ហេតុការណ៍ឆេះរថយន្តទំនើប Range Rover ១គ្រឿងនេះ បានកើតឡើងនៅវេលាម៉ោង៨និង៣០នាទីព្រឹកថ្ងៃទី២៤ខែមីនាឆ្នាំ២០១៩ ស្ថិតនៅលើកំណាត់ផ្លូវជាតិលេខ៦ ក្នុងភូមិកសិកម្ម សង្កាត់ស្រង៉ែ ក្រុងសៀមរាប ពុំបណ្ដាលឲ្យមានមនុស្សរងរបួសឡើយ។
លោក ឧត្តមសេនីយ៍ត្រី ភឹង សម្បត្តិ ស្នងការរងទទួលការិយាល័យបង្ការពន្លត់អគ្គិភ័យ និង សង្គ្រោះ នៃស្នងការនគរបាលខេត្តបានប្រាប់ថា ករណីឆ្លងចរន្តអគ្គិសនី ចេញពីក្នុងរថយន្តរ៉ែង រ៉ូវើ (Range Rover) ពាក់ស្លាកលេខភ្នំពេញ ២AA ៧៦៦៦នេះ មានម្ចាស់ឈ្មោះ ថុង ចរិយា ភេទ ប្រុស អាយុ ៣៥ ឆ្នាំ រស់នៅភូមិស្វាយដង្គំ សង្កាត់ស្វាយដង្គំ ក្រុង ខេត្ត សៀមរាប បានបើកបរមកពីលិចទៅកើត ខណៈពេលនោះ ម្ចាស់រថយន្ត ពុំមានរងការគ្រោះថ្នាក់ឡើយ ប៉ុន្តែរថយន្តរបស់លោកត្រូវបានឆេះខូចខាតទាំងស្រុង។
លោកបានបញ្ជាក់ថា ក្នុងហេតុការណ៍នេះ មានរថយន្តពន្លត់អគ្គិភ័យ ចំនួន៣គ្រឿង ក្នុងនោះ រថយន្តរបស់ស្នងការខេត្ត ចេញប្រតិបត្តិការចំនួន ២គ្រឿង រថយន្តរបស់មណ្ឌលភូមិវប្បធម៌ចំនួន ១គ្រឿង និងប្រើប្រាស់ទឹកអស់ទាំង បីគ្រឿង ទើបអាចពន្លត់បានជាស្ថាពរ។
បន្ទាប់ពីពន្លត់រួចរាល់ហើយ រថយន្តដែលត្រូវឆេះអស់នោះ ត្រូវបានម្ចាស់ហៅឡានស្ទូចយកទៅជួសជុលដោយខ្លួនឯងរួចរាល់ហើយ៕
អត្ថបទ និង រូបថត : លោក ថាច់ ពិសុទ្ធ
កែសម្រួលអត្ថបទ : លោក សេង ផល្លី
