នៅព្រឹកថ្ងៃទី២៧ ខែមីនា ឆ្នាំ២០១៩ លោកពិន ប្រាកដ អភិបាលរងខេត្តសៀមរាប តំណាង ឯកឧត្តម ទៀ សីហា អភិបាលខេត្តសៀមរាប បានអញ្ជើញបើកកិច្ចប្រជុំប្រចាំត្រីមាសទី១ របស់ ក្រុមការងារពិសេសថ្នាក់ខេត្ត សម្រាប់លុបបំបាត់ជំងឺគ្រុនចាញ់ ឆ្នាំ២០១៩ ក្នុងគោលបំណង ធ្វើបច្ចុប្បន្នភាព ក្នុងការប្រមូលទិន្នន័យពីគ្រប់ស្ថាប័នពាក់ព័ន្ធ ការពង្រឹងសកម្មភាពការងាររបស់សមាជិក សមាជិកាក្រុមការងារពិសេស និងការពិភាក្សាលើរបាយការណ៍ ពិភាក្សាជុំវិញការ អនុវត្តការងារកន្លងមកលើបញ្ហាជួបប្រទះជាក់ស្តែងទាំងការងារសម្រេចបាន ទាំងបញ្ហាប្រឈម។
លោកពិន ប្រាកដ មានប្រសាសន៍បើកកិច្ចប្រជុំថា អនុវត្តតាមគោលនយោបាយរបស់រាជរដ្ឋាភិបាល ក្នុងការការពារសុខមាលភាពជូនប្រជាពលរដ្ឋ ប្រកប ដោយ ប្រសិទ្ធិភាព និងចីរភាពសង្គម។ ទន្ទឹមនឹងនោះ ក្នុងចំណោមគោលការណ៍អាទិភាព របស់រាជរដ្ឋាភិបាល ជំងឺគ្រុនចាញ់ គឺជាគោលការណ៍អាទិភាពមួយ ត្រូវមានការប្តេជ្ញាចិត្តខ្ពស់ ក្នុងការលុបបំបាត់ ឲ្យបានទាំងស្រុងនៅឆ្នាំ២០២៥ ។
នាពេលកន្លងមកអ្នកជំនាញផ្នែកជំងឺគ្រុនចាញ់ សង្កេតឃើញថា ស្ត្រីមានផ្ទៃពោះ និងកុមារ គឺជាអ្នកដែលប្រឈមខ្លាំងជាងគេ នៅពេលឆ្លងជំងឺនេះ តាមរយៈសមតិកម្មនេះ លោក ពិន ប្រាកដ អំពាវនាវដល់ មន្ទីរពេទ្យបង្អែកខេត្តស្រុក មណ្ឌលសុខភាព និងប៉ុស្តិសុខភាពទាំងអស់ក្នុងខេត្ត ត្រូវចាប់អារម្មណ៍ឲ្យបានខ្លាំង ដើម្បីកុំឲ្យហេតុការណ៍នេះកើតឡើងជាយថាហេតុនៅ មូលដ្ឋានរបស់ខ្លួន ។
ជាចុងក្រោយ លោកអភិបាលរងខេត្ត បានផ្ដល់អនុសាសន៍ ៤ចំណុច ដល់ក្រុមការងារជំនាញ ដើម្បីចូលរួមធ្វើឲ្យវិស័យសុខាភិបាលក្នុងខេត្តសៀមរាប កាន់តែល្អប្រសើរឡើង ទី១ បន្តសហការគ្នាឲ្យបានជិតស្និទ្ធ ដើម្បីបង្កើនសកម្មនេះបានរលូន ទី២ ត្រូវរៀបចំការប្រជុំ ឲ្យបានទៀងទាត់តាមកម្មវិធីដែលគ្រោងទុក ទី៣ បន្តដោះស្រាយបញ្ហាភាពស៊ាំ នៃឱសថ មួយចំនួន និងទី៤ ត្រូវព្យាលដោយប្រុងប្រយ័ត្ន និងពង្រឹងការផ្តល់សេវាតាមគ្លីនីកឯកជន និងមន្ទីរពេទ្យរដ្ឋ ចំពោះឱសថរបេង និងឱសថប្រឆាំងជំងឺគ្រុនចាញ់ មិនត្រូវអនុញ្ញាតឲ្យដាក់លក់ដោយមិនបានត្រួតពិនិត្យឡើយ ។
អត្ថបទ និងរូបភាព÷ លោក លីវ សុខុន និងលោក ស៊ាន សុផាត
កែសម្រួលអត្ថបទ៖ លោក សេង ផល្លី
