ប្រធានអាជ្ញាធរជាតិព្រះវិហារ បានបង្ហាញការព្រួយបារម្ភពីហានីភ័យមួយចំនូន ដែលអាចកើតមានឡើង ក្នុងតំបន់រមណីយដ្ឋានប្រាសាទព្រះវិហារ ដូចជាបទល្មើសព្រៃឈើ ភ្លើងឆេះព្រៃ និងសម្ងួតទឹកនៅប្រាសាទព្រះវិហារ ខណៈនៅទូទាំងប្រទេសកម្ពុជា កំពុងរងផលប៉ះពាល់ ដោយសាររលកកម្ដៅក្ដៅខ្លាំង។
ប្រធានអាជ្ញាធរជាតិព្រះវិហារ លោក គឹម សេដារា បានផ្ដល់បទសម្ភាសន៍ដល់អ្នកសារព័ត៌មាន ក្នុងកិច្ចប្រជុំអាយស៊ីស៊ី ព្រះវិហារ លើកទី៥ ដែលធ្វើឡើងនៅថ្ងៃទី២២ខែមីនា ឆ្នាំ២១០៩ នៅខេត្ដសៀមរាប ថា តំបន់ប្រាសាទកោះកេរ និងប្រាសាទព្រះវិហារ ហ៊ុព័ទ្ធដោយព្រៃឈើច្រើន ហើយព្រៃឈើនោះ ដែលវាកំពុងប្រឈមនឹងផល់ប៉ះពាល់ពីភ្លើងឆេះព្រៃ ដែលធ្វើឲ្យប៉ះពាល់ដល់ប្រាសាទបុរាណ។ បច្ចុប្បន្ននេះរមណីយដ្ឋានព្រះវិហារ និងប្រាសាទកោះកែរ គឺមានបញ្ហាប្រឈមមួយចំនួនដែលចាំបាច់ត្រូវតែរួមគ្នាដោះស្រាយ។
លោកបានបន្ដថា អាជ្ញាធរខ្វះទាំងថវិកា និងសំភារៈសម្រាប់ជួយសង្គ្រោះ ដូចជាឡានទឹក ហើយសម្រាប់ប្រាសាទព្រះវិហារ ពិបាកដឹកសម្ភារៈសង្គ្រោះឡើងទៅលើកំពូលភ្នំជាដើម។ ក្រៅពីភ្លើងឆេះព្រៃនេះ នៅក្នុងរមណីយដ្ឋានប្រាសាទកោះកែរ ក៏កំពុងតែប្រឈមការចូលកាប់ព្រៃ ទន្ទ្រានយកដីព្រៃធ្វើកម្មសិទ្ធ ក៏មានកើតឡើងច្រើន គួរឱ្យព្រួយបារម្ភផងដែរ។ ក្នុងនោះ ការកើនឡើងកម្រិតសីតុណ្ហភាព ក៏បានប៉ះពាល់សំណង់ប្រាសាទទាំងពីរនេះផងដែរ។
លោកបានបន្ដថា អាជ្ញាធរព្រះវិហារ នៅតែបន្តខិតខំការពារទប់ស្កាត់ ចំពោះបញ្ហាភ្លើងឆេះព្រៃ និងការចូលកាប់ព្រៃទន្ទ្រានយកដីព្រៃនៅក្នុងតំបន់បេតិកភណ្ឌ ហើយឯកឧត្តមស្នើឱ្យអាជ្ញាធរពាក់ព័ន្ធទាំងអស់ ត្រូវរួមគ្នាដោះស្រាយបញ្ហានេះឲ្យអស់ពីលទ្ធភាព ជាពិសេសអាជ្ញាធរមូលដ្ឋាន ត្រូវធ្វើការផ្សព្វផ្សាយដល់ប្រជាពលរដ្ឋឱ្យមានការយល់ដឹង និងបញ្ឈប់សកម្មភាពនានា ដែលធ្វើឱ្យប៉ះពាល់ដល់សម្បត្តិបេតិកភណ្ឌជាតិ ដែលករណីទាំងនេះ ភាគច្រើនគឺកើតឡើង ពីប្រជាពលរដ្ឋនៅក្នុងមូលដ្ឋានផ្ទាល់តែម្តង៕
សូមជម្រាបថា គណៈកម្មាធិការសម្របសម្រួលអន្ដរជាតិ សម្រាប់ការនិងអភិរក្ស និងលើតម្លៃរមណីយដ្ឋាន ប្រាសាទព្រះវិហារ ហៅកាត់ថា ICC Preah Vihear បានរៀបចំកិច្ចប្រជុំពេញអង្គលើកទី៥របស់ខ្លួន ថ្ងៃនៅថ្ងៃទី២២ខែមីនា ឆ្នាំ២១០៩រយៈពេញមួយ ដោយមានសមាជិកចូលរួម ចំនួន ៨ប្រទេស រួមមានប្រទេសចិន ប្រទេសថៃ ប្រទេសឥណ្ឌា ប្រទេសជប៉ុន បារាំង កូរ៉េខាងត្បូង ប៊ែលហ្សិក និងសហរដ្ឋអាមេរិក។
សូមជម្រាបដែរថា ក្នុងកិច្ចប្រជុំនោះ កិច្ចប្រជុំនេះផ្តោតលើការងារអភិរក្ស និងជួសជុលប្រាសាទកោះកែរ និងប្រាសាទព្រះវិហារ ក្នុងនោះ ភាគីចិនបានធ្វើបទបង្ហាញពីការស្រាវជ្រាវ និងចាប់ផ្តើមជួសជុលគោបុរៈទី១ ទី២ និងទី៣ នៃប្រាសាទព្រះវិហារ ចំណែកភាគីឥណ្ឌានឹងធ្វើបទបង្ហាញពីផែនការជួសជុលគោបុរៈទី៥ នៃប្រាសាទព្រះវិហារ ចំណែកភាគីឥណ្ឌា បានធ្វើបទបង្ហាញពីផែនការជួសជុលគោបុរៈទី៥ នៃប្រាសាទព្រះវិហារ រីឯ អ្នកជំនាញខ្មែរ ក៏បានធ្វើបទបង្ហាញពីការសិក្សាស្រាវជ្រាវ និងអភិរក្សរបស់ខ្លួនផងដែរ ដូចជាបញ្ហាគ្រប់គ្រងប្រព័ន្ធទឹក បញ្ហាបរិស្ថាន និងការអភិវឌ្ឍសហគមន៍ជាដើម។ល។
អត្ថបទ និង រូបថត : លោក ជា ស្រស់ និង ម៉ាត់ អារីហ្វីន
កែសម្រួលអត្ថបទ : លោក សេង ផល្លី
