គម្រោងអភិវឌ្ឍន៍មជ្ឈមណ្ឌលវប្បធម៌ សន្តិភាព របស់ សម្តេចព្រះមហាសង្ឃរាជនៃព្រះរាជាណាចក្រកម្ពុជា មិនត្រូវបានហាមឃាត់ ក្នុងការអភិវឌ្ឍឡើយ ប៉ុន្តែ អាជ្ញាធរខេត្តសៀមរាបមិនអនុញ្ញាតឲ្យដឹកជញ្ជូនដី ដែលកាយចេញពីតំបន់អភិវឌ្ឍនេះ ទៅចាក់នៅតំបន់ដទៃក្រៅពីគម្រោងនេះឡើយ នេះបើតាមការឲ្យដឹង ពីនាយករដ្ឋបាលខេត្តសៀមរាប។
កាលពិថ្ងៃទី២៦ ខែមីនា ឆ្នាំ២០១៩នេះ ឯកឧត្តម ទៀ សីហា អភិបាលខេត្តសៀមរាប បានបើកកិច្ចប្រជុំមួយ ដែលមានការចូលរួមពីភាគីពាក់ព័ន្ធដូចជា មន្ទីរធនធានទឹក និង ឧតុនិយមខេត្ត មន្ទីរបរិស្ថានខេត្ត មន្ទីរទេសចរណ៍ខេត្ត មន្ទីរ កសិកម្ម រុក្ខា ប្រមាញ់ និងនេសាទខេត្ត មន្ទីររៀបចំដែនដី នគរូបនីយកម្ម សំណង់ និង សុរិយោដីខេត្ត រួមនិងតំណាងក្រុមហ៊ុនអនុវត្តគម្រោងផងដែរនេះ ដើម្បីដោះស្រាយនូវភាពមិនច្បាស់លាស់មួយចំនួន របស់គម្រោងអភិវឌ្ឍន៍មជ្ឈមណ្ឌលវប្បធម៌ សន្តិភាពនេះ។
តាមការឲ្យដឹងពី លោកប្រធានមន្ទីរធនធានទឹក បានឲ្យដឹងថា ដីផ្ទៃអាងនេះត្រូវបានសហគមន៍ជ្រាវ ស្នើសុំ ធ្វើការជីកស្តារបាតអាង ដោយបានសុំច្បាប់អនុញ្ញាតនៅឆ្នាំ២០១៥ ទើបតែពេលនេះទើបអនុវត្ត ស្របទៅនឹងគម្រោង អភិវឌ្ឍន៍មជ្ឈមណ្ឌលវប្បធម៌ សន្តិភាព របស់សម្តេចព្រះអគ្គមហាសង្ឃរាជ ទេព វង្ស។ រីឯ គម្រោងនេះ គឺត្រូវបានប្រគល់សិទ្ធិឲ្យទៅក្រុមហ៊ុន បរិសុទ្ធ ប្រភើធី មែនេចមិន ដើម្បីអភិវឌ្ឍន៍ ដែលកន្លងមក មានរងការរិះគន់ពីសារព័ត៌មានបណ្តាញសង្គមមួយចំនួន លើការស្ដារបាតអាងនេះ។ ក្នុងការស្ដារបាតអាងនេះដែរ ក្រុមហ៊ុននេះ បានដឹកជញ្ជូនដីដែលបានជីកកាយនោះ ចេញក្រៅពីតំបន់អភិវឌ្ឍនេះ ដោយពុំមានច្បាប់អនុញ្ញាតនៅឡើយ។ ដោយឡែក បើក្រុមហ៊ុន ធ្វើការដឹកជញ្ជូនដី សម្រាប់ចាក់នៅក្នុងតំបន់អភិវឌ្ឍនេះ គឺត្រូវពឹងផ្អែកទៅលើច្បាប់ ដែលរាជរដ្ឋាភិបាលបានអនុញ្ញាត នៅក្នុងតំបន់ផ្ទៃអាងទឹកនេះ។
ព័ត៌មានជាតិ ថ្មីៗ
លោកប្រធានមន្ទីរធនធានទឹក បានបញ្ជាក់បន្ថែមថា តំបន់ផ្ទៃអាងនេះ ស្ថិតនៅក្នុងតំបន់២ របស់អាជ្ញាធរបឹងទន្លេសាប ប៉ុន្តែការជីកកាយដីនេះ មិនបានធ្វើឲ្យប៉ះពាល់ដល់តំបន់ព្រៃលិចទឹក សម្រាប់ត្រីពងកូន និង សត្វស្លាបរស់នោះទេ។
បន្ទាប់ពីស្តាប់ សេចក្តីរាយការណ៍របស់ថ្នាក់ដឹកនាំមន្ទីរពាក់ព័ន្ធ និង អ្នកតំណាងក្រុមហ៊ុនអនុវត្តគម្រោងនេះរួចមក ឯកឧត្តម ទៀ សីហា ក៏បានលើកនូវចំណុចសំខាន់ៗមួយចំនួន ដើម្បីឲ្យបណ្តាមន្ទីរ អង្គភាព ត្រូវធ្វើការត្រួតពិនិត្យឡើងវិញ ក្នុងនោះដែរក្រុមហ៊ុនត្រូវសហការជាមួយអាជ្ញាធរខេត្ត បញ្ជូនឯកសារពាក់ព័ន្ធ ដែលរាជរដ្ឋាភិបាលបានអនុញ្ញាត តាមរយៈលិខិតលេខ ៩៤៩ សជណ ចុះថ្ងៃទី២០ សីហា ឆ្នាំ២០១៥ របស់ទីស្តីការគណៈរដ្ឋមន្ត្រី អនុញ្ញាតថ្វាយចំពោះសម្តេចព្រះអគ្គមហាសង្ឃរាជធិបតីកិត្តិឧទ្ទេសបណ្ឌិត ទេព វង្ស ដើម្បីធ្វើការអភិវឌ្ឍន៍ ។
ឯកឧត្តមអភិបាលខេត្ត ក៏បានគូសបញ្ជាក់ថា គម្រោងមជ្ឈមណ្ឌលវប្បធម៌ សន្តិភាព ដែលបានផ្ដួចផ្ដើមដោយសម្តេចព្រះអគ្គមហាសង្ឃរាជ ទេព វង្សនេះ គឺមានភាពធំធេងណាស់ ។ ម្យ៉ាងទៀត ប្រសិនបើគម្រោងនេះ បានដំណើរការទៅបានប្រកបដោយជោគជ័យនោះ វានឹងផ្ដល់កិត្តិយសដល់ខេត្តប្រវត្តិសាស្ត្រមួយនេះ ក្នុងវិស័យព្រះពុទ្ធសាសនា និង ទេសចរណ៍ទៀតផង ។
អត្ថបទ និងរូបភាព÷ លោក គឿន វេត
កែសម្រួលអត្ថបទ៖ លោក សេង ផល្លី
