ថ្លែងនៅក្នុងវគ្គបណ្តុះបណ្តាលរំលឹកឡើងវិញស្តីពី ការប៉ាន់ប្រមាណបន្ទាន់ក្រោយមានគ្រោះមហន្តរាយនៅខេត្តសៀមរាបនៅព្រឹកថ្ងៃទី២៦ខែមីនាឆ្នាំ២០១៩នេះ ឯកឧត្តម ញឹក ប៊ុនរិទ្ធ អគ្គលេខាធិការរងនៃគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍ថា កន្លងមកនេះ ប្រទេសកម្ពុជាបានជួបនូវគ្រោះមហន្តរាយផ្សេងៗជាបន្តបន្ទាប់ ដែលបានធ្វើឱ្យមានការខូចខាត ហេដ្ឋារចនាសម្ព័ន្ធ សំណង់ អគារសាលារៀន ផ្ទះសម្បែង ទីសាធារណៈ ដំណាំ បាត់បង់ជីវិតមនុស្ស សត្វ ធ្វើឱ្យបរិស្ថានកង្វក់ បង្កជាជំងឺរាករូស និងធ្វើឱ្យរាំងស្ទះដល់ ដំណើរការអភិវឌ្ឍន៍ប្រទេសយ៉ាងខ្លាំង។ ហើយគ្រោះមហន្តរាយទាំងនេះអ្នកដែលងាយរងគ្រោះជាងគេនោះ គឺស្ត្រី កុមារ ចាស់ជរា និងជនពិការ។
ឯកឧត្តមបានបន្តថា គ្រោះមហន្តរាយយើងមិនអាចកាត់បន្ថយ ឬទប់ស្កាត់បានទេ ប៉ុន្តែយើងអាចធ្វើការត្រៀមបម្រុង ឬបន្ធូបន្ថយ ភាពរងគ្រោះបានតាំងពីមុនពេលមានគ្រោះមហន្តរាយ អំឡុងពេលគ្រោះមហន្តរាយ និងក្រោយពេលមានគ្រោះមហន្តរាយជាដើម។ ដូច្នេះ ការបណ្តុះបណ្តាលស្តីពី ការប៉ាន់ប្រមាណបន្ទាន់នៃមហន្តរាយដល់ក្រុមប៉ាន់ប្រមាណបន្ទាន់របស់អង្គការនិងមន្ត្រីរដ្ឋាភិបាលពេលនេះ គឺមានសារៈសំខាន់ណាស់។
ឯកឧត្តម ញឹក ប៊ុនរិទ្ធ បានជំរុញឱ្យក្រុមអ្នកវាយតម្លៃប៉ាន់ប្រមាណគ្រោះមហន្តរាយទាំងអស់ត្រូវធ្វើការវាយតម្លៃប៉ាន់ប្រមាណនូវរាល់គ្រោះមហន្តរាយផ្សេងៗឱ្យកាន់តែមានភាពល្អប្រសើរនិងមានភាពច្បាលាស់ ព្រោះថា ការវាយតម្លៃប៉ាន់ប្រមាណក្រោយមានគ្រោះមហន្តរាយ គឺជាកត្តាសំខាន់បំផុតក្នុងជួយសង្គ្រោះប្រជាពលរដ្ឋរងគ្រោះឱ្យទាន់ពេលវេលា និងមានប្រសិទ្ធភាពខ្ពស់។ ក្រៅពីនេះ ក្រុមអ្នកវាយតម្លៃប៉ាន់ប្រមាណគ្រោះមហន្តរាយទាំងអស់ គឺជាជំនួយឱ្យយន្តការ ដែលមានស្រាប់ សម្រាប់ជួយពង្រឹងលទ្ធភាពដល់ប្រជាពលរដ្ឋក្នុងការបញ្ជៀសបាននូវផលប៉ះពាល់ពីគ្រោះមហន្តរាយនានា ជាពិសេសទឹកជំនន់ តាមរយៈការស្វែងរកព័ត៌មានពីគ្រោះមហន្តរាយដែលមានប្រព័ន្ធទូរស័ព្ទ១២៩៤ តាមរយៈវិទ្យុ ទូរទស្សន៍ និងប្រព័ន្ធព័ត៌មាន សង្គម។
លោក កែប ក័ណ្ណារូ ប្រធានអង្គការ Padek និងជាប្រធានគណៈកម្មការវេទិការមនុស្សធម៌កម្ពុជា បានថ្លែងថា ក្រុមអ្នកវាយតម្លៃប៉ាន់ប្រមាណគ្រោះមហន្តរាយ គឺពិតជាមានសារៈសំខាន់ណាស់ ហើយដើម្បីឱ្យក្រុមនេះមានសមត្ថភាពគ្រប់គ្រាន់គណៈកម្មការវេទិការមនុស្សធម៌កម្ពុជា បានធ្វើការបណ្តុះបណ្តាល ផ្តល់ចំណេះដឹង ប្រឹក្សាយោបល់ និងផ្តល់បទពិសោធន៍ជាច្រើនក្នុងគោលដៅធ្វើយ៉ាងណាឱ្យការវាយតម្លៃប៉ាន់ប្រមាណក្រោយមានគ្រោះមហន្តរាយមាន
ភាពច្បាសលាស់។
លោកបានបញ្ជាក់ថា ក្រុមអ្នកវាយតម្លៃប៉ាន់ប្រមាណក្រោយមានគ្រោះមហន្តរាយទាំងនេះ និងចុះវាយតម្លៃនូវមានគ្រោះមហន្តរាយផ្សេងៗដូចជា គ្រោះទឹកជំនន់ គ្រោះរាំងស្ងួត ជាដើម។ហើយនៅពេលដឹងលទ្ធផលថា ទំហំនៃការគ្រោះមហន្តរាយនោះ ធ្វើឱ្យខូចខាតអ្វីខ្លះ ក្នុងទំហំទឹកប្រាក់ប៉ុន្មានហើយនោះ ក្រុមនេះ និងបញ្ជូនរបាការណ៍ទៅគណៈកម្មការវេទិការមនុស្សធម៌កម្ពុជា និងគណៈកម្មាធិការជាតិគ្រប់គ្រងគ្រោះមហន្តរាយ ដោះស្រាយ តាមគោលការណ៍របស់រាជរដ្ឋាភិបាល និងអង្គការមនុស្សធម៌នានា៕
អត្តបទនិងរូបភាព៖ឃុត សៅ
