សមត្ថកិច្ចនគរបាលខេត្តសៀមរាបបានឲ្យដឹងថា នៅវេលាម៉ោង ២០ និង៣០នាទី ថ្ងៃទី ២៦ ខែ មីនា ឆ្នាំ ២០១៩ម្សិលមិញនេះ មានស្ត្រីជនជាតិចិនម្នាក់ បានលង់ទឹកអាងស្លាប់ ក្នុងសណ្ឋាគារ រ៉ូយ៉ាល់អង្គររីសត ស្ថិតនៅភូមិ កសិកម្ម សង្កាត់ ស្រង៉ែ ក្រុង/ខេត្តសៀមរាប ។ ជនរងគ្រោះមានឈ្មោះ FENG YUZHEN ភេទ ស្រី កើតថ្ងៃទី ០២ វិច្ឆិកា ១៩៤៤ ជាជនជាតិចិន កាន់លិខិតឆ្លងដែនលេខ E៥៦៩១៤៣៥៦ ជាភ្ញៀវទេសចរណ៍ ចូលមកព្រះរាជាណាចក្រកម្ពុជា កាលពីថ្ងៃទី២៥ ខែមីនា ឆ្នាំ២០១៩ តាមច្រកព្រលានយន្តហោះអន្តរជាតិសៀមរាបតាមរយៈក្រុមហ៊ុនទេសចរណ៍ឆាង យ៉ុងស្នាក់នៅបន្ទប់លេខ៥០៣ ក្នុងសណ្ឋាគារខាងលើ។
លោកវរៈសេនីយ៏ឯក ផេង ពេជ្រ នាយការិយាល័យនគរបាលបច្ចេកទេស និងវិទ្យាសាស្ត្របានឲ្យដឹងថា ផ្អែកតាមការស្រាវជ្រាវត្រួតពិនិត្យរបស់កម្លាំងសមត្ថកិច្ចជំនាញ និងលោកវេជ្ជបណ្ឌិត អ៊ិត ឆបឆរ័ត្ន គ្រូពេទ្យអមតុលាការខេត្តបានឲ្យដឹងថា លើខ្លួនសាសពគ្រូពេទ្យកោសល្យវិច្ច័យបានពិនិត្យឃើញថា ជនរងគ្រោះសពមានសភាពពោះប៉ោង តឹងមាត់ ច្រមុះ និងត្រចៀក ទើបធ្វើឲ្យស្ទះផ្លូវដង្ហើម ហើយពុំមានការជួយសង្ក្រោះទាន់ពេលវេលា ទើបធ្វើឲ្យជនរងគ្រោះដាច់ខ្យល់ស្លាប់។
សមត្ថកិច្ចបញ្ជាក់ថា ក្នុងករណីនេះពុំមានពាក់ព័ន្ធទៅនឹងបទល្មើសព្រហ្មទ័ណ្ឌទេ ព្រោះជនរងគ្រោះស្លាប់ដោយលង់ទឹកដោយខ្លួនឯងពិតប្រដកមែនហើយសាកសពត្រូវបានបញ្ជូនទៅតម្កល់ទុកបណ្តោះអាសន្ននៅសាលតម្កល់សពស្ទឹងមានជ័យរាជធានីភ្នំពេញ រងចាំការសំរេចពីក្រុមគ្រួសារ និងស្ថានទូត។
អត្ថបទ និងរូបភាព៖ ថាច់ ពិសុទ្ធ
កែសម្រួលអត្ថបទ ៖ អ៊ុន ណារាជ្យ
ព័ត៌មានជាតិ ថ្មីៗ
