ដើម្បីចូលរួមកែលំអសោភណ្ឌភាពក្នុងតំបន់ផាប់ស្ទ្រីត អាជ្ញាធរក្រុងសៀមរាប បានចុះរៀបចំសណ្ដាប់ធ្នាប់នៅតាមដងផ្លូវ និងធើ្វការកាត់ទំលាក់ខ្សែភ្លើង ដែលអាចប៉ះពាល់ដល់សុវត្ថិភាព បងប្អូនប្រជាពលរដ្ឋជាអាជីវករ ភ្ញៀវជាតិនិងអន្តរជាតិ។
លោក នួន ពុទ្ធារ៉ា អភិបាលក្រុងសៀមរាបបានឱ្យដឹងថា ការចុះរៀបចំសណ្តាប់នៅតំបន់ Pub Street បានសហការជាមួយមន្ទីរសាធារណការ និងដឹកជញ្ជូនខេត្ដសៀមរាប និងអង្គភាពអគ្គិសនីខេត្ដ បានផ្តោតសំខាន់ទៅលើកបញ្ហាទូទៅទាំងការលក់ដូរ ការដាក់តាំងសម្ភារៈផ្សេងលើដីចំណីផ្លូវ ពិសេសទៅលើបញ្ហាបណ្តាញអគ្គីសនី ព្រោះថា នៅក្នុងតំបន់ផប់ស្ទ្រិតនេះ ជាបណ្តុំភ្ញៀវទេសចរកំសាន្តសប្បាយនៅពេលរាត្រីដ៏សំខាន់របស់ខេត្តសៀមរាប។
អភិបាលក្រុងបានបន្ដថា ក្នុងការរៀបចំនេះ អាជ្ញាធរក្រុង បានអញ្ជើញក្រុមអាជីវករទាំងអស់ ដែលលក់ដូរនៅក្នុងតំបន់ផ្លូវផប់ស្ទ្រីត និងតំបន់ផ្សារចាស់នេះ ដោយណែនាំឲ្យពួកគាត់រៀបចំដោយខ្លួន នូវរបស់របរផ្ទាល់ខ្លួននៅតាមផ្លូវច្រកតូចៗ និងច្រកតាមសំយ៉ាបអាគារនានា។ ក្នុងនោះដែរ ច្រកតូចៗ នីមួយៗ ត្រូវទុកចន្លោះផ្លូវដើរទំហំ មួយម៉ែត្រកន្លះ ដោយចាប់អនុវត្ដពីថ្ងៃទី២៦ ខែមីនា ឆ្នាំ២០១៩ រហូតដល់ថ្ងៃបុណ្យចូលឆ្នាំថ្មីប្រពៃណីជាតិខ្មែរនេះបានបញ្ចប់ ។ ជាមួយគ្នានោះដែរ អាជ្ញាធរក្រុងនឹងធ្វើចំណតរថយន្ដមួយនៅតំបន់អតីតអាងក្រពើ និងហាមមិនឲ្យមានយានយន្ដចូលក្នុងតំបន់ផប់ស្ទ្រីត នៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខនេះឡើយ៕
ព័ត៌មានជាតិ ថ្មីៗ
អត្ថបទ និងរូបភាព ៖ លោក ជា ស្រស់
កែសម្រួលអត្ថបទ៖ លោក សេង ផល្លី
