ថ្លែងស្វាគមន៍ក្នុងពិធីបើកវគ្គបណ្តុះបណ្តាលស្តីពីការគ្រប់គ្រងធនធានមនុស្សតាមប្រព័ន្ធព័ត៍មានវិទ្យា នៅសណ្ឋាគាររីជិនស៊ីអង្គរ ខេត្តសៀមរាប នាថ្ងៃទី ២៥ ខែមីនា ឆ្នាំ ២០១៩ ការគ្រប់គ្រងធនធានមនុស្សតាមប្រព័ន្ធព័ត៍មានវិទ្យា លោក ពិន ប្រាកដ អភិបាលរងខេត្តសៀមរាប មានប្រសាសន៍ថា៖ស្ថិតក្នុងដំណាក់កាលបច្ចុប្បន្ន ការគ្រប់គ្រងធនធានមនុស្ស ការកសាងសមត្ថភាព និងអភិវឌ្ឍន៍ធនធានមនុស្ស ពិតជាមានសារៈសំខាន់ណាស់ក្នុងតួនាទីជំរុញសេដ្ឋកិច្ចជាតិអោយមានការរីកចំរើន។
លោកអភិបាលរងខេត្តបន្តថា៖ពិតណាស់ថារាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោនាយករដ្ឋមន្ត្រី មានចក្ខុវិស័យច្បាស់លាស់ និងមុតស្រួច គឺនឹងសម្រេចឲ្យបាននូវឋានៈជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ នឹងជាប្រទេសដែលមានប្រាក់ចំណូលកម្រិតខ្ពស់នៅឆ្នាំ២០៥០។ ដើម្បីឈាន ឆ្ពោះទៅសម្រេចឲ្យបាននូវចក្ខុវិស័យខាងលើនេះវាទាមទារខ្លាំងណាស់នូវធនធានមនុស្សដែលប្រកបដោយគុណភាព និងសក្តានុពលខ្ពស់។
ជាមួយគ្នានេះ យើងត្រូវមានការប្រកួតប្រជែងខ្ពស់ទីផ្សារការងារជាមួយនឹងលំហូរពលកម្ម ទាំងនៅក្នុងតំបន់អាស៊ាន និងពិភពលោកផងដែរ។ ក្នុងន័យនេះការពង្រឹង និងការកែលម្អដំណើរការនៃការគ្រប់គ្រងនិងការអភិវឌ្ឍន៍ធនធានមនុស្សដើម្បីប្រែក្លាយធនធានមនុស្សនៅក្នុងវិស័យសាធារណៈ និងឯកជន ឲ្យកាន់តែមានសមត្ថភាព មានវិជ្ជាជីវៈច្បាស់លាស់ និងមានប្រសិទ្ធភាព ក្នុងការបំពេញការងារ គឺជាការងារគន្លឹះ និងមានសារៈសំខាន់បំផុតសម្រាប់យើងទាំងអស់គ្នា។
លោក ពិន ប្រាកដ ក៍បានលើកឡើងពីសក្តានុពលនៃវិស័យកសិកម្មក្នុងខេត្តសៀមរាបគឺបានបង្កើតឱកាសការងារបានច្រើនសម្រាប់ប្រជាពលរដ្ឋ ដែលមុន ឆ្នាំ១៩៩៨ ប្រជាពលរដ្ឋភាគច្រើន ពឹងផ្អែកលើវិស័យកសិកម្ម ហើយក្រោយពីទទួលបាន សន្តិភាពពេញលេញ ខេត្តសៀមរាបបានអភិវឌ្ឍន៍ជាបន្តបន្ទាប់លើវិស័យនានា ដូចជា វិស័យសំណង់ វិស័យសិប្បកម្មជាពិសេសវិស័យទេសចរណ៍ដែលបានបង្កើតការងារក្នុងផ្អែកសេវាកម្មទេសចរណ៍ ជាឱកាសការងារមួយផ្សេងទៀតសម្រាប់ប្រជាពលរដ្ឋ ក្រៅពី វិស័យកសិកម្ម ដូចជាការងារតាមសណ្ឋាគារ ផ្ទះសំណាក់ ភោជនីយដ្ឋាន ផ្សារទំនើប ហាងវត្ថុអនុស្សារីយ៍ ក៏ដូចជាការផ្គត់ផ្គង់ បន្លែ ផ្លែឈើ ព្រមទាំងធ្វើសិប្បកម្មសូត្រ ក្រមា កន្សែង រូបចម្លាក់នានា ដែលជាវត្ថុអនុស្សាវរីយ៍សម្រាប់ភ្ញៀវទេសចរ ។
