នៅវេលាម៉ោង ប្រមាណ ៩ព្រឹក ថ្ងៃទី២៨ ខែមីនា ឆ្នាំ២០១៩នេះ កម្លាំងសមត្ថកិច្ចខេត្តសៀមរាប បានចុះបង្ក្រាបទីតាំងល្បែងស៊ីសងតាមប្រព័ន្ធអ៊ីនធើណិត ចំនួន ២កន្លែង មានទីតាំងស្ថិតនៅភូមិវិហារចិន សង្កាត់ស្វាយដង្គុំ ក្រុងសៀមារាប។
តាមប្រភពពីសមត្ថកិច្ចខេត្តបានឲ្យដឹងថា ក្នុងប្រតិបត្តិការបង្ក្រាបនេះ កម្លាំងសមត្ថកិច្ចបានរកឃើញ និងឃាត់ខ្លួនជនជាតិចិន សរុបចំនួន ១៦៣នាក់ ក្នុងនោះស្រី ៤០នាក់ និងកុំព្យូទ័រសម្រាប់ប្រព្រឹត្តបទល្មើស ប្រមាណ១៥០គ្រឿង។
បច្ចុប្បន្នសមត្ថកិច្ចជំនាញខេត្ត បានបញ្ជូនជនសង្ស័យទៅស្នងការដ្ឋាននគរបាលខេត្តសៀមរាប ដើម្បីធ្វើការសាកសួរបំភ្លឺ និងកំពុងដំណើរការនីតិវិធី៕
សូមបញ្ជាក់ថា ក្នុងប្រតិបត្តិការនេះ កម្លាំងផែនអន្តោប្រវេសន៍ បានសហការជាមួយកម្លាំងការិយាល័យអន្តរាគមន៍ នៃស្នងការដ្ឋាននគរបាលខេត្តសៀមរាប និងកម្លាំងប៉ុស្តិ៍នគរបាលរដ្ឋបាលសង្កាត់ស្វាយដង្គំ ដោយមានការសម្របសម្រួលដឹកនាំនីតិវិធីដោយ ព្រះរាជអាជ្ញារងអមសាលាដំបូងខេត្តសៀមរាប។
អត្ថបទ និងរូបភាព៖ លោក ថាច់ ពិសុទ្ធ
កែសម្រួលអត្ថបទ៖ លោក សេង ផល្លី
