នៅព្រឹកថ្ងៃទី២៨ ខែមីនា ឆ្នាំ២០១៩នេះ ក្រសួងព័ត៌មាន បានបើកសិក្ខាសាលាមួយ ស្តីពីការរៀបចំផែនការយុទ្ឋសាស្ត្រនិងថវិកាកម្មវិធី នៅខេត្តសៀមរាប ដើម្បីផ្សព្វផ្សាយ ដល់ថ្នាក់ដឹកនាំ និងមន្ត្រីជំនាញផែនការគណនេយ្យហិរញ្ញវត្ថក្រោមឱវាទក្រសួងព័ត៌មាន ឲ្យទទួលបានចំណេះដឹងបន្ថែមអំពីការផ្តល់សិទ្ឋអំណាច ការទទួលខុសត្រូវដល់អង្គភាពថវិកា និងការរៀបចំផែនការយុទ្ឋសាស្ត្រ របស់ក្រសួងឲ្យដំណើរការទៅប្រកបដោយគុណភាព និងប្រសិទ្ឋភាព។
ថ្លែងបើកសិក្ខាសាលានេះ ឯកឧត្តម ថាច់ ផែន រដ្ឋលេខាធិការ និងជាប្រធានក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈក្រសួងព័ត៌មាន បានមានប្រសាសន៍ថា ក្នុងរយៈពេលប៉ុន្មានឆ្នាំថ្មីៗនេះ គឺជាការឆ្លងកាត់នូវរបត់ថ្មីមួយខុសប្លែក ពីអ្វីៗដែលបានជួបប្រទះ ក្នុងនោះក្រសួងចំនួន១០ បានអនុវត្តថវិកាកម្មវិធីពេញលេញ និងក្រសួងចំនួន១៥ទៀត ត្រូវបានជ្រើសរើសបញ្ចូលបន្ថែម ក្នុងនោះក៏មានក្រសួងព័ត៌មានផងដែរ ដើម្បីអនុវត្តសាកល្បងថវិកាកម្មវិធីនេះ។ក្នុងរបត់ថ្មីនេះ ក្រសួងព័ត៌មានបានចូលរួមយ៉ាងសកម្ម ដោយបានខិតខំកែសម្រួល និងរៀបចំឡើងវិញនូវយន្តការថ្មីមួយ ដោយបង្កើតឲ្យមានក្រុមការងាររៀបចំក្របខ័ណ្ឌចំណាយរយៈពេលមធ្យម ហើយបច្ចុប្បន្នក្រុមការងារនេះបានបំពេញកាតព្វកិច្ចរបស់ខ្លួន ជាអង្គភាពរៀបចំផែនការថវិកាក្នុងចក្ខុវិស័យបន្ត និងពង្រឹងបន្ថែមលើការរៀបចំផែនការថវិកាឲ្យកាន់តែមានប្រសិទ្ឋភាព។
ឯកឧត្តម បានលើកឡើងពីបញ្ហាពាក់ព័ន្ឋនឹងថវិកាកម្មវិធីនេះផងដែរ ថា ៖ការបង្កើតមាតិកាថវិកាថ្មី បានធ្វើឲ្យការវិភាជថវិកាពុំទាន់បានត្រឹមត្រូវ តាមជំពូកគណនី និងអនុគណនីនីមួយៗ ហើយការប្រើប្រាស់ថវិកានៅពុំទាន់មានការទទួលខុសត្រូវឲ្យបានខ្ពស់នៅឡើយ រីឯការទូទាត់ថវិកាក៏នៅមានភាពយឺតយ៉ាវ ក្នុងនោះសកម្មភាពខ្លះ ត្រូវបានជ្រុលហួសនិងយកទៅអនុវត្តនៅដើមឆ្នាំបន្ទាប់ ដែលខុសទៅនឹងច្បាប់គ្រប់គ្រងហិរញ្ញវត្ថុ ធ្វើឲ្យការទូទាត់ចេះតែពន្យាពេលពីមួយខែទៅមួយខែ។ ទាំងអស់នេះ ជាហេតុមិនអាចឲ្យយើងបំពេញតាមតម្រូវការរបស់ក្រសួងសេដ្ឋកិច្ចនិងហិរញ្ញវត្ថុបានឡើយ ជាពិសេសកង្វះខាតលើការរៀបចំផែនការចំណូល-ចំណាយប្រចាំត្រីមាសឲ្យបានសុក្រិត្យ។
សូមបញ្ជាក់ថា ក្រសួងព័ត៌មាន រៀបចំសិក្ខាសាលាស្តីពីការរៀបចំផែនការយុទ្ឋសាស្ត្រនិងថវិកាកម្មវិធី រយៈពេលពីថ្ងៃពីថ្ងៃទី២៨ ដល់ថ្ងៃទី២៩ខែមីនា ឆ្នាំ២០១៩ នៅខេត្តសៀមរាប ដោយមានសិក្ខាកាម ជាមន្ត្រីផែនការគណនេយ្យ និងហិរញ្ញវត្ថុ ក្រោមឱវាទក្រសួងព័ត៌មាន សរុបចំនួន៨៦រូប ដោយមានការបកស្រាយ និងលើកបទបង្ហាញពីវាគ្មិនមកពីក្រសួងសេដ្ឋកិច្ច និងហិរញ្ញវត្ថុ។
អត្ថបទ និងរូបភាព៖ លោក យូ វង្ស
កែសម្រួលអត្ថបទ៖ លោក សេង ផល្លី