លោក អភិបាលរងខេត្ត បានបង្ហាញជាលើរបាយការណ៍ថា៖ខេត្តសៀមរាបវិស័យកសិកម្ម ដំណាំស្រូវ និងដំណាំរួមផ្សំផ្សេងៗទៀតក៏មានភាពរីកចំរើនដែរ បើទោះបីជាវិស័យកសិកម្មបានទទួលរងនូវគ្រោះធម្មជាតិ ពិសេសគ្រោះរាំងស្ងួត ទឹកជំនន់មួយចំនួនក្ដី ជាក់ស្តែងការងារបង្កបង្កើនផលស្រូវនៅទូទាំងខេត្តឆ្នាំ២០១៨-២០១៩ សម្រេចបាន ២១១.២៣៥ហិកតា បានទិន្នផលជាមធ្យម ២,៦៤៦ ត/ហ.ត ស្មើនឹងបរិមាណផលសរុប ៥៤៥.៨៨៨តោន។ លើដំណាំរួមផ្សំសម្រេចបានចំនួន ៤២.៥៩៥ហិកតា ដែលនឹងទទួលបានបរិមាណផលចំនួន៥៤០.៧៤០តោន ។ដំណាំអចិន្ត្រៃយ៍សំខាន់ៗចំនួន២០មុខដំណាំនឹងប្រមូលផលលើផ្ទៃដីចំនួន៤១.៦៩៨ហិកតា កើនលើសឆ្នាំមុន១០.៩១៩ហិកតា នឹងទទួលបានបរិមាណផល ចំនួន ៥៦៦.៧៨៨តោន។ទន្ទឹមនេះនៅក្នុងខេត្តក៏មានក្រុមកសិករផលិតបន្លែមានសុវត្ថិភាពចំនួន ១២ក្រុម មានសមាជិក ១៦២គ្រួសារ ដាំដុះនៅលើផ្ទៃដីចំនួន ៦០,៩១ហិកតា ដែលផលិតបន្លែបានចំនួន ១.០៥៧តោន នាឆ្នាំ២០១៧-២០១៨នេះ ។ជាលទ្ធផលឆ្នាំ២០១៨នេះ ខេត្តសៀមរាបនឹងទទួលបាននូវអធិរេកស្បៀងគឹតជាអង្ករ ចំនួន១៤៩.៧៨៦តោនស្មើនឹងស្រូវចំនួន ២៣៤.០៤០តោនសម្រាប់ការនាំចេញ និងផ្គត់ផ្គងភ្ញៀវទេសចរណ៍ ហើយនៅមានផលិតផលមានដើមកំណើតពីសត្វដូចជា សាច់ ស៊ុត និងបន្លែផ្លែឈើមួយចំនួនធំទៀតសម្រាប់ផ្គត់ផ្គង់តាមតម្រូវការ និងជំនួសការនាំចូលពីខាងក្រៅផងដែរ។
សូមបញ្ជាក់ថា៖នាយកដ្ឋានបុគ្គលិកនិងអភិវឌ្ឍន៍ធនធានមនុស្សនៃក្រសួងកសិកម្ម រុក្ខាប្រមាញ់និងនេសាទបានរៀបចំបើកវគ្គបណ្តុះបណ្តាលស្តីពីការគ្រប់គ្រងធនធានមនុស្សតាមប្រព័ន្ធព័ត៌មានវិទ្យា ធ្វើឡើងនៅសណ្ឋាគាររីជេនស៊ី អង្គរខេត្តសៀមរាប ក្រោមអធិបតីភាព ឯកឧត្តម នុត ច័ន្ទសុខា រដ្ឋលេខាធិការប្រចាំការក្រសួងកសិកម្ម រុក្ខាប្រមាញ់ និងនេសាទ វគ្គបណ្តុះបណ្តាលនេះ មានរយៈពេលបីថ្ងៃពីថ្ងៃទី២៥ដល់ថ្ងៃទី២៧ខែមីនាឆ្នាំ២០១៩ក្នុងគោលបំណងដើម្បីពង្រឹងសមត្ថភាពការគ្រប់គ្រងមន្ត្រីរាជការតាមប្រព័ន្ឋព័ត៌មានវិទ្យាឱ្យថ្នាក់ដឹកនាំអង្គភាព មន្ទីរ និងការិយាល័យរដ្ឋបាលបុគ្គលិក បានយល់ដឹងបន្ថែម ពាក់ព័ន្ឋទៅនឹងវិធាននិងនិតិវិធីការអនុវត្តន៍ ប្រើប្រាស់ប្រព័ន្ឋគ្រប់គ្រងមន្ត្រីរាជតាមប្រព័ន្ឋព័ត៌មានវិទ្យានិងយកទៅអនុវត្តឱ្យមានប្រសិទ្ឋភាពនៅតាមអង្គភាពក្រោមឱវាទក្រសួងកសិកម្មរុក្ខាប្រមាញ់និងនេសាទសំដៅជំរុញការចូលរួមអនុវត្តកំណែទម្រង់រដ្ឋបាលសាធារណៈ របស់រាជរដ្ឋាភិបាល។
អត្តបទនិងរូបភាព៖យូ វង្ស
