ពិធីបើកសិក្ខាសាលាស្តីពី ការពិគ្រោះយោបល់ថ្នាក់ជាតិលើកទី៨ លើសេចក្តីព្រាងក្រមបរិស្ថាន និងធន់ធានធម្មជាតិនៃព្រះរាជាណាចក្រកម្ពុជា ដែលក្រសួងបរិស្ថានបានអនុវត្តកន្លងមក នឹងលើសេចក្តីព្រាងក្រមបរិស្ថាន និងធន់ធានធម្មជាតិ មានរយ:ពេល២ថ្ងៃនេះ នឹងធ្វើឲ្យប្រសើរឡើងនូវកិច្ចគាំពារបរិស្ថាន បេតិកភណ្ឌវប្បធម៍ និងបេតិកភណ្ឌធម្មជាតិ ការគ្រប់គ្រងធនធានធម្មជាតិ នឹងការស្តារឡើងវិញនូវធន់ធានធម្មជាតិជីវ:ចម្រុះ សម្បត្តិវប្បធម៍ នឹងការរស់នៅដោយចីរភាព ដែលជាការចាំបាច់បំផុតសម្រាប់ជីវិតមនុស្សសត្វយើងត្រូវចូលរួមទាំងអស់គ្នា។
ពិធីនេះ ប្រព្រឹត្តិទៅដោយមានវត្តមានឯកឧត្តម សៅ សុភាព រដ្ឋលេខាធិការ តំណាងឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមប្រឹក្សាជាតិអភិវឌ្ឍន៏ដោយចីរភាព ឯកឧត្តម លោកជំទាវ នៃក្រសួងស្ថាប័នពាក់ព័ន្ធ និងឯកឧត្តម តំណាង (USAID) តំណាងស្ថានទូតជប៉ុនបានអញ្ជើញចូលរួមផងដែរ។ នាព្រឹកថ្ងៃទី២៥ ខែមីនា ឆ្នាំ២០១៩ នៅក្នុងទឹកដីអង្គរដ៏បវរនៃខេត្តសៀមរាបនេះ។
លោក នាក់ ណេរ៉ុន អភិបាលរងខេត្តសៀមរាប បានថ្លែងយ៉ាងដូច្នេះថា ខេត្តសៀមរាប គឺជាប៉ូលនៃសេដ្ឋកិច្ចមួយ ក្នុងចំណោមខេត្តដែលមានប៉ូលសេដ្ឋកិច្ចទាំងបីនៃព្រះរាជាណាចក្រកម្ពុជា វាជាដង្ហើមសេដ្ឋកិច្ចរបស់ខេត្តសៀមរាប ដោយបានមកពីវិស័យទេសចរណ៍ និងវិស័យកសិកម្ម។ដូច្នេះយើងទាំងអស់គ្នាត្រូវចូលរួមយ៉ាងសកម្មពីគ្រប់មជ្ឈដ្ឋានពាក់ពន្ធ រួមទាំងក្របខណ្ឌជាតិ ក្របខណ្ឌតំបន់ និងក្របខណ្ឌអន្តរជាតិ សំដៅលើ (សន្ធិសញ្ញា អនុសញ្ញា នឹងពិធីសារផ្សេងៗ) លោកបានបន្តទៀតថា អ្វីដែលមានស្រាប់ នឹងបានតាក់តែងឡើងនៅចំណុចដែលខ្វះខាតមួយចំនួននោះ ដើម្បីធានាឲ្យបាននូវក្រមបរិស្ថាន និងធនធានធម្មជាតិ កាន់តែរឹងមាំ ច្បាស់លាស់ នឹងមានវិសាលភាពគ្របដណ្តប់ទៅលើកិច្ចគាំពារបរិស្ថាន បេតិកភណ្ឌវប្បធម៍ និងបេតិកភណ្ឌធម្មជាតិ ការគ្រប់គ្រងអភិរក្សធន់ធានធម្មជាតិ ធ្វើយ៉ាងណា ឈានទៅសម្តេចឲ្យបាននូវតុល្យភាពប្រព័ន្ធអេកូឡូស៊ី បង្កើនគម្របបៃតង នឹងការរស់នៅប្រកបដោយចីរភាព ស្របតាមទស្សនវិស័យរបស់រាជរដ្ឋាភិបាលកម្ពុជា។
ឯកឧត្តម សៅ សុភាព រដ្ឋលេខាធិការក្រសួងបរិស្ថានបានមានប្រសាសន៍ថា រាជរដ្ឋាភិបាលបានឯកភាពជាគោលការណ៏ឲ្យក្រសួងបរិស្ថានរៀបចំចាត់ចែងនូវសេចក្តីព្រាងក្រមបរិស្ថាននិងធន់ធានធម្មជាតិនេះដោយមានកិច្ចសហការបចេ្ចកទេស និងហិរញ្ញវត្ថុពីទីភ្នាក់ងារអភិវឌ្ឍន៏សហប្រជាជាតិ (UNDP) ដែលជាដៃគូរអភិវឌ្ឍន៍ផ្សេងទៀត និងក្រុមមេធាវីវិស្ណុ និងមន្ត្រីថ្នាក់ដឹកនាំរបស់ក្រសួងបរិស្ថានថែមទៀត។ជាមួយគ្នានោះដែរ ឯកឧត្តមបានឡើកឡើងថា ក្រុមការងារបានបង្កើតឡើងចំនួន ៤ក្រុម រួមមានក្រុមការងារបច្ចេកទេសតាក់តែងសេចក្តីព្រាងក្រមបរិស្ថាន និងធន់ធានធម្មជាតិ ក្រុមការងារបច្ចេកទេសទទួលបន្ទុករៀបចំសទ្ទានុក្រមនៃសេចក្តីព្រាងក្រមបរិស្ថាន និងធន់ធានធម្មជាតិ និងក្រុមការងារលេខាធិការដ្ឋាន ចំពោះសេចក្តីព្រាងក្រមបរិស្ថាន និងធន់ធានធម្មជាតិនោះ។
ឆ្លងតាមរយ:នៃកិច្ចប្រជុំផ្ទៃក្នុងរបស់ក្រុមការងារជំនាញនីមួយៗចំនួន៣១លើក និងសិក្ខាសាលាពិគ្រោះយោបល់ ដើម្បីដោះដូរបទពិសោធន៏រវាងក្រុមការងារបច្ចេកទេសទាំងអស់ និងអ្នកជំនាញការជាតិ អន្តរជាតិ ចំនួន១៩លើក ព្រមទាំងកិច្ចប្រជុំជាមួយអ្នកជំនាញការជាតិ អន្តរជាតិ ជាច្រើនលើកច្រើនសារថែមទៀតផងដែរ។ ក្រុមការងារដែលមានសមាសភាពចម្រុះ ដូចបានរៀបរាប់ដោយសង្ខេបខាងលើ បានប្រម៉ែប្រមូលមតិយោបល់ និងធាតុផ្សំចូលគ្នា រហូតដល់បានចងក្រងជាសេចក្តីព្រាងក្រមបរិស្ថាន និងធន់ធានធម្មជាតិនៃព្រះរាជាណាចក្រកម្ពុជា ហើយត្រូវបានកែសម្រួលជាបន្តបន្ទាប់ ទៅជាសេចក្តីព្រាងក្រមបរិស្ថាន និងធនធានធម្មជាតិបែបនេះឯង៕
អត្ថបទ និងរូបភាព÷ ដោយ ស៊ាន សុផាត
