូបភាព ៖ លោក គឿន វេត និងលោក យូ វង្ស
កែសម្រួលអត្ថបទ៖ សេង ផល្លី
